Read Biete FILIPI 3 Bible Online

FILIPI 3 - Biete bible

FILIPI 3

¹A nungkhôn takah chu suapuihei, Pumapaah lôm rei. Nin zianga thu ngaingir riziak nôk hih ki ta rangin changdong iom ni mak a, nin ta rang lakin rifena a om a.

²Uihei ata ridîn rei, thil ṭhano thohei ata ridîn rei, taksaa sertan iuarhei ata ridîn rei.

³Eini Pathian Rithla zâra Pathian ibia neh Krista Jisua song a, putiang taksa chunga iamna ringat inohei hih sertan dik chu ei nit.

⁴Nuam inlang chu kei khom taksa chunga iamna ringat thei kêng kî nit. Mi danghei rêng rêngin taksa chungah iamna ringatna neiin an riben chu keimah vâng chu ki irbe nôk ual a nit.

⁵Sun iriatka nî-a ser itan, Israel nama mi, Benjamina richia mi, Hebrai lâia Hebraian zir ki nit a; dân tiang chu Farisai ki nit,

⁶ṭhatnemringaina tiang chu koindang nuam ilo ngaitu ki nit. Dâna felna tiang chu sêlnaboi ki nit.

⁷Nikhomsela, kha thil, ki ta ranga inlâpna rang murdi khah Krista sikin ichânna kî be tâk a nit.

⁸Kha bang ni mak, ki Pumapa Jisua Krista riatna roinpui tak sikin thil tinrêng hi ichânna kî be tâk a nit; Krista khah ki nei theina rang neh amah neh pumkah kin nit theina rangin, ama sikin thil tinrêng ke chân riai a, khahei khah nimnok angkah paia kî be tâk a nit.

⁹Keima felna, dân zôm sika imu ngai khah nei khâi mang e. Atûn chu iamnaa ringat, Pathiana rithoka suak, Krista iam sika imu ngai felna khah kî nei tâk a nit.

¹⁰Ki nuam tak chu Krista iria a, a thoinôkna ritha ritem a, a tuangna rikoppui a, a thina ri-angpuia thi rang hi a nit.

¹¹Thina rithoka kâiithoina khah kei khom idong thei ranga tûngna neiin.

¹²Tenkung ki tlung tâk iti khom ni mang a, ki tluk tâk iti khom ni mang e; “Krista ne manna bi hih ki man thei lôiim,” itin rizûlin ki irzûl ual a nit.

¹³Suapuihei, â man tâkin lar be mang e; nikhomsela, hi thil khatkah hih ki tho ngai, nungtianga thil iomhei ringil a, matianga thil iomhei khah ibanin,

¹⁴Krista Jisua Pathian koina bi chungtianga loman imu rangin tenkung khah kî pan tên tên a nit.

¹⁵Khanchu, Rithlaa ûnlian tâk kangânin chu khangkana lungril riputin om ei ti; khan, lungril danglam riput nin om duai le khom Pathianin nangni lan riang a ti.

¹⁶Îkhom ni sela, ei phâk ten chit hih indikin, khantaka rithokah khan matiang fe mai ei ti u.

¹⁷Suapuihei, ki omdân riseituhei ni rei. Enton ranga keimani nin ne nei a, kin om dân angkana omhei khah uksak rei.

¹⁸An kalchôi dâna Krista kros irâl mi itam takkah an om iti nangni ki îril mai ngai kha, atûn khom ṭap pumin nangni ki îril nôk a nit.

¹⁹Khahei mongna kha chu rimangna a nit. An pathian chu an phûngpui a nit a, an roinpuina khom khah an mualinphoina a nit a, hi rammual thil bang hih an ngaitua ngai.

²⁰Eini chu rivân khua neh tuihei ei nit a, Saninringtu Pumapa Jisua Krista zuang rang khah ei ingâk mai a nit.

²¹Ani khan a sinthotheinan thil tinrêng ama richam chamin ân om thei a, kha ritha khan ei tlômlâi takpum hih ama takpum roinpui tak angkana om rangin siam inṭha nôk a ti.