Read Biete JOSUA 17 Bible Online

JOSUA 17 - Biete bible

JOSUA 17

¹Josefa nai lutîr, Manasea richi ṭhenkahei ram dong chu amahi a nit: Jordan thlang tiang ram kha dongtumin an nei a. Manasea nai lutîr Makira, Gileada pa kha, mi hâi, ridoi mi a nit a, Jordan sak tiang ram Gilead neh Basan khah a dong a.

²Jordan thlang tiang ram kha Manasea nam insungkua danghei murdi dongtumin an inei a nit; kha ruihei kha: Abiezera ruihei, Heleka ruihei, Asriela ruihei, Sekema ruihei, Hefera ruihei, Semida ruihei an nit. Khahei kha Josefa naipa Manasea nam insungkua lupui upahei chu an nit.

³Manasea nai Makira, kha nai Gileada, kha nai Hefera, kha nai Jelofehada khan chu naiipa nei loiin nai nupang bang ai nei a nit. Kha a nainuhei riming chu Malaii, Novaii, Hoglaii, Milkaii, Tirzaii hei an nit.

⁴Khante, Thiampu Eleazara hei, Nuna naipa Josua hei neh Israel nam ruaituhei ziangah an hong a, “Keini khom kin suapuihei lâiah hin dongtum bîk ram ne pe rangin PUMAPA khan Mosia khah thu ai pêk a nit,” an ti a. Khanchu, PUMAPA thupêk angkan an urêng ipahei angkah khan dongtum bîk ram ipeh sa an nit tâk a.

⁵Khasikah khan Jordan sak tiang Gilead neh Basan ram banah, Manasea richihei khan dongtum sômkah a îndong sa a nit.

⁶Manasea nama nupanghei khan ipahei angkan dongtum an dong sa sikah khan Gilead ram kha Manasea richi mi danghei khan an idong a nit.

⁷Manasea richihei ram dong kha Aserhei ram donga rithoka Sekem kho sak tiang Mikmethat kho kâr khah a nit. Sim tiang isongin ramrî khah a fe a, Entapuaa omhei khah a huam a.

⁸Tapua ram hih Manaseahei idong a nit, a khopui Tapua kha chu Efraimhei ta a nit.

⁹Ramrî kha Kana vadungheiah a zuk fe a. Vadunghei rikam sim tianga khuahei khah Efraimhei ta a nit, Manaseahei ram sunga om ni khom seh; ramrî khah vadunghei mâr tiang rikamah a fe thal a, Mediteranean tuipuiah a suak a.

¹⁰Sim tiangah khan Efraimhei an om a, Mâr tiangah khan Manaseahei an iom a nit. Aserhei kha mâr thlang tiangah khan an om a, an ram mâr sak tiangah khan Isakarhei an om a.

¹¹Aserhei neh Isakarhei dongtum sungah khan Manase khua Beth-Sean neh Ibleam khopui, an kôlvêl khotehei neh a om a. Tuipui rikama Dor khua hei, Endor hei, Taanak hei, Megido hei neh an kôlvêl khuahei khom ai om a nit.

¹²Hi khuaa omhei hih Manasea richihei khan ûm isua thei mak a; khasikin, Kananhei khah kha munah khan an lai om mai a nit.

¹³Israelhei an hong rât tak tak nung khomah khan ûm isua ual khâi mak a; khanniseh, tharum sin itho rangin an imang ngai a nit.

¹⁴Josefa richihei khan, “PUMAPA khan ṭhat a ne vur a, kin hong pung ok tâk a, mun khatkah bang ithôm kin dongtumin ni ne ipêk hi?” an ti a.

¹⁵Josua khan, “Nin pung ok a, Efraim tlângram hi a irchêp tet a nitin chu Perizhei neh Refaimhei omna ram rampuihei khi nin omna rangin hang rivât rei,” a ti a.

¹⁶Anni khan, “Tlângram ringot chu lar chêp tet mai a ti; phâia om Kananhei lakin thîr tâli an nei a; Jezreel phâia omhei neh Beth-Sean khopui neh a kôlvêl khuahei khan ridoina thîr tâli an inei korong a nit,” an ti a.

¹⁷Josua khan Efraim neh Manasea richihei khah a sâm a, “A nit, nin pung ok tâk a, irât khom nin rât ok tâk; khasikin, rangtum khatka nêka tam nin idong rang a nit.

¹⁸Tlângram khi nin dongtum rang a nit. Rampui ni man seh, rivât unla, a rêngkan lua riai rei. Kanan mihei khan chu thîr tâlihei ineiin, rât ok khom sela, ûm isua thei zel nin ti,” a ti a.