Read Biete KOLOSA 4 Bible Online

KOLOSA 4 - Biete bible

KOLOSA 4

¹Ruaituhei, nangni khomin rivânah Ruaitu nin nei iti rian, nin suakhei chungah idik tak neh iṭha takkan tinrêng tho rei.

²Ṭongṭai tak tak ngai unla, nin ṭongṭainaah lômthu sîr maiin ringai ving rei.

³Khabanah, keimani ta rang khomin ne ṭongṭai pêk sa rei; tâng ina ki omna bi, Krista thurithup thurchi isîr ki sunzom nôk theina ranga Pathianin zoronṭum a ne pêk nôk theina rang hei,

⁴ke sîr rang dân takka ifel takka ke sîr theina rangin ne ṭongṭai pêk sa rei.

⁵Iam inohei lâiah khan ivâr takkan om unla, zoronṭum nin inei kha mang inṭha rei.

⁶Mi tin ingkana sâm rang im ai nit nin riat theina rangin nin ṭongbâi suak khah ṭongithlum neh lungtôn iom ni mai riseh.

⁷Pumapaa kin suak champui, sinithotu iamom tak, kin suapui lungthlung tak Tukika hin ki thurchi murdi nangni ril a ti.

⁸Kin thurchi nin riata, lungril ifân takka nin om theina rangin ki hong itir a nit.

⁹Ama lômin nangmani mi, suapui lungthlung tak neh iamom tak Onesima hi ki hong itir sa a nit. Anni hin hi tianga thil omzia murdi nangni ril an ti.

¹⁰Ke tângpui Aristarka hin chibai nangni a bûk. Marka, Barnaba unai inchangpa khom hin chibai nangni a bûk (Ani hi nin ziangah a hong tikin chu lei ilôm rangin nangni ki lei îril tâk khah a nit.)

¹¹Josua, Justa an iti hin chibai nangni a bûk sa. Juda mi hong rilethei lâiah chu anni ithumkahei bang hi Pathian ram ta ranga sin ne thopui an nit a, lungngam an ne isak tak tak a nit.

¹²Epafra, nangmani mi, Krista Jisua suak hin chibai nangni a bûk. Ani hin a ṭongṭai ikipah idet takka nin idinga, nin hong puitlinga, Pathian lungdoa iamtu dik tak nin nit theina rangin ṭhatnemringai takkan nangni ai ngên pêk ngai a nit.

¹³Nangmani ta rang neh Laodikei mihei ta rang neh Hierapolis mihei ta ranga a sin zâlsong dân khah kî riatpui a nit.

¹⁴Luka, ei dâktor lungthlung neh Dema hin chibai nangni an bûk.

¹⁵Laodikei khuaa suapui iomhei neh Numfii neh a ina inkhôm ngaihei khah ne lei chibai pêk rei.

¹⁶Hi lekhathon hih nin tep zoiin chu Laodikei koindang khom intep sa rei. Khaangkan, nangni khomin Laodikei koindang lekhathon khah lei tep sa rei.

¹⁷Khante, Arkipa ziangah khan, “Sinthona Pumapaa nî dong khah ilen rangin ridîn roh,” ti pêk rei.

¹⁸Keimah Paulan amahih keima kut ngêia riziakin chibai nangni kî bûk a nit hih; ki rênbunhei hi ringil tlak no rei. Pathian lungkhamna khah nin ziangah om riseh.