Read Biete FILIPI 1 Bible Online

FILIPI 1 - Biete bible

FILIPI 1

¹Paula neh Timothea, Krista Jisua suakhei hin, Krista Jisuaa mi rithiang Filipi khuaa om murdihei, koindang ruaituhei neh sinthotuhei chibai kin bûk.

²Pathian ei Pa neh Pumapa Jisua Krista ziang ata lungkhamna neh ringeina nin ziangah om riseh.

³Nin thurchi ki ngaitua ikipah ki Pathian ziangah lômthu ke sîr ngai a,

⁴tiklâi khomin nin rêngka ta ranga ki ṭongṭai ikipah ilôm takkan kî ṭongṭai ngai a nit;

⁵sûn masa taka rithokin atûn tenan Thurchi Ṭha puang indarna sinah nin ne la thlop mai sikin.

⁶Nangmania sin iṭha iphuttu Pathian khan Jisua Krista Nikhuaa ân rikip idênin sin mai a ti iti kî iam ngit a nit.

⁷Nangni ker ngai tak tak ngai, Pathianin hi dongtum a ne ipêk Thurchi Ṭha ihoi rang neh idet takka inding ranga ki sinthonaah, tâng inah ki om lâi neh ki suak zoro khomin nin ne san mai ngai sikin ki lungrilah nin om mai a, nin rêngka chungah khangkana lungril riput rang pial khom ki nit.

⁸Krista Jisua lungril ki nei sikin nin rêngkan nangni kî kan tak tak a nit iti Pathian ne repuitu a nit.

⁹Nin lungthlungna khah riatnaah neh munfel theinaah a thuara a pung ual ual theina rangin kî ṭongṭai ngai a nit.

¹⁰Khanchu, thil iṭha bîkhei khah rithlang thei nin ta, Krista Nikhuaah khan rithiang neh sêlnaboi hong nîng nin ta,

¹¹Pathian roinpuina rang neh inpâkna ranga Jisua Krista zâra felna râ khan hong sip nin ti.

¹²Suapuihei, ki chunga thil itlunghei khah Thurchi Ṭha indarna rang a lei nit iti nin riat kî nuam a nit.

¹³Ki rên bunhei hih Krista sik a nit iti rêng in vêngtuhei murdi neh mi danghei murdi khomin an riat tâk.

¹⁴Suapui itam takkahei khomin ki rênbun sikin Pumapa an lei iam indet ual a, ṭi loiin Pathian thu khom an ril ngam tâk a.

¹⁵Mi ṭhenkan chu rithîkna neh rinarsana sik khomin Krista thu an ril ngai a, ṭhenkan chu lungril iṭha tak riputin an ril ngai.

¹⁶Khahei khan chu Thurchi Ṭha dikzia inlang ranga inkung ki nit iti rian lungthlungna sikin an iril ngai a nit.

¹⁷Ṭhenkahei khan chu ti titak loiin, rinarsana sik ringotin neh ki rênbun chungah hin ngaisiatna ne bôk pêk itumin Krista thu an iril ngai a nit.

¹⁸Ite inkhôk mak e, a lemin manih, a takin manih, ingkah lam khomin Krista thu iril ai nit hih ki lôm a, la lôm mai ki ti.

¹⁹Nin ne ṭongṭai pêkna sik neh Jisua Krista Rithla ṭangpuina sikin san isua nîng ki ti iti kî riat a nit.

²⁰Ki irzuk tak neh ki tûng ngit chu, ingkah khomin mualinphoi loia, ihâi takka îzoroah khom, atûna ṭum khomah hin, ki thi le ki ring le ki takpuma Krista chôiinrisâng hi a nit.

²¹Keima ta rangin chu iring hi Krista a nit a, ithi khom inlâpna a nit.

²²Nikhomsela, ki la ring maiin chu irâ sua sin thona nîng a ta; a îhîm ker thlang rang reh mang e.

²³Kâirilângin kî om a nit. Hi ringnun hih iman Krista ziangah om tan lang ker zuk tak tak, amakhah a ṭhat ual iti ki riat.

²⁴Khannisela, nangmani sikah hin ki lai ring mai hih ai nang ual a nit.

²⁵Nin rêngkan iamnaah nin thuarna rang neh nin lômna arsâng thei ualna rangin la ring mai ki ti iti ki riat a, kî iam ngit a nit.

²⁶Nin ziangah ki hong nôk tikin chu keima sikin Krista Jisua kha roinpuina la peh nôk ual nin ti.

²⁷Îkhom ni sela, nin omdân chu Krista Thurchi Ṭha neh rime ngêt riseh, Khanchu, nangni ki hong vêl khoma, nin ziangah ki omno khoma, rithla munka ngîr ngitin, lungril munka Thurchi Ṭha iamna thu thlopa zâltak isongin nin om iti nin thurchi lei reh thei ki ti.

²⁸Îlamah khom nin irâlhei khah ṭi no unla, ihâi takkan om mai rei; amakhah anmani ta rangin armang rang an nit iti inriatna fel nîng a ta, nangmani ta rangin chu saninring rang nin nit iti inriatna fel nîng a ti; khah khom khah Pathiana rithok a nit.

²⁹Krista nin iiam bang ni loiin, ama sika tuang rang khomin iphal nin nit.

³⁰Ridoina kî tong nin imu ngai, atûn khom ki tong mai iti nin iriat khah nangmani khomin nin itong sa tâk a nit hi.