Read Biete JOSUA 13 Bible Online

JOSUA 13 - Biete bible

JOSUA 13

¹Josua khah a hong ûnlian a, a hong tar ok tâk a; PUMAPA khan a ziangah, “Ni hong ûnlianin ni tar ok tâk a, ram ilah rang lak a la tam a.

²Filistia neh Gesurhei omna ram murdi hei;

³sim tiang ram Avimhei omna ramhei la la no a nit. Aigupta ramrî taka om Sihor vadunga rithoka mâr tiang panga Ekron ramrî dênin Kanan mihei rama be a nit. Filistiahei chu Gazaah hei, Asdod-ah hei, Askelon-ah hei, Gath-ah hei neh Ekronah hei rêngin an îṭhung a nit.

⁴Kanan mihei ram murdi neh Sidon mihei rama Meara kha Amorhei ramrî Afek khua dênin la la no a nit.

⁵Gebal mihei ram, Lebanon nisua tiang pang ram murdi, Hermon tlâng thuai Baalgada rithoka Hamath khua lûtna dênin la la no a nit.

⁶Lebanon tlânga rithoka Misrefot-Maim mun idênin tlângrama om murdi, Sidon mi murdihei chu keiman Israelhei maah hin nang ûm isua pêk ki ta; thu nang kî pêk angkah khan ram chu Israelhei sem pêk roh.

⁷Tho atûn chu, ram hi Israel nam ikuakkahei neh Manase nam rizâtkahei dongtum rangin sem pêk ta roh,” a ti a.

⁸Reubena namhei, Gada namhei neh Manasea nam rizâtkahei khan Jordan nisua tiang pangah khan an dongtum rang PUMAPA suak Mosian ai pêk khah an lei dong tâk a.

⁹An ram chu Arnon vadung phâi sîra om Aroer khua neh phâizôl taka khopui neh Medeba tlângram phâi ata Dibon idênin a nit a.

¹⁰Amor mi, Hesbon kho rêng Sihona khopui murdi, Amona richihei ramrî dênin â huap a.

¹¹Gilead ram neh Gesurhei neh Maakathei ramrî ten neh Hermon tlâng neh Basan ram murdi, Saleka khua dênin a nit a.

¹²Astarot neh Edrei kho rêng Oga ram Basan ram murdi â huap a. Ani kha Refaim nam la om sunhei lâia mi a nit. Mosia khan khahei khah a lei doi a, a lei iûm isua tâk a nit.

¹³Khannisela, Gesur mihei neh Maakat mihei kha chu Israelhei khan ûm isua mak a; atûn tenan Israelhei lâiah an iom mai tâk a nit.

¹⁴Mosia khan Levia chihei kha chu an dongtum rang ram ai pêk ino a nit. PUMAPA, Israelhei Pathian zianga thillan mâichâma an hâl bânhei khah an dongtum ranga peh rangin PUMAPA khan Mosia khah a îril a nit.

¹⁵Reubena richihei kha an rui risui dân angkan Mosia khan ram a lei pêk tâk a;

¹⁶An ramrî khah Arnon phâi sîra om Aroer khuaa rithoka phâizôl taka khopui neh Medeba tlângram phâi murdi kha a nit a.

¹⁷Hesbon khua neh a kôlvêl tlâng richama khopui murdi; Dibon hei, Bamot Baal hei, Beth Baal Meon hei;

¹⁸Jahaz hei, Kedemot hei, Mefaat hei;

¹⁹Kiriathaim hei, Sibma hei, tlâng richama om Zereth-sahar hei;

²⁰Beth-Peor hei, Pisga tlâng pang hei, Beth Jesimot hei â huap a.

²¹Tlângram richama khopui murdihei, Amor mi Hesbon rêng Sihona ram murdi a îhuap sa a nit. Ani khah Mosian â nê a, Midian ruaitu Evia hei, Rekema hei, Zura hei, Hora hei, Reba hei omna ram pumpui ai huam a nit; hihei hih Sihona nuaia lal an nit.

²²Israel mihein Beora naipa Balaama, thlasân ithiam khom khah mi dang an that rualin an ithat sa a nit.

²³Thlang tianga Reubena namhei ramrî chu Jordan dung a nit. Hi khopuihei neh khuahei hih Reubena richihei an rui risui dân angkah taka an dongtum ranga ipe chu a nit.

²⁴Mosia khan Gada richihei khah an rui risui dân angkah takin ram a pêk a.

²⁵An ram khan Jazer neh Gilead khopui murdi neh Amonhei ram rizâtkah, Raba khua sak tianga om Aroer idênin a îhuap a nit.

²⁶Hesbona rithoka Ramath Mizpa neh Betonin idênin â huap a, Mahanaima rithoka Lodebar[7] ramrî dênin â huap sa a.

²⁷Jordan phâiah khan Beth Haram hei, Beth-Nimra hei, Sokot hei, Zafon hei neh Hesbon rêng Sihona ram murdihei â huap a. Thlang tianga an ramrî chu Jordan dung, Galili dîl mong idênin a nit.

²⁸Hihei hi a nit, Gada richihei ranga an rui risui dân angkah taka khopuihei neh khuahei an idong chu a nit.

²⁹Mosia khan Manasea nam rizâtkahei kha an rui risui dân angkah takin ram khah a pêk a.

³⁰An ramrî chu Mahanaima rithokin Basan ram murdi, Basan rêng Oga ram murdi neh Basan ram Jair biala khopui sômirukkah a îhuap a nit.

³¹Gilead ram rizâtkah neh Basan ram rêng Oga khopui Astarot hei, Edrei hei kha a pêk sa a. Amakhah Manasea nai Makira richi rizâtkahei ranga an rui risui dân angkah taka ipe chu a nit.

³²Moab phâiah an om lâiah khan, Jeriko ridîn, Jordan râl, sak tiang ram chu Mosia khan khingka khin an dongtum rangin a lei isem pêk a nit.

³³Mosia khan Levia richihei chu dongtum rang ram peh mak a; an zianga a lei îsîr tâk angkah khan PUMAPA Israelhei Pathian kha an dongtum chu a nit.