Read Biete EFESI 1 Bible Online

EFESI 1 - Biete bible

EFESI 1

¹Paula, Pathian lungdoa Krista Jisua tirtôn khan, mi rithiang Efesi khua om, Krista Jisua mi iamomhei chibai kî bûk a nit.

²Pathian ei Pa neh Pumapa Jisua Krista ziang ata lungkhamna neh ringeina nin ziangah om riseh.

³Ei Pumapa Jisua Krista Pa neh Pathian chu inpâkin om riseh. Ani khan rivân rama rithla tiang ṭhatvurna tinrêngin Kristaah khan a ne vur tâk a.

⁴Rithiang neh sêlnaboia a makungah ei om theina rangin leilung insiang ma rengin lungthlungnan Kristaah khan a ne irthlang tâk a nit.

⁵Pathianin ama lungdo neh a tum dân angkah takin Jisua Krista zâra a naia ne siam rangin a lei înkung thlâm tâk a nit.

⁶A nai Lungthlung taka zâra a lungkhamna thiltlongpêk roinpui tak a ne ipêk sikah hin Pathian inpâk ei ti u.

⁷Krista thisena ritlan ei nit tâk a, ei sualhei izâ a nit tâk. Pathian lungkhamna chu ân thûk vang na!

⁸Kha lungkhamna khah a vârna neh riattheina murdin a ne ivur tâk a nit.

⁹Pathianin a lungdo rithup Krista zâra izoi ai tum khah izoiin a nen riat tâk.

¹⁰A zoro a tluk tika lôntluk ranga Pathian thil lei rêl thlâm chu thilsiam murdi, rivân neh rinênga omhei murdi itêlzita Krista a lua siam hi a nit.

¹¹Ama roisak angkah taka thil tinrêng lôntluktu Pathian lungdo angkah takin Krista zârah a mihei inih rangin eini hih a ne lei inkung thlâm a, a ne irthlang tâk a nit.

¹²Eini Kristaa tûngna ringat masahei hi Pathian roinpuina inpâk rang ei nit.

¹³Nin saninringna Thurchi Ṭha, thutak nin riatah khan Pathian mihei nin hong nit a, Krista nin iam tâk a; khanchu, ama ta nin nit iti Rithla Rithiang inkung khan risin isian nin iom a nit.

¹⁴Nin Rithla dong khah Pathianin a mihei a înkung pêk khah la mûng ei ti iti khâmna a nit a, Pathianin a mihei chu zalenna rikip la pêng a ti iti a nen riatna a nit. A roinpuina chu inpâk ei ti u.

¹⁵Khasikin, kei khomin Pumapa Jisua nin iamna neh Pathian mihei murdi lung nin thlungzia khah ki lei riatin,

¹⁶ki ṭongṭainaheiah nangni ki riat mai ngai a, nangmani sikin bâng loiin Pathian ziangah lômthu ke sîr ngai a.

¹⁷Ei Pumapa Jisua Krista Pathian, roinpuina Pa khan, ama riatna lamah vârna neh riatthiamna Rithla nangni peh riseh.

¹⁸Khanchu, nin lungril mithei invârin om sela, nangni a koinaa tûngna om hei, mi rithianghei neh nin richon lua rang roinpui tamzia hei,

¹⁹keini â iamhei lâia a sinthotheina lianzia mong tik nei loia sin a tho rikhêlzia hei khah nin riat theina rangin kî ngên ngai a nit. Hi sinthotheina keimania sinitho mai hih ritha lian,

²⁰Pathianin thina rithoka Krista a kâiithoia, rivân rama a changtiang ân ṭhungna ritha ngir khah a nit.

²¹Krista chu inlalna hei, thuneina hei, roirêlna murdi hei, hi rammual neh rammual la hong iom ranga riming isak tinrêng chung vitah ai sia tâk a nit.

²²Khante, Pathianin thil tinrêng Krista ke nuaiah a sia a, ani chu thil tinrêng lu tak rangin koindanghei ziangah ai pêk tâk a nit.

²³Koindang chu Krista takpum a nit, tinrênga tinrêng inrikiptu rikipna kha.[1]