Read Biete JOSUA 10 Bible Online

JOSUA 10 - Biete bible

JOSUA 10

¹Kha lâiah khan Jerusalem khua rêng khah Adonizedeka[4] a nit a, Josuan Ai khua a lâk a, â siatchit thu hei, Jeriko khua neh an rêng a înrimang vang angkan Ai khua neh an rêng ân rimang vang iti thu a lei riat a; khapenah, Gibeon mihei khan Israelhei neh ringeina an siam a, an lâiah an om sa tâk iti thuhei a lei riatin chu,

²a ṭi tak tak a; Gibeon khua khah khua lian tak rêng inei khopui angkah dôrka khua lian a nit a, Ai khua nêkan a roinpui ual a, a miriam murdihei khom khah mi rât tak an nit.

³Khanungchu, Jerusalem rêng Adonizedeka khan Hebron kho rêng Hohama hei, Jarmut kho rêng Pirama hei, Lakis kho rêng Jafia hei neh Eglon kho rêng Debira hei kha thu archa a, an ziangah,

⁴“Tho hong unla, ne hong ṭangpui rei, Gibeon va rûn ei ti; Josua neh Israelhei ziangah ringeina an isiam tâk kêng,” a ti a.

⁵Khanchu, Amorhei rêng ringakah, Jerusalem kho rêng hei, Hebron kho rêng hei, Jarmut kho rêng hei, Lakis kho rêng hei neh Eglon kho rêng hei khah an ribûm a, an sipaihei murdi neh an hang fe a, Gibeon khua khah an hual a, an doi tâk a.

⁶Gibeon mihei khan Gilgalah Josua ziangah mi an tir a, “Ni bôihei hih ne thla non la, irang takkan kin ziangah hong inla, ne hong ṭangpui roh; tlângrama om Amor rênghei ne doi rangin an hong ribûm riai tâk,” an ti a.

⁷Khanungchu, Josua neh a zianga râlkâp mi, mi rât ihâi murdihei kha Gilgala rithokin an hang fe a.

⁸PUMAPA khan Josua ziangah, “Anni khah ṭi no roh, ni kutah nang kî pêk tâk a nit; an lâia mi tute nang idoi thei rang om no nih,” a ti a.

⁹Josua neh sipaihei khah Gilgala rithokin zân thluanin Gibeon idênin an fe a. Khanchu, Amor mihei khah an rining loiin an doi zel tâk a.

¹⁰PUMAPA khan Israelhei maah khan Amor mihei khah indôpin a siam a, Gibeon khuaah khan itam takka an that a, Beth-Heron fena lampuiah an rizûl a, Azeka neh Makeda khua dênin an that thiai a.

¹¹Israelhei maah lâizâm siat an tho a, Beth-Horona rithoka fena ṭum muna an om lâiin PUMAPA khan rivâna rithokin irial ilian ân dêng a, Azeka khua dênin ân dêng a, Israelhein khandaia an ithat nêkan khom irial idêng that khah an itam ual a nit.

¹²PUMAPA khan Amor mihei khah Israelhei kutah a pêk nî-ah khan Josuan PUMAPA â sôn a. Israelhei mitmu ngêiah khan, “Inî, Gibeon khua chungah iding mai roh; Ithla, nang khom Aijalon phâi chungah om mai roh,” a ti a.

¹³Khanchu, Israelhei khan an irâlhei chungah phuba an lâk mâkah chu inî khah â ding ṭian mai tâk a, ithla khom khah â ding ṭian tâk a. Hi thu hih, “Jasar lekhabu,” an iti-ah riziak a nit. Khanchu, inî khah vânlâizôlah a om ṭian mai a, a sûn itlungin thla khâi mak a.

¹⁴Khangkah dôra miriam thu PUMAPA khan arngai nî sûn lei om ngai mak a, iom khom om nôk khâi no nih; PUMAPA khan Israelhei khah ai doipui a nit.

¹⁵Kha rizoiin chu Josua neh a sipaihei murdi khah an riabuk Gilgalah an kîr nôk tâk a.

¹⁶Amor rêng ringakahei khah lâizâm an tho a, Makeda pûkah an ribîk a.

¹⁷Josua ziangah, “Rêng ringakahei khah an mu tâk, Makeda pûkah an irbîk a nit,” itin an hong iril a.

¹⁸Khanchu, Josua khan, “Ipûk bâi khah lung ilianpa pa inlumin khâr unla, â ngâk rang mi ṭhenkah nin in-om rang a nit.

¹⁹Nangni chu om no unla, nin irâlhei khah rizûl mai unla, nungitahei khah that unla, an khua sung rêng rêng inlût no rei, PUMAPA nin Pathianin nin kutah anni khah nangni ai pêk tâk a nit,” a ti a.

²⁰Josua neh Israelhei khan an irâlhei khah an that a, an ithat infâi riai dôr a nit, khan mi iroichekah chu an kho kulpui sungah khan an itlân lût a, anni kha chu that khâi mak a.

²¹Khanchu, Israelhei murdi khah Josua ziang tiang Makedaa an riabukah khan râlringam takkan an zuang kîr nôk tâk a. Kha rama mi tute zelin Israelhei khah rikôk ngam khâi mak a.

