Read Biete 1 THESALONIKA 5 Bible Online

1 THESALONIKA 5 - Biete bible

1 THESALONIKA 5

¹Suapuihei, a zoro neh a nikhua thuhei chu nangni riziak pêk nang mak e.

²Pumapa Nikhua chu zâna inru hong ngai angkan zuang tlung a ti iti nangmani rengin nin iriatinfel a nit.

³“Ningbeina neh zôkna” zoroa an be lâi takin nupang naiha isê angkan voikarengin an chungah rimangna zuang tlung a ta, lôi thei tlak no nih.

⁴Khannisela, suapuihei, nangni chu izîngah nin om no sikin kha Nikhua khan inru angkan nangni de no nih.

⁵Nin rêngkan ivâra mi neh sûna mi nin nit a. Zâna mi neh izînga mi ni mang me.

⁶Khasikin, mi danghei angkan in no min u; har ei ta, ringai ving ei ti u.

⁷Mîn zânah kêng an iin ngai, zu khom zânah kêng an înrui ngai.

⁸Eini chu sûna mi ei nit sikah hin, iamna neh lungthlungna ṭângipho khah ihâkin, saninring tûngna khah lukhuma mangin, ringai ving ei ti u.

⁹Pathianin a ningthikna tuang rangin ner thlang mak a, ei Pumapa Jisua Krista zâra saninringna dong rangin a ne irthlang a nit.

¹⁰A zuang tikin ei la ring khoma, ei lei thi tâk khoma, amah neh munkan ei om theina rangin ei rithûlin amah ai thi a nit.

¹¹Khasikin, atûna nin itho mai ngai angkah hin, rithor risak mai ngai unla, risan risak mai ngai rei.

¹²Suapuihei, nin ta ranga isôl takka sinithoa, Pumapaa nangni enkoltuhei neh nangni inriseituhei khah imarit rangin nangni kin ingên a nit.

¹³Anni kha an sintho sikah khan lungthlung unla, ringai inlu tak tak rei. Ringei irkan om rei.

¹⁴Suapuihei, mi thaboihei khah rikôk unla, lungril ichînhei khah ithor unla, rât inohei khah san unla, mi tin chungah nin ilung diar rei.

¹⁵Tukhomin tu sual khom suala thung loi rangin ridîn unla, tiklâi khomin thil iṭha isin pêk risakin neh mi murdi chungah khom thil iṭha tho mai rei.

¹⁶Lôm mai unla,

¹⁷Chât loiin ṭongṭai unla,

¹⁸îtinrêngah lômthu isîr mai rei. Amahih Krista Jisua neh rizoma nin tho ngai ranga Pathianin nangni ai nuam a nit.

¹⁹Rithla Rithiang that[3] no rei.

²⁰Thusîrhei enkhûm no rei;

²¹îtinrêng fia bak unla, â ṭha chu ipom ngit unla,

²²sual angkana lang[4] murdia rithokin chu rikiang rei.

²³Khante, ringeina Pathian ngêi khan nin pumkan nangni inrithiang sela, ei Pumapa Jisua Krista a zuang tikin nin rithla, nin ringna neh nin takpum nin pumkan sêlnaboin nangni inzôk riseh.

²⁴Nangni koitu chu iiam a om a, itho khom tho ngêt a ti.

²⁵Suapuihei, ne ṭongṭai pêk rei.

²⁶Iamtuhei murdi khah kut ritun chibai[5] ne bûk pêk chit rei.

²⁷Hi lekhathon hih iamtuhei murdi riata tep rangin Pumapa rimingin nangni kî ngên a nit.

²⁸Ei Pumapa Jisua Krista lungkhamna chu nin ziangah om riseh.