Read Biete 1 THESALONIKA 2 Bible Online

1 THESALONIKA 2 - Biete bible

1 THESALONIKA 2

¹Suapuihei, nin zianga kin ihong khah â tlong chang mak iti nangmani rengin nin iriat a nit.

²Thesalonikah kin hong maa Filipi khuaah khan ngêpsiana neh êrona kin tongzia khah nin riat a. Doina lian tak om man seh, nin zianga Thurchi Ṭha ril rangin kin Pathianin ihâina a ne ipêk a nit.

³Kin thu ril hih thu dik ino manih, thu porinche manih, lêmna thu manih ni mak e.

⁴Thurchi Ṭha inkola om ranga Pathianin a ne phun lam angkah takin, miriam inlôm rang ni loiin, kin lungril ifiatu Pathian inlôm rangin thu kin iril ngai a nit.

⁵Tiklâi khomin mi chungah inpâk pelêm mang ngai mang ung a, kuatinkam rikhûnan thu isîr ngai mang ung e iti nin riat a, Pathian khomin a riat.

⁶Mihei nen pâk zong ngai mang ung a, nangmanin manih, mi danghein manih an nen pâk sabei ngai mang ung e.

⁷Krista tirtôn kin nit sikin nin ziangah zong thei khom unlang, nûn a naihei a îduam angkan zâiidam takkan kin iom a nit kha.

⁸Lung nangni kin thlung tak tak sikin nangni kin ringai innat tak tak a; khasikin, Pathian Thurchi Ṭha bang ni loiin, kin ringna tena khom nangni pe kin irsiam a nit.

⁹Suapuihei, kin sin zâlsongzia neh sôlzia khah nin riat a, nin lâiah tute inkhôk kin sak nona rangin sûn zân isôl takka sin itho pumin Thurchi Ṭha nangni kin îsîr pêk ngai a nit kha.

¹⁰Rithiang neh idik neh demnaboia iamtuhei chunga kin innun tlia khah nangmani â retuhei nin nit a, Pathian khomin a ne iriatpui a nit.

¹¹Pân a naihei a en ngai lam takkan nangni kin en iti nin iriat a nit.

¹²A ram neh a roinpuina dong ranga nangni koitu Pathian lôm lama om rangin nangni thorin, thlangam nangni sakin, nangni kin ingên ngai a nit kha.

¹³Hi sikah hin chât loiin Pathian ziangah lômthu kin isîr mai ngai a. Keimania rithoka Pathian thu nin riata nin iham lâiah khan, miriam thu angkan iham loiin, Pathian thu ai nit angkah takin nin îham a nit. Pathian thu khom a nit ngêt a, nangni â iamheiah khom sin ai tho a nit.

¹⁴Suapuihei, Judai rama Pathian koindang, Kristaa omhei chunga thil itlung khah nangmani chungah khom ai tlung a nit. Anmanin Judaheia rithoka nuamlona an ituang angkan nangni khomin nin mihei ata nin ituang a nit.

¹⁵Kha Judahei khan Pumapa Jisua neh zânthlahei an that a, keini khom an nuam an ne ilo a nit. Pathian inlôm tlak mak a, mi dang khom an îkal a nit.

¹⁶Jentailhei saninring an nit theina ranga Thurchi Ṭha an zianga thusîr ne khap an tum ngai a. Khangkan sual tentîr an sin a, atûn chu a nungkhônah Pathian ningthik an chungah ai tlung tâk a nit.

¹⁷Suapuihei, lungril tiang ni loiin, taksa tiang zoro itôiteka sung inṭhenin ei la om a; khasikin, nin mêl imuh nôk kin nuam tak tak a, nangni muh rang khomin kin itum tak tak a nit.

¹⁸Nangni hong ithlo kin tum ngai a, keimah ngêi khomin voi nik voi thumkah ki tum tâk a; khannisela, Soitanan a ne îdan ngai a nit.

¹⁹Kin tûngna manih, kin lômna manih, kin rênglukhum song manih khah im ai nit? Ei Pumapa Jisua Krista zuang tika a makunga kin inêna sika kin risongna rang chu nangmani hi nin nit.

²⁰Nangmani hi kin roinpuina rang neh kin lômna rang chu nin nit.