Read Biete KOLOSA 2 Bible Online

KOLOSA 2 - Biete bible

KOLOSA 2

¹Nangmani neh Laodikei khuaa mihei neh taksaa ki mêl la mu nohei khomin, nin ta ranga sin zâl ki song tlia hih nin riat kî nuam a nit.

²An lungril kha thlangamin a om theina ranga lungthlungnaa munka an hong richin a, lam tinrêngah lungrila riatinfelna an nei a, Pathian thurithup, Krista chu, an hong iriat thei kî nuam a nit.

³Kristaah khan vârna neh riatthiamna richon ilu murdi chu a irphûm a nit.

⁴Tutên mur thiamna sika thu dik angkana lang, thu dik chu ni no manga nangni an lêm nona rangin amahih ki îsîr a nit.

⁵Taksan nin ziangah om no khomin lang, rithlan chu nin ziangah ki om a, nin felzia neh Krista nin iam detzia ki riatin kî lôm a nit.

⁶Khaangkan, Krista Jisua khah Pumapaa nin îpom tâk angkan amah-ah om mai rei.

⁷Amah-ah khan rizung inthûk thla unla, nin ringna khah ama chungah sininding unla, inriseia nin iom angkan nin iamnaah khan rât ual ual unla, lômthu sîrnan sip sa rei.

⁸Ridîn rei; khanonchu, Krista rithoka suak ni no, rammual inriseina rithla ṭhanohei ata suak, rammual vârna an iti, miriam thumâkhei imanga lêmna chanlamboi suakin nangni an siam duai lôiin.

⁹Kristaah khan Pathian rikipna tinrêng chu taksa neiin [2] ai om mai a nit.

¹⁰Ani chu inlalna neh thuneina murdi lu a nit a, amah-ah khan nangni khom ringna rikip ipen nin om tâk.

¹¹Kristaah khan sertan nin nit tâk, miriam kuta tan ni loiin, Kristaa sertan nin nit a, hi taksa sual sinthotheina rithokin kêlisua nin nit kha.

¹²Baptismaah khan Krista neh iphûm nin nit a, kha baptisma ngirah khan thina rithoka amah kâiithoitu Pathian sinthotheina nin iam sikin Krista neh kâiithoi nin nit.

¹³Masah khan chu nin sualna sik neh taksaa ser tan ino nin nit sikin rithla tianga thi nin lei nit a; nikhomsela, Pathianin atûn chu Krista neh nangni ân ring tâk a; ei sualna murdi a ne zâ tâk a.

¹⁴Ritângna lekha thupêka riziak, ei chunga om, ne kal khap ngai chu krosah khan ihêmden ân boi vang tâk.

¹⁵Krosah khan Kristan boiruaka roirêltuhei neh richamineihei khah inên, khahei khah mi tin mitmuah ifel takkan ân lang tâk.

¹⁶Khasikah khan, fâknêk thua manih, nikhua rithiang thua manih, thla thar ruaiṭhe thua manih, sabatnî ser thua manih tutên balam nangni khang pêk no riseh.

¹⁷Khahei kha chu thil la hong itlung rang rilim kah kêng ai nit, a tak chu Krista hi a nit.

¹⁸Takpum hi uksak loi rang, vântirtônhei khom ibeh rang itia inlârna danglam bîk imua sîr, taksa tak lungril riputa, chanlamboia ripâkhei khan thiamno nangni inchang tlak no riseh.

¹⁹Khahei khan takpum lu, Krista kha ituh khâi mak e. Krista enkolna nuaia takpum pumpui hi iṭha takka ritharui neh rurbuna khuap inrifomin ifâ a nit a, Pathian lungdo angkah takin takpum kha ai thuar ngai a nit.

²⁰Rammual inriseina dik inohei kha Kristaah nin ithi pêk tâk a nitin teh, îtho ranga rammual dâna ring angkana, miriam inriseina,

²¹“Inchâng no roh, ritem no roh, tôn no roh,” iti thupêk nuaiah nin irbil nôk tâk hi?

²²Khahei kha chu miriamhei isiam dân neh inriseina a nit a, mang zoia â boi rang a nit.

²³Hi vântirtôn ibia iti manih, takpum uksak loi rang iti manih hi itho rua takin â lang a; khannisela, taksa rizukna nêna rangin chu îte arfena omak e.