Read Biete KOLOSA 3 Bible Online

KOLOSA 3 - Biete bible

KOLOSA 3

¹Krista ziangah kâiithoi nin nit tâk a; khasikin, rivâna, Pathian changtianga Krista rêngṭhungmuna om, thilhei khi zong rei.

²Chungtianga thil iomheiah khan nin lungril ringat ngit unla, rinênga thilheiah khan chu ringat no rei.

³Nin thi tâk a, nin ringna khah Pathianah khan Krista ziangah ithupin ai om tâk a nit.

⁴Nin ringna tak chu Krista a nit a, amah a zuang inlâr tikin chu nangni khom a ziangah roinpui takkan inlâr sa tâng nin ti.

⁵Nin rinêng chung rizukna, riditna ṭhano hei, rithiangnona hei, hurna hei, rizukna sual hei, kuatinkamna hei, (kuatinkamna hih mirmil biakna a nit) hih nin that ngêt rang a nit.

⁶Kha thilhei sikah khan kêng a thu zôminohei chungah Pathian ningthik ai tlung rang a nit.

⁷Matonah khan chu nangni khom khangkanah khan nin om a, nin nuamlam tak a nit ngai a.

⁸Nikhomsela, atûn chu ningthikna hei, ningmurna hei, rimumâkna hei, risîrinsiatna hei, bâingal hei hih nin ima ngêt rang a nit.

⁹Rilêm risak no rei, miriam ilui chu a sinthohei neh nin khek a;

¹⁰miriam itharin nin rithluk tâk a. Pathian rianfel rangin kha miriam ithar khah â siamtu anga om ranga siamintharin ai om thiai mai a nit.

¹¹Kha ringna tharah khan chu Grik neh Juda, sertan neh sertan no, môlmahei, miriam iselhei, suakhei neh suak ninohei ithleina om khâi mak e, Krista bang hi tinrêng a nit a, tinrêngah ai om a nit.

¹²Khaangkan, Pathian mihei nin nit tâk; lung nangni a thlunga, a mi inih rangin nangni a irthlang a nit. Khasikin, khorngaina hei, lungkhamna hei, ringaitlômna hei, ringaichînna hei, takritâina hein nin rithluk ngêt rang a nit.

¹³Tukhomin tu chungah khom thu inkhôk nin neiin â tuang ithiamin rizâ risak rei. Pumapan nangni a îzâ angkan nin rizâ risak rang a nit.

¹⁴Khahei murdi chungah khan lungthlungna ribel unla, amakhah thil tinrêng inrual taka â têl inrichin thleptu a nit.

¹⁵Kristaa suak ringeina khan nin lungrilah roirêl sela, takpum khatka om ranga Pathianin nangni ai koi a nit sikin lôm nachâng khom reh rei.

¹⁶Krista thu chu archongna murdi neh nangmaniah om riseh. Vârna murdia risei risakin rithor risak thiai rei. Inpâkna la hei, Pathian la hei, rithla la hei sak unla; nin lungrila lômthu sîr pumin Pathian inpâkin zâi rei.

¹⁷Krista zâra Pathian zianga lômthu sîr pumin tinrêng nin itho murdi, thu sîr manih, thil ithoa manih, Pumapa Jisua rimingin tho khai rei.

¹⁸Nupuihei, nin pasalhei ziangah ribilriam rei, amakhah Krista nungizuihei tho rang pial a nit.

¹⁹Pasalhei, nin nupuihei lungthlung unla, an chungah nin nun inseh no rei.

²⁰Naipanghei, zorotin nin nu neh nin pahei thu zôm rei, amakhah Pathian lungdo a nit.

²¹Nu neh pahei, nin naihei innuar no rei, an zâm rizal a ti.

²²Suakhei, tinrêngah nin puhei thu zôm rei; miriam inlôm itumtuhei angkan an mu chung banga zôm ni loiin, lungril taka Pumapa ṭi pumin an mu loi khomah zôm rei.

²³Nin sintho murdiah miriam ta ranga sinitho angkan sin iloiin, Pumapa ta ranga sinitho angkan nin lungril murdin sin rei.

²⁴Loman rangin a mihei ta ranga ai sia richon khah nangni pêng a ti iti remai rei. Pumapa tak Krista sin nin itho chu a nit.

²⁵Thil dikino thotuhei khan thil dikino an itho thalo mûng an ti; Pathian khan tute ithleibîk mak e.