Read Biete JOSUA 18 Bible Online

JOSUA 18 - Biete bible

JOSUA 18

¹Ram kha an lâk riai nungah khan Israel mihei kha Siloah an ribûm a, Ritongna Puan-In an dâng a.

²Israel richihei lâiah khan an dongtum ram la pe no nam sarikah an la om a.

³Josua khan an ziangah, “PUMAPA nin chibulhei Pathianin nangni a lei ipêk tâk ram hi itena sôt im lua loiin nin la irvuak rang hi?

⁴Nam tinin mi pasal ithumkah chit rithlang suak unla, anni kha ram var fang suak rangin lei tir rong; nam tin dong rang indang sela, ki ziangah hong ithlun nôk riseh.

⁵Ram kha mun sarikan ṭhen sela, Judahei kha sim tiang an dongtum ramah om an ta; Josefa richihei kha mâr tiang an dongtum ramah om an ti.

⁶Ram mun sarika ṭhen dân rang kha riziak suak an ta, hong chôi an ta, keiman PUMAPA, ei Pathian maah thla lei sân pêk ki ti.

⁷Levia richihei chu sem sa no rei, PUMAPA thiampu nitna sin hih an dongtum rang chu a nit. Reubena hei, Gada hei neh Manasea richi rizâtkahei chu Jordan nisua tiangah khan Pathian suak Mosia khan an dongtum rang kha a pêk diam tâk a,” a ti a.

⁸Josua ti lam angkana tho rangin mihei khah an rithok suak a, an ziangah, “Ram pumpui rifang suak unla, richik riai unla; khanchu, ki ziangah hong ithlun nôk rei. Keiman PUMAPA maah thla nangni lei sân pêk ki ti,” a ti a.

⁹Khanchu, kha mihei khah an suak a, ram kha an rifang riai a, khopui iomhei khah an richik riai a, mun sarikan an ṭhen a, an riziak suak a. Silo khuaa riabukah Josua ziangah an riziakna bu khah an hong chôi a.

¹⁰Josua khan PUMAPA maah thla a sân a, Israel mihei kha a nam namin ram khah a sem pêk tâk a.

¹¹Benjamina richihei dongtum ram, a rui ruia risem rang kha indang masa tak a nit a. Judahei neh Josefa richihei kârah an om tâk a.

¹²An ram dong, mâr tiang ramrî chu Jordan dunga rithoka Jeriko depa itlâng pangah a fe a, nithlâk tiang isongin Beth-Aven ramchâr a tlung a.

¹³Luz khua (Bethel an iti ngai) a khan a fe thal a, sim tiang ipanin a fe a, Beth-Horon itlâng chuannuai khua Atarot-Adar kha a tlung a.

¹⁴Hi tlâng thlang tiangah khan, sim isongin ramrî khah a kôi a, Kiriat-Baal khua, (Kiriat-Jearim an ti ngai) kha a tlung a; hi khua hih Juda richihei idong khopui a nit. Amah hih thlang tianga a ramrî chu a nit.

¹⁵Sim tianga ramrî kha Kiriat-Jearima rithokin arphut a, sak tiang ipanin Nefto tuikuangah a fe a.

¹⁶Hinom isuntu tlâng dunga fen Refaim phâi lûtnaah a zuk fe a, Hinom phâi a pan a, Jebushei khua sim tiang pangah a fe a, Enrogel a tlung a.

¹⁷Mâr tiang pang a kôi nôk a, Ensemes a tlung a, Adumin fena ṭum idepa Gelilot khuaah a fe a, Bohana lungah (Bohana chu Reubena naipa a nit) a fe thal a.

¹⁸Jordan kôl itlâng mâr tianga fen phâiah a zuk fe a,

¹⁹Beth-Hogla tlâng dung mâr tiangah khan a fe thal a, Jordan dung sua Tuipui Ithi-ah a zui suak a nit.

²⁰Amahi Benjamina richi rui tin ram dong rang ramrî chu a nit.

²¹Benjamina richi a rui ruia an risem rang khuahei chu hihei hi a nit; Jeriko, Beth-Hogla, Emek-Keziz;

²²Beth-Araba, Zemaraim, Bethel;

²³Avim, Para, Ofra;

²⁴Kefaramoni, Ofni, Geba neh an kôlvêl khuahei; a rêngkan khopui sômleiinikah a nit.

²⁵Khabanah khan Gibeon, Rama, Beerot;

²⁶Mizpa, Kafira, Moza;

²⁷Rekem, Irpeel, Tarala;

²⁸Zela, Haelef, Jebus (Jerusalem an ti ngai), Gibea, Kiriat-Jearim hei neh an kôlvêl khuahei; a rêngkan khopui sômleiilikah a nit. Hihei hi Benjamina richihei a rui ruia an dong rang khua chu a nit.