Read Biete KOLOSA 1 Bible Online

KOLOSA 1 - Biete bible

KOLOSA 1

¹Paula, Pathian lungdoa Krista Jisua tirtôn neh ei suapuipa Timothea hin,

²Kolosa khuaa mi rithiang iom Kristaa suapui iamomhei chibai kin bûk. Pathian ei Pa ziang ata lungkhamna neh ringeina nin ziangah om riseh.

³Nin ta ranga ṭongṭai maiin, Pathian, ei Pumapa Jisua Krista Pa ziangah khan lômthu kin isîr mai ngai.

⁴Krista Jisuaa nin iamna neh Pathian mihei murdi chunga nin lungthlungna khah kin lei riat a,

⁵Thurchi Ṭha thutak nin riat phuta rithoka tûngna nin lei inei tâk sika a nit a, kha tûngna khah nin ta rangin rivânah nangni an isia pêk ṭian a nit.

⁶Kha Thurchi Ṭha khan irâ sua maiin rammual pumpuiah a irzo thiai angkan nangni lâiah khom Pathian lungkhamna thu nin ringai a, a nitna tak nin riat nî-a rithokah khan chu irâ suan ai pung thiai tâk a nit.

⁷Epafra, kin suak champui lungthlung tak ata nin irsei kha a nit. Ani hih kin rithûla [1] Krista sin ithotu iamom tak a nit.

⁸Rithla zâra lungthlungna nin inei thurchi khom a ne îril a nit.

⁹Khasikah khan nin thurchi kin riata rithokin kin ṭongṭai mai ngai a, ama Rithla khan vârna neh riat theina murdi nangni pe a, Pathian lungdo riatnaa nin hong sip theina rangin Pathian ziangah kin ini mai ngai a nit.

¹⁰Khanchu, sin iṭha tinrênga irâ sua a, Pathian riatnaah khan ithuar tîr tîr a, lam tinrêngah amah inlôm ranga Pumapa lungdoa nin om theina rangin kin ingên ngai a nit.

¹¹A sinthotheina roinpui taka rithoka suak râtna khan lam tinrêngah tuangdiarna neh takritâina nei rangin nangni inrât a ti.

¹²Khanchu, mi rithianghei neh a ram ivâra richon idong thei sa ranga nangni siamtu Pathian ziangah khan lômthu isîr thei nin ti.

¹³Ani khan izîng sinthotheina rithoka ne kêlisuan, a Naipa lungthlung tak ramah khan a ne ṭhui inlût tâk a.

¹⁴Naipaah khan ritlan isua ei nit a, ei sualhei izâ a nit tâk.

¹⁵Krista chu mu thei ino Pathian angna nei, Nai lutîr, thil siam murdi maruaitu a nit.

¹⁶Amah-ah khan thil tinrêng, rivâna omhei, rinênga omhei, imu thei neh mu theiinohei hi isiam a nit a; rêngṭhungmunhei, roirêlnahei, inlalnahei, richamineihei, rammual pumpui hih ama sika isiam a nit a, ama ta ranga siam a nit.

¹⁷Krista chu thil tinrêng om man a om a, amah chu thil tinrêng ringatna a nit.

¹⁸Ani chu koindang lu a nit a, koindang hi a takpum a nit; ani chu takpum ringna nâr a nit. Thil tinrêngah ân chung tak a nit theina rangin ani chu nai lutîr a nit a, mithi lâi ata thoinôkna maruaitu a nit.

¹⁹Pathian rikipna tinrêng Naipaa om hih Pathian lungdo a nit.

²⁰Krista sikin tinrêng Pathianin amah neh ân ringei nôk a, Krosa a Naipa thisenah khan ringeina a siam a, Krista sikah khan rinênga omhei neh rivâna omhei khah Amah neh ringeina a siam tâk.

²¹Masah khan chu nangni khom Pathian ziang ata ilah vitah nin om a, thil isual nin ngaituaa nin sin ngai sikin â râlhei nin lei nit.

²²Nikhomsela, atûn chu a Naipa, taksa zuang ichang thina sikin a makungah rithiang neh demnaboi neh sêlnaboia nin om theina rangin Pathianin Amah neh nangni a înringei tâk a nit.

²³Khanchu, iamnaah om mai unla, idet takka dingin Thurchi Ṭha nin riat sika tûngna nin inei tâk ata khah rithîn paih no rei. Kha Thurchi Ṭha khah vânnuai thil tinrêng ziangah isîr a nit tâk; keimah Paula hi kha sinthotu chu ki nit.

²⁴Atûna nangmani sika ki tuangnaah hin kî lôm a nit. A takpum, koindang ta ranga Krista tuang banhei kha ki taksa hin ai sunzom mai a nit sikin.

²⁵Pathian thu neh a roisak nin zianga isîr inrikip rangin Pathianin sin a ne pêk a, koindang sinithotun a ne isiam a nit.

²⁶Kha Pathian thu khah suanpâr murdi ata kumkhuaka ithupa om ngai a nit a; nikhomsela, atûn chu a mi rithianghei ziangah ân lang tâk.

²⁷Kha mihei ziangah khan nam tin ta ranga a thurithup roinpui neh ilu tak chu Pathianin inria ai nuam pial a nit; kha thurithup kha Krista, nangmania om, Pathian roinpuina nin idong sa rang khah a nit.

²⁸Krista thu chu mi murdi ziangah kin inpuang a, Kristaah khan ṭhatrikipa Pathian makungah kin inngîr theina rangin vârna tinrêngin mi tin kin inrisei a, kin ikâiruai ngai a nit.

²⁹Khangkana inngîr theina rangin Krista râtna, keimania sinitho mai ngai khah imangin zâltak isongin kin isin ngai a nit.