Read Biete GALATIA 5 Bible Online

GALATIA 5 - Biete bible

GALATIA 5

¹Suak ni khâi loi rangin Kristan a nen zalen tâk a; khaangkan, iding indet unla, suak ringkolah khan itâng nôk khâi no rei.

²Ringai ta u, keimah Paula ngêi hin nin ziangah kî ti a nit, ser nin intanin chu Krista khah nin ta rangin îte rifena om tlak no nih.

³Ser itan murdi ziangah amahih ki îsîr nuam a nit - Dân thu murdi khah an zôm riai rang a nit.

⁴Nangmani, Dâna thiam ichang itum ngaihei, Krista neh nin inṭhen tâk a; lungkhamna chu nin imâk tâk a nit.

⁵Keini chu Rithla zâra iamna sika thiamchangna khah itûngin kin ingâkmo tak tak a nit.

⁶Krista Jisuaah khan chu sertan manih, sertan ino manih khom îte danglamna omak; lungthlungnaa rithluk iamna bang hi rifena om a nit.

⁷Matiang ipanin nin itlân ṭhat ngai tlia kaneh tu ngânin im thutak kha nin zôm nona ranga nangni ṭhui inrimang tâk chei u?

⁸Hi thlêmna hih nangni koitu Pathiana ata suak ni mak e.

⁹“Chol iroichekan ibai phit pumpui khom â thoi zit ngai,” iti a nit.

¹⁰Pumapaah munka om ei nit sikin lungril danglam la nei no tin u iti keiman chu kî iam ngit a nit; nikhomsela, nangni inbuaitu kha chu ingkana mi khom ni sela, Pathian kuttum la tuang a ti.

¹¹Suapuihei, keimah hin sertan hih rifena a om iti thu lei isîr ngai inlang chu, nuam ilo ki lai nit mai rang mani? Khangkan ni seh, kros thu kin îsîr hin buaina isua khâi no nih.

¹²Nangni inbuaituhei kha chu nin lâi ata ritan pit [4] sela kî nuam a nit.

¹³Suapuihei, nangni chu zalenna nei ranga koi nin nit a; nikhomsela, nin zalenna khah nin taksa lungbôk ranga zoronṭumin mang no unla; lungthlungnan sin tho pêk risak ual rei.

¹⁴“Nangmah lung ni irthlung angkan ni bungahei lungthlung roh,” iti thu bâikah hin Dân thu pumpui khah a înrikip tâk a nit.

¹⁵Khannisela, nin risê a, nin rifâk risak duaiin chu, nin rifâk vang nona rangin ridîn rei.

¹⁶Khaangkan, amahih kî ti a nit: Rithlaah om rei; khanchu, taksa lungbôk khah nin izôm ino rang a nit.

¹⁷Taksa lungbôk khan Rithla tiang thil a doi ngai a, Rithla khomin taksa tiang thilhei a doi ngai. Khahei ruai khah an rikal khap sikin nin isin nuam khah îte nin isin thei ngai ino a nit.

¹⁸Rithla îruaia nin omin chu Dân nuaiah omak chei.

¹⁹Taksa mihei sintho chu â lang ian a nit, khahei khah: riditna hei, rithiangnona hei, hurna hei,

²⁰mirmil biakna hei, dôithiamna hei, rimumâkna hei, ringona hei, inarna hei, ningthikna hei, marangṭhat zongna hei, inṭhenna hei, iam inranna hei,

²¹rinarsana hei, zûnruina hei, zu bual râifânna hei neh khangkana a dang danghei kha a nit. Khangkana sin itho ngaihei khan Pathian ram lua no nih iti matona nangni ki lei îril tâk angkah khan atûn khom nangni ki îril nôk a nit.

²²Rithla râ chu lungthlungna hei, lômna hei, ringeina hei, tuangtheina hei, lungkhamna hei, ṭhatna hei, iamomna hei,

²³ringaichînna hei, ridîntheina hei a nit. Khahei ikal lamin Dân zel omak e.

²⁴Krista Jisua omhei khan chu an taksa rizuknahei neh lungbôkhei murdi khah an ihêmde tâk a nit.

²⁵Rithlaa ring ei nit tâkin chu Rithla îruaiin ei om ngêt rang a nit.

²⁶Risual ri-ot risaka, rinarsa risaka, mahnia ripâkin om no min u.