Read Biete JOSUA 11 Bible Online

JOSUA 11 - Biete bible

JOSUA 11

¹Hazor kho rêng Jabina khan Israelhein mi an hong inê tlia khah a lei riatin chu, Madon[5] kho rêng Jobaba hei, Simron kho rêng hei, Aksaf kho rêng hei,

²Mâr tiang tlângram rêng hei, Galili dîl sim tianga Araba kho rêng hei, Jordan phâi ram rêng hei, Mediteranean tuipui rikama Dor kho rêng hei,

³Jordan dung panga sak tiang neh thlang tianga om Kanan rêng iomhei, Amor rêng hei, Hit rêng hei, Periz rêng hei, tlângrama om Jebus rêng hei, Mizpa ram Hermon tlâng nuaia om Hiv rêng hei ziangah mi a tir a.

⁴An sipaihei murdi neh an hong rithok a, an tam tlia chu tuikhanglian rikama ṭiai dôr an nit a, sakor neh sakor tâli itam takkah neh an hong rithok tâk a.

⁵Kha rênghei murdi khah an ribûm a, Israelhei khah idoi rangin Merom vadung rikamah khan riabuk an khuar a.

⁶PUMAPA khan Josua ziangah, “Anni kha ṭi no roh; naktûk hingka tikah hin annihei chu that riai ki ta, Israelhei ziangah kî lan rang a nit; an sakorhei zapui sâtchat inla, an tâlihei khah ni hâl rang a nit,” a ti a.

⁷Khanungchu, Josua neh a lôma râlkâp mihei khan Merom vadungah khan an rining loi kârin an va doi tâk a.

⁸PUMAPA khan anni chu Israelhei kutah a pêk a, an rûn a, Misrefot-Maim neh Sidon idênin an rizûl a, sak tiang pangah Mizpah phâi idênin an rizûl a; khatka lua zua viat loiin an that riai a.

⁹PUMAPA thupêk angkan Josua khan an sakorhei zapui khah a sâtchat a, an tâlihei khah a hâl a.

¹⁰Josua chu a kîr nôk a, Hazor khua khah a lâk a, an rêng khah khandaiin a that a. Kha lâi zoroah khan chu Hazor khua kha, kha ram murdi lâia khopui ilian tak a nit.

¹¹Kha khuaa om mi murdihei khah khandaiin an that riai a, tute zua loiin an rêngkan an that a; khanchu, Hazor khua kha an hâl tâk a.

¹²Josua khan kha khopui murdihei khah a lâk riai a, an rênghei khom a man a, PUMAPA suak Mosia thupêk angkah khan a that riai mai a.

¹³Hazor khua, Josua ihâl ti no chu, Israelhei khan khua an îsiata in la dinghei kha chu khatkah khom hâl mak a.

¹⁴Kha khopuiheia an râllâk thil murdihei neh ranhei kha chu Israelhei khan anmani ta rangin an dong a; miriam chu an inrimang riai mâkah khandaiin an that mai a, â ringa izua zel nei mak a.

¹⁵PUMAPA khan a suak Mosia thu a lei ipêk angkah khan, Mosia khomin Josua khah thu a pêk a, Khangkah khan Josua khan a tho mai a; Mosia zianga PUMAPA thupêk murdi khah tho no rêng rêng nei mak e.

¹⁶Josua khan ram pumpui, sim neh mâra tlângram hei, phâiram hei, Gosen ram murdihei, Araba ram hei, Jordan phâiram hei, Israel tlângram hei, an phâiram hei a lâk riai a.

¹⁷Seir tlâng hang isuntu Halak tlânga rithoka Hermon tlâng thuaia Lebanon phâia Balgad idênin ram a lâk a; an rênghei murdi khah a man a, a that a.

¹⁸Josua khan kha rênghei murdi khah isôt takkah ai doi a nit.

¹⁹Gibeon khuaa om Hiv mihei ti no chu Israelhei neh ringeina siam khua rêng rêng omak a; irûna an ilâk korong a nit.

²⁰PUMAPA khan Israelhei indoi rangin tuklul ilianin ai siam a nit; khanchu, Mosia zianga PUMAPA thupêk angkana lungkhamna nei viat loia anni chu an that inrimang vang theina ranga lungril ikhira ai siam a nit.

²¹Kha lâiah khan Josua khah a fe mai a, tlângrama om milian Anakim richi an iti, Hebron khuaa omhei, Debir khuaa omhei, Anab khuaa omhei neh Judai tlângram murdia omhei, Israel tlângram murdia omhei kha a that riai a. Josua khan anmani neh an khopuihei khah ân rimang vang a.

²²Israelhei ramah khan mi lian Anakimhei khah khatkah khom om khâi mak a, Gaza khua hei, Gath khua hei, Asdod khua heiah khan chu iroichekah chu an lai om a nit.

²³Khanchu, Mosia zianga PUMAPA thupêk angkan Josua khan ram pumpui khah a lâk tâk a. Josua khan Israelhei khah a nam risui dân angkah takin an dongtum rang ram a sem pêk tâk a. Khanchu, ram kha râlringam riamkan a om tâk a.