Read Biete GALATIA 6 Bible Online

GALATIA 6 - Biete bible

GALATIA 6

¹Suapuihei, mîn sual a sin lâi iphôkin om sela, nangni rithla mihei khan ringai intlôm takkan siaminṭha nôk nin tum ngai rang a nit; khannisela, nangni khom thlêmnaah nin lût duai nona rangin rivêng chak rei.

²Nin puakpêl risan risak ngai rei; khanchu, Krista dân khah nin izôm nîng a ti.

³Mi îte ni viat loiin, mi lian okin arben chu a khâtin a irlêm a nit.

⁴Mi tinin mahni sintho fia seng bak riseh; khanungah khan, mi sintho neh inrichak loiin, mahni sintho chung bangah khan isong rang nei nin ti.

⁵Mi tinin mahni puak chit an pêl rang a nit a.

⁶Khante, thu inriseina dongtu khan ân riseitu khah thil iṭha ai nei murdi a pêk sa rang a nit.

⁷Ilêmin om no rei, Pathian chu imusit chi ni mak e. Mîn a irthe tak khah ai ât rang a nit.

⁸Mahni taksa rizukna tianga rithetu khan taksaa siatna ât a ta, Rithla tianga rithetu khan chu Rithlaa kumtluang ringna khah ât a ti.

⁹Khasikah khan, thil iṭha sin changindong no min u, ei riphial non chu a zoro takah ei lai ât ngêt rang a nit.

¹⁰Khaangkan, zoronṭum ei nei lam takkan mi tin chungah thil iṭha sin ei ti u, iamnaa ei inmihei chungah vâng chu sin ual bîk ei ti u.

¹¹En ta u, keima kut ngêiin nin ziangah lekha irol rut rut kan ki irziak a nit hih.

¹²Taksaa ilang inṭha nuam ngaihei khan ser itan rangin nangni an itur ngai a nit; îte dang sik ni mak a, Krista kros sika nuamlona an zôkna rang banga a nit.

¹³Sertanhei khom hin Dân khah zôm inrikip bîk ngai mak e. Nin takpuma risinsiana om khah an risongpui theina ranga ser nangni intan an inuam kêng ai nit.

¹⁴Keiman chu, ei Pumapa Jisua Krista kros bang ti no chu isong rang dang nei mang e, kha kros zârah khan rammual hih ki rangin ihêmden a om tâk a, kei khom rammual rangin ihêmden ki om tâk.

¹⁵Siam inthar nôkna ti no chu sertan neh tan ino îte ni mak e.

¹⁶Hi thu zômtuhei murdi chungah ringeina neh khorngaina om riseh, an ziangah neh Pathian mi murdihei ziangah.

¹⁷Atûna rithokin chu tutên nen buai khâi no riseh, ki takpuma sâbe omhei hi Jisua Krista suak ki nit richikna a nit.

¹⁸Suapuihei, ei Pumapa Jisua Krista lungkhamna chu nin rêngka ziangah om riseh. Amen.