Read Biete EFESI 3 Bible Online

EFESI 3 - Biete bible

EFESI 3

¹Hi sikah hin nangni Jentailhei ta ranga Krista Jisuaa mi tâng, keimah Paula hin Pathian ziangah kî ṭongṭai a nit.

²A lungkhamna sikin Pathianin nin ta ranga hi sin itho rangin a ne înkol a nit iti hih lei reh ngêt tâng nin ti.

³Pathianin a lungdo rithup khah inlârnaah khan a ne înriat a nit. Kha thu khah itôitekkan ki lei riziak tâk a;

⁴kha ki irziak khah nin tepin chu Krista thu rithup khah ki riat infel tlia khom reh thei nin ti.

⁵Zoro thleng tâkah khan chu hi thurithup hih miriamhei inria ni ngai mak a; nikhomsela, atûn chu Pathianin a tirtôn rithianghei neh a zânthlahei ziangah Rithlan a înriat tâk a nit.

⁶Thurithup chu amahih a nit: Thurchi Ṭha sikin Krista Jisuaah khan Jentailhei khom, Judahei neh munka richon iluapui ranghei, takpum khatka om ranghei, ṭonginkung itlângpui ranghei an nit thu hih a nit.

⁷Pathian lungkhamna thilpêk bîk a nen dong sikah hin, a sinthotheina mangin kha Thurchi Ṭha sinithotua siam chu ki nit.

⁸Keimah hi Pathian mi murdihei lâia a chîntak nêka chîn ual ki nit; khan khoma Pathianin Jentailhei zianga Krista richong tlia suisuak thei ino Thurchi Ṭha sîr rang neh,

⁹Pathian, tinrêng isiamtu zianga kumtluang ata ithupa om, hi a roisak rithup hih mi murdi zianga inlang ranga iphun ki nit.

¹⁰Pathian vârna inthûkzia hi, koindang sika hin, rivân muna inlalnahei neh thuneinahei ziangah atûn inria a nit theina rangin;

¹¹kumtluang ata a lei înkung thlâm tâk dungizuiin ei Pumapa Jisua Kristaah lo a zuang intluk tâk a.

¹²Kristaah khan, amah ei iamna sikin ihâi tak neh ingam takkan Pathian makungah ei ife thei tâk a nit.

¹³Khasikah khan, nangmani ta ranga ki tuangnahei sikah hin nin zâminrizal loi rangin nangni kî ngên a nit, khahei khah nin roinpuina rang rong a nit.

¹⁴Hihei sikah hin Pa, rinêng neh rivâna insungkua tinrêng riming riputna makungah khan,

¹⁵rikhûk idilin ki îkhûn ngai a nit.

¹⁶Ama Rithla zâra nin sungril tiang ringnun inrâtna rangin a roinpui richongna ata sinthotheina nangni a pêkna rangin Pathian ziangah ki ngên ngai.

¹⁷Khabanah, iamna sikin Krista chu nin lungrilah a om theina rang neh lungthlungnaah khan rizung itlaa, ringatna lungphûma nei a,

¹⁸mi rithiang murdihei neh khan a lungthlungna rizatzia hei, a seizia hei, arsângzia hei neh ân thûkzia hei riat theina ritha nin nei theina rangin ki ngên sa ngai.

¹⁹Krista lungthlungna reh zoi zât ino khah riang nin ta, Pathian rikipna tinrênga insip hong nîng nin ti.

²⁰Khaangkan, a sinthotheina ritha eimania sin mai sika ei nî ban neh ei ingaitua phâk ban ithotheitu Pathian ziangah khan

²¹kumkhuantluangkan, suanpâr murdi dênin, koindangah neh Krista Jisuaah khan roinpuina om riseh. Amen.