Read Biete EFESI 6 Bible Online

EFESI 6 - Biete bible

EFESI 6

¹Naipanghei, Pumapaah khan nin nu neh nin pahei thu zôm rei, amakhah thil dik tak a nit.

²“Ni nu neh ni pa ngîk roh,” iti hih thupêk lâia ṭonginkung nei masa tak a nit.

³“Khanchu, ni ta rangin ṭhâng a ta, rinêngah ni dam sôt a ti,” iti a nit.

⁴Khante, nangni nu neh pahei, nin naihei ning inthik no unla, Pumapa inriseinaah neh isôinaah enkol lem rei.

⁵Suakhei, Krista thu nin izôm angkan lungril idik tak riputin, iṭi neh inthing pumin taksaa nin puhei thu zôm rei.

⁶Miriam inlôm itumtuhei angkah paia an mitmu ringota zôm ni loiin, Krista suakhei nin init angkan lungril takin Pathian lungdo sin unla,

⁷miriam sin itho ringot ni loiin Pumapa sinitho nin nit sa sikin ilôm takkan sintho ngai rei.

⁸Suak khom, suak nino khom, mi tin sin iṭha an isin angkah takin loman Pumapa ziang ata an imu chit rang a nit iti nin riat a.

⁹Khante, nangni ruaituhei, khangkah ngirin nin suakhei chungah khom tho rei. Anmani neh nangmani ruaitu khah rivânah a om iti neh, ani khan thleibîkna nei mak iti irian, ingo song no rei.

¹⁰A nungkhôn takah khan Pumapa neh a sinthotheina lianah khan nin ritha inding rei.

¹¹Diabola thlêmna nin idan zoi theina rangin Pathian râlthluk rikipin rithluk rei.

¹²Ei irbuanpuihei hih taksa neh thisen ni mak a, inlalna hei neh thuneina hei, hi rammual izîng chunga roirêltuhei neh rivân muna rithla sual iomhei kha an nit.

¹³Khasikin, Pathian râlthluk rikipah khan rithluk ta rei. Khanchu, nikhua ṭha no a hong tlung tikin irâlhei ritha song khah idan zoi nin ta; nin idan zoi nung khomin la ding thei mai nin ti.

¹⁴Khanchu, idet takkan iding unla, nin kong chu thutaka khitin, felna khah ṭângiphon mang rei.

¹⁵Ringeina Thurchi Ṭha inpuang ranga risiam diamna khah pheikokin ribun rei.

¹⁶Zorotin iamna khah ipho angkan chôi unla, amakhan mi sual thal kâp ichok thei murdi khah that thei nin ti.

¹⁷Saninringna khah lukhumin khum unla; Rithla khandai, Pathian thu khah chôi rei.

¹⁸Ṭongṭai mai unla, Pathian ziangah sanna ngên mai unla, tiklâi khomin Rithlân nangni â ruai lam takkan ṭongṭai ngai rei. Kha sikah khan ringai ving unla, nin ṭongṭainaah khan mi rithianghei murdi ta rangin chât loiin ngên ngai rei.

¹⁹Thurchi Ṭha thu rithup ihâi takka inpuang ranga thu ki dong theina rangin kei khom ne ṭongṭai pêk sa ngai rei.

²⁰Atûn tâng inah om khom inlang, Thurchi Ṭha palâi ki nit. Thurchi Ṭha sîrna lamah khan thu ke sîr rang khah ihâi takka ke sîr theina rangin ne ngên pêk ngai rei.

²¹Pumapaa suapui lungthlung tak neh sinthotu iamom tak Tukika hin, ki thurchi nin lei riat theina rangin a rêngkan nangni ril a ti.

²²Ki thurchi nangni ril rang neh nangni thorinhar rangin ani hih ki hong itir a nit.

²³Pa Pathian neh Pumapa Jisua Krista ziang ata ringeina hei, lungthlungna hei, iamna hei chu suapuihei murdi ziangah om riseh.

²⁴Ei Pumapa Jisua Krista ṭuai loia lung ithlungtu murdi ziangah lungkhamna om riseh.