Read Biete JOSUA 1 Bible Online

JOSUA 1 - Biete bible

JOSUA 1

¹PUMAPA suak Mosia thi nungah khan Mosia ṭangpuitu Nuna Naipa Josua ziangah PUMAPA khan,

²“Ki suak Mosia chu a thi tâk a; khasikin, thoi inla, Israel mipui murdihei hi Jordan dung rikanpui roh, nangni kî pêk rama fe rangin risiam rei.

³Mosia zianga ki îsîr tâk angkah khan nin kephaa nin ichuang kangân chu, nangmani, ki mihei hi, nangni peh riai ki ti.

⁴Sim tiang ramchâra rithokin mâr tiang Lebanon tlâng idênin, nisua tiang Eufratis vadungpui ata nithlâk tiang Hit mihei ram, Mediteranean tuipui idênin nin ram nîng a ti.

⁵Josua, ni damsung kârkah tute zelin nang inê no nih. Mosia zianga kî om angkan ni ziangah kî om rang a nit. A nit, ni ziangah om mai ki ta; tiklâi khomin nang ithla no ning a, imah khom nang marak no ning e.

⁶Irât tak neh ihâi takkan om mai roh, nin chibulhei zianga ṭongrikhâma ipe ki lei înkung tâk ramah khan hi mihei hih inlua rangin ni ṭhui inlût rang a nit.

⁷Irât tak neh ihâi takkan om mai roh; ki suak Mosian ki dân murdi izôm ranga thu nang ai pêk khah zôm ngit roh. Ni fena kipah thluan ni tlung theina rangin kha dâna rithokin ne changtiang manih ne voitiang manih pêt tlak no roh.

⁸Hi dân bu hin ni bâi mah tlak no seh, sûn neh zân ngaituan la, a sunga thu riziak murdi chu zôm roh; khanchu, ni lampui hong rivak a ta, thluantlung mai ni ti.

⁹Irât tak neh ihâi takka om ranga thu nang kî pêk khah remai roh; ṭi non la, indôp no roh; keimah, PUMAPA ni Pathian hi ni fena tinah ni ziangah kî om mai rang a nit,” itin â ril a.

¹⁰Khanungchu, Josua khan Israel ruaituhei ziangah khan, “Riabuk var fang unla, mipuihei ziangah, ‘Cholamhei inrifûk rei, sûn thumka nungah chu PUMAPA nin Pathianin nangni ai pêk ram ilua rangin Jordan dung ei irkan rang tâk a nit,’ itin thu peh rei,” a ti a.

¹²Khante, Reubena namhei, Gada namhei neh Manasea nam rizâtkahei ziangah khan Josuan,

¹³“PUMAPA nin Pathianin nin omna rangin Jordan nisua tiang râl ram hi nangni la pêng a ti iti PUMAPA suak Mosian thu nangni ai pêk khah remai rei.

¹⁴Nin nupuihei, nin naihei neh nin mîringhei hi chu hi tlâng Jordan dung râla Mosian ram nangni a lei ipêkah hin lei om an ta; khanniseh, nangni mi rât, irâl idoi thei murdi chu nin râlthluk ichôiin vadung hi lei kâi masa nin ta, nin suapuihei hih nin ṭangpui rang a nit.

¹⁵PUMAPA nin Pathianin ai pêk ram, Jordan râl nithlâk tianga ram kha an lua fela, Israel namhein an omna rang chitah râlringam taka an om ten bangin kîr thei nin ta, Jordan nisua tiang ram, PUMAPA suak Mosian nangni ai pêkah hin nin iom thei rang a nit,” itin â ril a.

¹⁶Khante, anni khan, “Isin ranga ni thu ne pêk murdi chu tho mai kin ta; khabanah, ni ne tirna kipah khom fe mai kin ti.

¹⁷Lam tinrêngah Mosia thu kin izôm mai ngai angkah khan ni thu khom zôm mai kin ti; PUMAPA ni Pathian chu Mosia zianga ai om ngai angkan ni ziangah khom om mai riseh.

¹⁸Tukhom ni thupêk chunga rihel a, ni thu zôm nuam ino chu ithat nîng an ti: Irât tak neh ihâi takkan om mai roh,” itin Josua chu an sâm a.