Read Biete JOSUA 16 Bible Online

JOSUA 16 - Biete bible

JOSUA 16

¹Josefa richihei ram dongtum sim tiang ramrî chu Jeriko ridîn Jordana rithokin ramchâr kôl, sak tiang panga Jeriko tuisuaheiah khan a suak a, Jerikoa rithoka khan tlângram tiang Bethel idênin a fe a.

²Bethela rithokin Luz-ah a suak a, Arkhei omna Atarot idênin a fe thal a;

³Thlang tiang pangah Jaflethei omna a fe thleng a, Beth-Horon chuannuai a sun a, Gezer idênin a thleng thal a, Mediteranean tuipuiah a zui mong a nit.

⁴Josefa richihei, Efraim neh Manasea richihei khan amahih an dongtum ram rangin an inei tâk a nit.

⁵Efraim richihei, an rui risui dân angkah taka an idong ramrî chu hingka hin a nit: Sak tiang panga an dongtum ramrî chu Atarot Adar neh Beth-Horon kâr a nit.

⁶Khantaka rithokin Mediteranean tuipui idênin ramrî khah a fe a, mâr tiang khua Mikmethata rithokin sak tiang ipanin ramrî kha Taanath-Silo dênin a fe a, Janoa khua tiang a fe thal a;

⁷Janoa rithokah khan Atarot-ah neh Naara-ah a fe thal a, Jeriko a tlung a, Jordan dungah a mong a.

⁸Thlang tiang pangah Mikmethat khuaa rithokin Tapua khua fe thlengin Kana vadung idênin a fe a, Mediteranean tuipuiah a zu mong tâk a. Hi ramrî sung hi Efraima richihei an rui risui dân angkah taka an dongtum ranga ram an ipêk chu a nit.

⁹Manasea richihei dongtuma rithokin Efraimhei kha khopui ṭhenkah neh a kôlvêl khotehei kha an ipêk sa a nit.

¹⁰Gezer khuaa lei iom, Kanan mihei kha ûm isua mak a; khasikin, Kanan mihei chu Efraimhei lâiah atûn tenah hin an la om a; nikhomsela, sinithoa mang rangin bôiin an iom a nit.