Read Biete EFESI 5 Bible Online

EFESI 5 - Biete bible

EFESI 5

¹Pathian nai lungthlunghei nin nit tâk sikin ama ang rangin nin tum ngêt rang a nit.

²Kristan lung a ne thlunga, Pathianin ai lôm ngai namhoi thillan neh ribôlna inih ranga ei ta ranga a irpêk angkah khan lungthlungna izêkin om rei.

³Pathian mihei nin nit tâk sikin riditna thu hei, rithiangnona thu hei, kuatinkamna thu hei rêng rêng nin lâiah isâm khom nin sâm rang ni mak.

⁴Bâingal hei, thu chanlamboi hei, thuzer porinche hei khom nin mang rangin rihoi mak e; khahei nêkan Pathian ziangah lômthu sîr ual rei.

⁵Ridi songhei, mi pualoihei, kuatinkamhei (kuatinkam chu mirmil ibia a nit) rêng rêngin Krista[4] neh Pathian ramah khan rangtum zel nei no nih iti reh rei.

⁶Tutên thu chanlamboiin nangni lêm no riseh; kha thil sik takah khan Pathian ningthikna khah ama thu zôm inohei chungah ai tlung rang a nit.

⁷Khasikin, kha mihei neh khan îte rimanna nei no rei.

⁸Nangni khom izîngah nin lei om ngai a; nikhomsela, Pumapa mihei nin hong nita rithokin chu ivâra omhei nin nit tâk hih, ivâra omhei angkan nin om ngêt rang a nit.

⁹Ṭhatna hei, felna hei neh thutak hei tinrêng irâ suak hih ivâr chu a nit.

¹⁰Pumapa lômrua khah im ai nit iti irianfel tum rei.

¹¹Khante, izînga omhei sintho mangmunboiah khan kop tlak no rei; ikop nêkan an idik nozia inlang ngai rei.

¹²Inrûkka an sintho ngaihei kha chu â sîr khom izak ai om a nit.

¹³Thil tinrêng ivârin a elin chu a nitna tak ifel takkan â lang ngai;

¹⁴ifel takka inlanga om tâk kangân chu ivâr a nit. Kha sikah khan kêng Pathian Thubûn, “Nangmah â in, har inla, Thina rithokin thoi roh, Khanchu, Kristan nang elinvâr a ti,” ai ti kha.

¹⁵Khasikah khan, nin om dânah ridîn rei, mi intlohei angkan om loiin, mi vârhei angkan om rei.

¹⁶Nikhuahei hih a ṭhat khâi no sikin, zoronṭum nin ineihei khah mang inṭha ta rei.

¹⁷Khasikin, intlo no unla, Pumapa lungdo im ai nit iti irethiam tum rei.

¹⁸Uain inruiin om no rei, amakhah siatna bul a nit; khanêkan, Rithlan sip lem rei.

¹⁹Inpâkna la hei, Pathian la hei, rithla tiang la hein risôn ngai unla; nin lungril takin Pumapa inpâkna la sakin zâi rei.

²⁰Ei Puma Jisua Krista rimingin tiklâi khomin îtinrêngah Pa Pathian ziangah lômthu isîr mai ngai rei.

²¹Krista marit nin thona sikah khan ribilriam risak rei.

²²Nupuihei khomin Pumapa thu nin iôi angkan nin pasalhei ziangah nin ribilriam rang a nit.

²³Krista chu ama takpum, koindang saninringtu a nit a, koindang lu ai nit angkah hin pasal chu a nupui lu a nit.

²⁴Krista ziangah koindang a irbilriam angkan, nupuihei khom tinrêngah an pasalhei ziangah an ribilriam rang a nit.

²⁵Pasalhei o, nin nupuihei lungthlung rei, Kristan koindang lung a thlung a, an rithûla a irpêk angkah hin;

²⁶koindang khah thu neh tuia risûnfâia thârinrithiang rangin Krista chu amah arpêk a,

²⁷koindang roinpui tak, inim kop ino neh zûr ino, khangkana thil tluknona dang rêng rêng iboi, rithiang neh demnaboi ama ta ranga inding rangin a irpêk a nit.

²⁸Khaangkan, pasalhei khan mahni takpum lung an ithlung angkan an nupuihei lung an thlung rang a nit. Mahni nupui lungithlungtu chu amah lung a irthlung a nit.

²⁹Tutên mahni takpum nel ngai mak, Kristan koindang â fa a, ai donsui ngai angkah hin a enkol ngai;

³⁰eini khom a takpum iṭanghei ei nit sikin.

³¹Pathian Thubûn, “Khasikah khan ipân a nu neh a pa mâng a ta, a nupui neh inrual an ta, an ruaikan takpum khatkah hong ni tâng an ti,” ai ti a nit.

³²Amahih thu inril inthûk tak a nit, keiman chu Krista neh a koindang thu â sîrna a nitin ki riat.

³³Nikhomsela, nangni tiang khom imang thei a nit: Nin lâia tukhomin mahni lung a irthlung angkah takin a nupui lung a thlung rang a nit, nupui khomin a pasal marit a tho rang a nit.