Read Biete EFESI 2 Bible Online

EFESI 2 - Biete bible

EFESI 2

¹Zoro thlengah khan chu nin thu zômnona neh nin sualnahei sikin rithla tiang â thi nin nit a.

²Kha lâiah khan chu rammual dân angkah hin nin om a, boiruaka thuneituhei ilal, atûna Pathian thu zôm inohei lâia sinitho mai rithla thu thun nin iom a nit khah.

³A dik takkan eini khom ei rêngkan anmani angkan ei iom a nit, ei taksa rizuknahei rizûlin ei om a, ei taksa lungbôk neh ei lungril lungdo ei isin ngai a nit. Mi danghei angkah ngirin Pathian ningthikna tuang rang piala inzir ei nit kha.

⁴Nikhomsela, Pathian lungkhamna chu a lian a, lung a ne thlungna chu ân thûk tak tak a,

⁵ei siatnahei sika rithla tiang â thi ei nit lâiah khan Krista neh a ne înring tâk a nit. Pathian lungkhamna sika saninring nin nit.

⁶Krista Jisuaah khan a ne kâiithoi a, rivân ramah ama ziangah a nen ṭhung tâk a.

⁷Krista Jisuaa ei chunga a lungkhamna hin zoro la tlung nôk mai rangheia rang khom a lungkhamna lian bîk zia a zuang înlang tâk a nit.

⁸Iamna sika lungkhamnaa saninring nin nit, amakhah nangmania rithoka suak ni mak e, Pathian thilpêk a nit.

⁹Sintho sik ni mak e; khanonchu, mîn song an ti.

¹⁰Pathian kut suakhei ei nit, Krista Jisuaah khan sin iṭha tho ranga a ne isiam a nit, kha sin iṭha tho khah ei om dân ranga Pathian lei înrifûk pial a nit.

¹¹Nangni hi nin inzir ata Jentail, taksa kuta “Sertan,” Judahein, “Sertan ino,” nangni an iti ngai kha;

¹²kha lâiah khan chu Krista la nei mak chei a, Pathian mi rithlanghei ata mi ran nin nit a, Pathian ṭonginkunga thuthlung putianga mi nin nit a, hi rammualah hin tûngna nei ino neh Pathian tak reh loiin nin iom ngai khah remai rei.

¹³Nikhomsela, atûn chu Krista Jisuaah khan, nangni ilah taka om ngaihei khah, Krista thina sikin innâiin nin hong om tâk a.

¹⁴Krista chu ei ringeina a nit. Ani khan Judahei neh Jentailhei hih pumkhatkan a ne siam a, ei inṭhenna ngai neh ei irâl richangna ngai ritûrna banglâi khah ama takpum ngêiin â sim tâk.

¹⁵Ani khan Dân thupêkhei neh tliabalamhei murdi khah ân boi a, eimani neh anmani hi amah-ah khan miriam ithar, pumkhatkan a ne siam a, ringeina a zuang ithlun tâk a.

¹⁶Krosa a thina sikah khan ritûrna khah ân boi a, Jentailhei neh Judahei khah pumkhatka hong ichangin, Pathian neh a nen ringei tâk a.

¹⁷Khante, Krista a zuangah khan nangmani ilah taka omhei ziangah ringeina Thurchi Ṭha â sîr a, inâi tenga om keimani ziangah khom Thurchi Ṭha kha â sîr a.

¹⁸Krista zârin Judahei neh Jentailhei ei rêngkan Rithla khatkan Pa ziangah ei ilût thei tâk a nit.

¹⁹Khaangkan, atûn chu ram dang mi neh khualmi ni khâi mak chei a, mi rithianghei neh khan bungtualbôm neh Pathian insungmihei nin nit tâk.

²⁰Tirtônhei neh zânthlahei lungphûm chunga sininding nin nit, kha lungphûma a kila lung kâmiomtak chu Krista Jisua hih a nit.

²¹Kha in khah a pumin amah-ah khan sininding a nit a, Pumapa ta ranga Tempil rithiang a hong ichang tâk a nit.

²²Nangni khom amah-ah khan mi danghei neh, Rithlaa Pathian omna in ranga sininding nin nit.