Read Biete JOSUA 14 Bible Online

JOSUA 14 - Biete bible

JOSUA 14

¹Jordan dung thlang tianga Kanan ram an ilâk kha Israel mihei ziangah thiampu Eleazara hei, Nuna naipa Josua hei neh Israel nam ruaituhei khan hingka hin an sem pêk a.

²PUMAPA khan Mosia zianga thu a lei ipêk tâk angkah khan nam ikuakkah neh nam rizâtkahei dongtum rangin kha ram khah thlasânin an sem a.

³Mosia khan nam inikahei neh nam rizâtkahei kha chu Jordan râlah khan an dongtum rang khah a lei ipêk thlâm tâk a nit. Josefa richihei kha nam inikah, Manase neh Efraim nama ṭhen an nit. Levia richihei kha chu an dongtum rang ram peh sa mak a, an omna rang khopuihei neh a kôlvêl an ran lêngna rang mun neh an choke indingna ti no chu ram a îndong ino a nit.

⁵Mosia zianga PUMAPA thupêk angkah khan Israelhei khan ram khah an risem tâk a.

⁶Sûnkah chu Juda nam mi ṭhenkahei khah Gilgal khuaah Josua ziangah an va fe a. Anni lâia mi khatkah, Keniz mi, Jefunea naipa Kaleba khan Josua ziangah, “Kades-Barnea ei om lâia Pathian mi Mosia zianga nangmah neh keima chungchâng thu PUMAPA îsîr khah ni riat a.

⁷PUMAPA suak Mosian Kades-Barnea muna rithoka ram va en ranga a ne tir lâiah khan kum sômilikah mi ki nit tâk a. Thil ki mu dân angkah chiaah khan ke thlun nôk a.

⁸Khannisela, ki suapui ki zianga fe sahei khan chu mipuihei lungril indôpin an siam pêk a; keimah rêkin chu PUMAPA ki Pathian kha ki îpom ngit a nit.

⁹Khanchu, Mosian kha nî-ah khan, ‘PUMAPA, ei Pathian thu ni zôm ngit sikin ni kea ni lei ichuang tâk ram khah kumkhuakan nangmah neh ner chihei dongtum rang ni ngêt ngêt a ti,’ itin ṭong arkhâm a.

¹⁰Nikhomsela, atûnah hin, PUMAPA khan Mosia zianga kha thuhei â sîrna khah kum sômilikah kum ringakah a hong nit tâk a, Israelhei ramchâra an rivâk sunga rithoka atûn tenah hin PUMAPA khan iring idamin a ne la zua a; atûnah hin kum sômiriatkah kum ringakah ki hong nit tâk a.

¹¹Khangkah dôran khom atûn ten khomah hin Mosian a ne tir lâi angkah ngirah khan ki la rât mai a, atûn khom ridoi ife rang neh thil dang itho rangin ritha ki lai nei mai a nit.

¹²Khasikin, ki fepuihei neh thu kin hong ithlun lâia PUMAPA înkung, hi tlângram hih ne peh ta roh. Khangkan Anakim, milianhei kha an khopuihei khom kulpuia rikul khap a nit iti nang kin iril khate. PUMAPA khan ne ompui a ta, PUMAPA thupêk angkan anmani chu ki ûm isua thei duai lôi im,” a ti a.

¹³Khanchu, Josua khan Jefunea naipa Kaleba kha ṭhat a vur a, a dongtum rangin Hebron khua khah a pêk tâk a.

¹⁴Khangkan PUMAPA, Israelhei Pathian thu a zôm ngit sikin atûn tenah hin Hebron khua khah Keniz mi, Jefunea naipa Kaleba dongtum a hong init tâk a nit.

¹⁵Hebron khua riming khah matonah khan chu Kiriat-Arba a nit, Arba khua tina a nit. Arba chu Anakimhei lâia mi lian tak a nit. Ram chu râlringamin a om tâk a.