Read Biete EFESI 4 Bible Online

EFESI 4 - Biete bible

EFESI 4

¹Pathianin nangni a koi lam angkah taka om rangin keimah, Pumapa sika mi tâng hin nangni kî ngên a nit.

²Tiklâi khomin ringaitlômna hei, ringaichînna hei neh tuangtheina hei nei mai ngai rei. Ituangpui risakin nin lungthlungna inlang rei.

³Ringeinaa pumkhatka nangni khuap, Rithla nangni ipêk inpumna khah idôn mai rangin zâltak song rei.

⁴Tûngna khatka nei ranga ikoi nin init angkah takin, takpum khatkah neh Rithla khatkah bang a om a.

⁵Pumapa khatkah, iamna khatkah, baptisma khatkah;

⁶mi murdi Pa neh Pathian khatkah bang ai om a nit. Ani chu tinrêng chungah a om a, tinrêng arfang suak a, tinrêngah ai om a nit.

⁷Khanchu, Krista lungkhamna thiltlongpêk kha inrupbakah chitin ei sikah a ne ipêk a nit.

⁸Pathian Thubûn, “Chungtiang a hang fe lâiah khan, Imanhei itam takkah a ṭhui a; Miriamhei ziangah khom thilpêkhei a pêk,” ai ti angkah khan.

⁹“Chungtiang a hang fe” iti hih itinâm ai nit? Rinêng mun innuai takah a zuang ṭum bak itina a nit.

¹⁰Tinrêngah a om rikip theina rangin, a zuang iṭum ngir khah rivân chung bana hang ife nôk tâkah chu a nit.

¹¹Miriamhei zianga thilpêk ipetu chu amah a nit, mi ṭhenkah tirtôn rangin, ṭhenkah zânthla rangin, ṭhenkah Thurchi Ṭha sîrtu rangin, ṭhenkah koindang enkoltu[2] neh minriseitu rangin ai phun a nit.

¹²Khaangkan, Pathian mihei siaminṭhana rang sinthonaa rimang rang neh Krista takpum siaminlianna ranga ai phun a nit.

¹³Amakhah ei rêngkan iamna khatkah itua, Pathian Naipa riatna ei nei a, hong ipuitling a, Krista rikipna tluka rikip ei hong nit theina rang a nit.

¹⁴Khanchu, vârrilet takka an milak mang sika mi ṭhuiinvâi ngaihei, inriseina dikino sika tuilian ifen neh ithli isêm inlêng ki kêng naipang môlrimit ni khâi no min e.

¹⁵Khanêkan, lungthlungnaa thutak isîrin, lam tinrêngah Krista tiang thuar thei ei ti; Krista chu Lu a nit.

¹⁶Takpumpui chu amah-ah arngat a, ritharui neh rurbun tin sin tho sikin iṭanghei murdi ribu khômin, takpum iṭang tin kha an tho rang itho chitin an omin chu, lungthlungnaa thuarin an irfâ inlian ngai a nit.

¹⁷Khanchu, amahih nangni rilin, Pumapa rimingin nangni ki înriat a nit: Sanonghei[3] angkan om khâi no rei, khahei ingaitua khah chanlamboi a nit a,

¹⁸an lungril khom izînga om a nit. An sêt sik neh an lungril khir sikah khan Pathian ipêk ringnaah khan rangtum nei mak e.

¹⁹Izak nachâng khom reh khâi mak a, hurna neh thil inim tinrêng an nuam dôra tho rangin an ripêk tâk a.

²⁰Nangni chu Krista riseitu nin nit a, khangkana om rang ni mak chei.

²¹Ama thu nin riat a, ama nungizuituhei angkan Jisuaa thutak iom khah inrisei nin nit tâk a.

²²Khasikin, taksa rizuknan a îsiat tâk nin om dân masa, miriam ilui khah lîp pai ta rei.

²³Nin lungril neh nin lunginṭong hong thar ngêt sela,

²⁴thutaka suak, dikna neh rithiangnaa Pathian ri-angpuia siam miriam itharah khan rithluk ngêt rei.

²⁵Khanchu, milak itho bâng unla, Krista takpuma mi ei nit korong sikin mahni iampuihei ziangah thutak bang ril rei.

²⁶Nin ning a thik khomin, kha nin ningthik khan sualah nangni ṭhui inlût no sela, sûn nithlâkin ning inthik no rei.

²⁷Diabola kha zoron ṭum peh no rei.

²⁸Inru tho ngaitu khan tho khâi no sela, mahni kut ngêta thil iṭha thon sôl riseh; khanchu, risamhei a sem rang khom ai nei thei rang a nit.

²⁹Thu ṭha no rêng rêng nin bâiah suak no riseh, mi siam inṭha thei rang bang nin bâia rithokin suak riseh; khanchu, arngaituhei ta rangin lungkhamna hong nîng a ti.

³⁰Khante, Pathian Rithla Rithiang khah ngaisiat sak no rei; Rithla khah ritlanna nikhua rangin ama ta nin nit ngêt iti Pathian nangni richikna a nit.

³¹Ritûrna hei, ningmurna hei, ningthikna hei, rângna hei, sîrinsiatna murdi hei nangmania rithokin pai riai rei, sualna tin tin neh.

³²Khanêkan, lungrikhamin neh rikan risak unla, Pathianin Krista sika nangni a îzâ angkah khan rizâ risak rei.