Read Biete 1 THESALONIKA 1 Bible Online

1 THESALONIKA 1 - Biete bible

1 THESALONIKA 1

¹Paula, Sila neh Timothea hin, Thesalonika khuaa Pa Pathian neh Pumapa Jisua Krista koindanghei chibai kin bûk. Lungkhamna neh ringeina[1] nin ziangah om riseh.

²Nangmani sikin Pathian ziangah lômthu kin isîr ngai; kin ṭongṭainaheiah khan bâng loiin nin riming kin rilam ngai a.

³Iamna sika nin sinthozia hei, lungthlungna sika nin sin sôlzia hei, ei Puma Jisua Krista nin tûngna chunga nin ringat detzia hei kha ei Pa Pathian mitmuah kin iriatmai ngai a nit.

⁴Suapuihei, Pathianin lung nangni a thlunga, ama ta ranga nangni a irthlang a nit iti kin riat.

⁵Thurchi Ṭha khah thu bangin hong ithlun mang unga, sinthotheina neh, Rithla rithiang neh a thutak riatinfelna neh kin hong îthlun a nit kha. Nin zianga kin om lâia kin om dân khah nin riat a, nangmani ṭhatna rang izongin kin iom ngai a nit.

⁶Keimani neh Pumapa entonin nin ne nei a, intak itam takka tuang pumin, Rithla Rithianga lômna neh thu chu nin lei îham a nit.

⁷Khaangkan, Makedonia neh Akaia rama iamtuhei murdi ta rangin enton nin hong nit tâk a.

⁸Pumapa thu khah nangmania rithokin Makedonia neh Akaia ramah a înthang bang ni mak a, Pathian nin iamzia thu khom mun tinah a înthang sa tâk a nit; keimanin kin isîr nang khâi mak e.

⁹Nangni kin hong ithlo zoroa nin ne lei lôm dân hei, mirmil imaraka Pathian iring neh idik tak sin itho ranga Pathian tiang nin hong ngat thu hei,

¹⁰A Naipa Jisua, thina rithoka ai kâiithoi, ningthikna zuang itlung ranga rithoka ne sanisuatu chu, rivâna rithoka a zuang lei ingâka nin om thu hei khom an îsîr ngai a nit.