²²Khanungchu, Josua khan, “Ipûk bâi khah iong unla, rêng ringakahei khah ipûk ata ki ziangah hong ṭhui rei,” a ti a.

²³Khangkah khan an tho a, kha rêng ringakah Jerusalem rêng, Hebron rêng, Jarmut rêng, Lakis rêng neh Eglon rêng hei khah ipûk ata Josua ziangah an zuang ṭhui a.

²⁴Kha rênghei khah Josua ziangah an zuang ṭhuiin chu, Josua khan Israel mihei murdi khah a koi bûm a, râlkâp mi ai ṭhuihei lâia ulian ual ualhei ziangah khan, “Hong nâi unla, hi rênghei ring hih hong sirde ta u,” a ti a. Khanchu, an hong nâi a, an ring khah an hong sirde tâk a.

²⁵Josua khan an ziangah, “Ṭi no unla, indôp viat no rei, irât tak neh ihâi takkan om rei, nin irâl murdi nin idoihei chungah PUMAPA khan hingka hin ai tho mai rang a nit,” a ti a.

²⁶Khanungchu, Josua khan rênghei khah a that a, thing ringaka lêrah â khâi a, kholoi idênin thinglêrah khan an ruak khah an ikhâi a.

²⁷Inî tlâk rangin chu Josua khan thu a pêk a, thinglêr ata khah an iṭhum a, an ribîkna pûkah khan an pai a, ipûk bâi khah lung ilianpa pan an sîng a; atûn tenah hin a lai om mai a nit.

²⁸Josua khan kha nî-ah khan Makeda khua khah a rûn a, a lâk a, an rêng khom a man a, khandaiin a sun that a; kha khuaa om murdihei khom a that infâi riai a, khatka lua zua viat mak a; Jeriko khua rêng chunga ai tho angkah takah khan Makeda khua rêng chungah khom ai tho a nit.

²⁹Kha rizoiin chu Josua neh Israel mihei khah Makeda khuaa rithokin Libna khuaah an fe a, an va rûn a.

³⁰Khanchu, kha khua neh an rêng khah PUMAPA khan Israelhei kutah a pêk a, kha khuaa om mi murdi khah khandaiin a that riai a; a sungah mi khatka lua zua mak a, Jeriko khua rêng chunga ai tho angkah takah khan kha kho rêng chungah khom ai tho a nit.

³¹Khanungchu, Libna khuaa rithokah khan Josua neh Israel mihei kha Lakis khua tiang an fe a, ṭangmun an khuar a, an rûn tâk a.

³²Khanchu, PUMAPA khan Lakis khua khah Israelhei kutah a pêk a, a sûn niknî-ah khan khua khah an lâk tâk a. Libna khua an tho lam angkah takah khan kha khuaa om mi murdihei khah khandaiin an that riai a.

³³Gezer kho rêng Horama khah Lakis khua san rangin a hong a; Josua khan ani khah a sipai lômhei neh a lei inê a, khatka lua zua viat loiin a lei that vang a.

³⁴Khanungchu, Josua neh Israel mihei khah Lakis khuaa rithokin Eglon khua tiang an pan a, ṭangmun an khuar a, an rûn tâk a.

³⁵Kha nî zelah khan an lâk a, kha nî ngirah khan kha khosunga om murdihei khah a that riai a, Lakis kho chunga an tho lam angkah takah khan kha khua khom kha an itho a nit.

³⁶Khanungchu, Josua neh Israel mihei khah Eglon khuaa rithokin Hebron khua tiang an fe a, an va rûn tâk a.

³⁷Khua khah an lâk a, kha khua om mi murdi khah an rêng neh khan an that riai a, a kôlvêl khuaa omhei murdi khom kha khandaiin an that riai a, Eglon kho chunga an itho angkah takah khan Hebron khua khom khah an isiat chit a, khatka lua izua zel nei loiin a sunga om murdihei khah an ithat infâi riai a nit.

³⁸Josua neh Israel mihei khah Debir khua tiang an kîr nôk a; an rûn a.

³⁹Khua khah an lâk a, an rêng khah an man a; a kôlvêl khuahei khom khah an lâk a. Kha khuaheia om mi murdi khah khandaiin an that infâi riai a; khatka lua zua mak a. Hebron neh Libna khua chunga an itho angkah takah khan Debir khua neh an rêng chungah khom ai tho a nit.

⁴⁰Josua khan ram pumpui khah a lâk riai tâk a, tlângram hei, nisua tiang panga ram hei, phâi ram hei, sim tianga ram hei khah inê riaiin an rênghei khah a that vang a; khatka lua zua viat mak a. PUMAPA Israelhei Pathian thupêk angkan tute zua viat loiin an rêngkan a that infâi riai a.

⁴¹Josua khan Kades-Barnea rithokin Geza dênin, Gosen ram pumpui neh Gibeon idênin a rûn inê vang a.

⁴²Kha rênghei murdi neh an ramhei khah PUMAPA Israelhei Pathianin Israelhei kha a doipui sikin Josua khan ṭumkhatkan ai lâk riai a nit.

⁴³Khanungchu, Josua neh Israel mihei khah an riabuk Gilgalah khan an kîr nôk tâk a.