Read Biete FILIPI 4 Bible Online

FILIPI 4 - Biete bible

FILIPI 4

¹Khasikin, ki suapui lungthlung tak neh ki irngai tak tak, ki lômna neh ki rênglukhum hei, khaangkah khan Pumapaah iding indet rei.

²Pumapaah khan lungril khatka ripuh rangin Euodi ki ngên a, Suntuki khom kî ngên a nit.

³A nit, nangmah, ki ringkol ribâtpui iamom tak, kha nupanghei khah iṭangpui rangin nang kî ngên a nit; anni khan Thurchi Ṭha puang indarnaah khan Klemena neh ki sinthopui dang ringna lekhabua riming ichuanghei neh khan zâltak an ne isongpui ngai a nit.

⁴Pumapaah khan lôm mai rei, ti nôk ki ti lôm rei.

⁵Nin lungrivuaizia mi murdi iriat ni riseh. Pumapa chu a nâi e.

⁶Îteah lunginkâng no rei; tinrêngah ṭongṭai neh inin lômthu ril sa maiin nin înkhôkhei khah Pathian ziangah ithlun mai ngai rei.

⁷Khanchu, Pathian thlangamna, miriam riatna murdi phâk ban khan nin lungril neh nin ngaituanahei khah Krista Jisuaah khan nangni vênginzôk pêk a ti.

⁸A nungkhôn takah chu suapuihei, â dik neh maritiom murdi, â fel neh arthiang murdi, iditiom neh a thang iṭha murdi, ṭhatna rêng rêng a om a, inpâk inrup a nitin chu, khahei khah ngaitua rei.

⁹Ki zianga rithoka nin irsei neh nin idong, nin iriat neh nin imuhei kha tho mai ngai rei. Khanchu, thlangamna Pathian khan nangni ompui a ti.

¹⁰Ki ta ranga nin ngaituazia khah atûn inâi sungah hin nin hong inlang nôk thei tâk sikin Pumapaah khan kî lôm tak tak a nit. Khangkana tho khah nin itum pial a nit a, zoro rifûk nin la mu no sika bang a nit.

¹¹Ker samna thu ril chu ni mang e; kei chu ingkah khomin om inlang lungitluk mai hi kî song tâk a nit.

¹²Inriang takka om dân ki thiam a, richong takka om dân khom ki thiam a; thil tinrêngah tiklâi khomin ikhop neh iṭâma om dân, inei neh risama om dân rithup khah ki riat tâk.

¹³Nen râttu Kristaah khan thil tinrêng kî sinthei a nit.

¹⁴Nikhomsela, ki dengtheinaa nin ne iṭangpui hih nin thon ṭhat tak tak.

¹⁵Khante, Thurchi Ṭha ke sîr phut lâia Makedonia rama rithoka ki suak lâiah khan, nangmani Filipi mihei banah chu koindang khatka lua khomin thil ipe neh idong lamah nê ṭangpui omak iti nangmani rengin nin riat a.

¹⁶Thesalonika ki om lâi khomin ker samna rikam rangin voikah bang khom ni loiin, voi nikah reng thilpêk nin ne hong ithon a nit kha.

¹⁷Thilpêk ringot izong chu ni mang e, nangmani ta ranga rithla tianga irâ pung rang khah kî zong ual a nit.

¹⁸Nin thilpêk murdi ki lei dong a, ki nei intam tâk; Epafrodita kuta nin thil hong thonhei khom khah ki lei mu a, ki nei inrup tâk, ki nang ban khom kî nei tâk a nit. Khahei khah namhoi thillan Pathian zianga ribôlnaa ilan, â ham inrup neh a lungdo a nit.

¹⁹Khante, ki Pathian khan Krista Jisuaa archongna roinpui taka rithokin nin risamna tinrêng nangni rikam pêk mai a ti.

²⁰Ei Pathian neh ei Pa chu kumkhuantluangkan roinpuin om mai riseh. Amen.

²¹Krista Jisuaa Pathian mihei murdi khah chibai ki bûk a. Ki zianga suapui iomhei hin chibai nangni an bûk.

²²Hintaka Pathian mihei murdîn chibai nangni an bûk a, Kaisara ina omhei hin nangni an ibûk ual bîk a nit.

²³Pumapa Jisua Krista lungkhamna khah nin rêngka chungah om riseh.