Read Biete FILIPI 2 Bible Online

FILIPI 2 - Biete bible

FILIPI 2

¹Kristaa nin ringna khan nangni ân rât a, a lungthlungna khan thlangamna nangni a pêk a, Rithla pôlna nin dong a, rikanna neh lungrikhamna nin nei tâk a.

²Khasikin, lunginrual takka lungrithlung risaka omin, inpuma lungril khatka riputin, ki lômna inrikip rei.

³Marangṭhat neh ringaiinlûtna neiin îte sin no unla, tukhomin ringaichînna neiin, mahni nêka mi dang iṭha ualin be seng rei.

⁴Mahni ṭhatna rang bang zong loiin, mi dang ṭhatna rang khom zong rei.

⁵Hi lungril, Krista Jisua om hih nangmaniah khom om riseh.

⁶Ani chu Pathian nitna neia om mai a nit a; Nikhomsela, Pathian itluka om mai khah itum ngit rangin ringai mak a,

⁷Mahni ringaiintlômin suak angkan arsiam a, Miriamhei angkana zuang inzirin, Miriam angkan a zuang om a;

⁸Ringaiichîn takkan a om a, Thina dên rakkan thu a zôm a, Krosa a thina ngêi kha.

⁹Khasikah khan, Pathianin ani chu a chôiinrisâng tak tak tâk a, Riming tin tin lâia riming inchungtak a pêk tâk a.

¹⁰Jisua rimingin mi tin, rivâna mihei, rinênga mihei, rinêng nuaia mihei khom A makungah rikhûk dil an ti.

¹¹Pa Pathian roinpuina rangin ilei tinrêngin, “Jisua Krista chu Pumapa a nit,” itin inpuang an ti.

¹²Khanchu, suapui lungthlunghei, ki om lâia thu nin izôm ngai nêkah khan, atûn ki om no kâr khomah hin nin zôm nôk ual ai nang a nit. Pathian iṭi neh inthing pumin nin saninringna inrikip rangin sin mai rei.

¹³Ama lungdo isin nuam rang neh isin thei ranga nangmania sin ithotu chu Pathian a nit.

¹⁴Riphunna neh risêlna boiin thil tinrêng sin rei.

¹⁵Atûnlâi mi, helâkloi neh pualoihei lâiah hin Pathian nai, sual nei ino, rithiang liai, sêlnaboi nin nit theina rangin. An lâiah ringna thucha nin lan tikin rammual elinvârtu angkan ilang rei.

¹⁶Khanchu, Krista Nikhuaah khan ki song ranghei nîng nin ta, môk itlânin itlân mang a, môk sôlin sôl mang iti ilang tâng a ti.

¹⁷A nit, nin iamna sinthona neh ribôlnaah khan keimah hi ilanin om rang khom inlang lôm ki ti, nangni khom nin rêngkan nangni lômpui sâng ki ti.

¹⁸Khangkah ngirin, nangni khom lôm unla, ne lômpui sa rei.

¹⁹Khante, nin thurchi ki riat a, ke lung arngam theina rangin, Pumapa Jisuan ṭha a tin chu nin ziangah Timothea hong itir viak thei rangin ki tûng.

²⁰Iṭha takka keima angkana lungril taka nangni rivoi chu amah bang hi a nit.

²¹Mi danghei chu Jisua Krista ta rang ngaitua loiin, mahni ta rang bang an zong ngai a.

²²Khannisela, ani hi chu ifiaa a om tâk tlia nin riat a, parfâka munka sin angkan Thurchi Ṭha puang indarna sin a ne ithopui ngai a nit kha.

²³Khaangkan, ki thurchi rang ki riat kaneh ani hih hong tir zel thei ki ti kî tûng a nit.

²⁴Pumapan ṭha a tin chu keimah reng khom hi ki hong viak thei lôiim kî tûng a nit.

²⁵Khante, ki suapuipa, ki sipaipui, ki sinthopui, nin tirtôn, ki irsam ne rukpui ranga nin hong itir Epafrodita hi nin zianga hong itir a nangin ki riat.

²⁶Ani hin nin rêngkan nangni arngai tak tak a, dam mak iti nin lei iriat kha ân khôk ai ti ok a nit.

²⁷Ithi rang dôra natinrika na chu a nit ngêi a; nikhomsela, Pathianin lung ân kham a, ani bang ni loiin, kei khom lung a nen kham a, ngaisiatna chunga ngaisiat nôkna tong loiin a ne siam tâk a.

²⁸Khaangkan, ani hih nin lei mua nin lômna rang neh, ki ngaisiat a raih theina rangin ki hong itir inrang ual a nit.

²⁹Ani hi Pumapa rimingin râiifân takkan lei lôm unla, hingkana mi hih marit tho rei.

³⁰Nin ner kamna tluk ban itluk rangin a ringna khom iroi loiin Krista sin a tho a, ithipui lôkkan a lei iom tâk a nit.