Read Biete JOSUA 19 Bible Online

JOSUA 19 - Biete bible

JOSUA 19

¹Rangtum â nikna kha Simeona richihein, a rui ruia an risem rangin an dong a. An ram dong kha Juda richihei ram dong sunga mi a nit.

²Hihei hi a huam; Beerseba, Seba, Molada;

³Hazar-Shual, Bala, Ezem;

⁴Eltolad, Bethul, Horma;

⁵Ziglag, Beth-Markabot, Hazar-Sosa;

⁶Beth-Leboat, Saruhen hei; a rêngkan khopui sômleiithumkah neh an kôlvêl khuahei a nit.

⁷Hihei khom hi a ṭang sa: Ain, Rimon, Ether, Asan; a rêngkan khopui ilikah neh an kôlvêl khuahei a nit.

⁸Amahin an kôlvêl khua Balat-Beer (Rama an iti ngai) sim tiang idênin ai huam a nit. Simeona richihei khan hi ram hi an idong chu a nit.

⁹Juda richihei hin an inang nêka rizat ram an dong sikin an ram ṭhenkah kha Simeona richihei ziangah ipe a nit.

¹⁰Zebuluna richihein, a rui ruia an risem rang ram rangtum ithumna khah an dong a. An ram dong kha sim mong Sarid khua dên a nit.

¹¹Khantak ata an ramrî kha thlang tiang Mareala a pan a, Dabeset ipâl thlengin Jokneam sak tianga vadungah a suak a.

¹²Sarid sak tiang Kislot-Tabor ramrî a hang sun a, Daberat ipâl thlengin ramrî kha Jafiaah a hang fe a.

¹³Suk tiang isongin Gath Heferah a fe thal a, Ethkazin fe thlengin Rimon lampuiah Nea panin arkual a.

¹⁴Mâr tiang ipanin ramrî kha Hanathonah a fe a, Iftahel phâiah ai mong a nit.

¹⁵Hi khopuihei khom hi ai ṭang sa a nit; Kata hei, Nahalal hei, Simron hei, Idala hei, Bethlehem hei neh an kôlvêl khuahei; a rêngkan khopui sômleiinikah ai huam a nit.

¹⁶Zebulunhei idong ramah khan hi khopui neh an kôlvêl khuahei hi ai om a nit.

¹⁷Rangtum â lina kha Isakara richihein a rui ruia risem rangin an dong a.

¹⁸Hihei hi ai huam a nit: Jezreel, Kesolot, Sonem;

¹⁹Haferaim, Sion, Anaharat;

²⁰Rabit, Kision, Ebez;

²¹Remet, En-Ganim, En-Hada neh Beth-Pazez a nit.

²²An ramrî khan Tabor tlâng a rô a, Sahazumai neh Beth-Semes irô thalin Jordan a tlung a; a rêngkan khopui sômleiirukkah neh an kôlvêl khuahei ai huam a nit.

²³Isakara richihei khan a rui ruia an risem rangin hi khopuihei hi, an kôlvêl khuahei neh an idong a nit.

²⁴Rangtum ringana kha Asera richihei khan a rui ruia risem rangin an dong a.

²⁵Hihei hi ai huam a nit: Helkat, Hali, Beten, Aksaf;

²⁶Alam Melek, Amad neh Misal hei hi a nit. Thlang tianga a ramrî khan Karmel neh Sihor Libnat a pâl thleng a,

²⁷sak tiang isongin a kôi a, Beth-Dagon ipâl thlengin Zebulun ram a sun a; Iftahel phâiah a lût a, mâr tiang ipanin Beth-Emek neh Neiel a pan a, Kabul a tlung a.

²⁸Ebron hei, Rehob, Hamon, Kana heiah a fe a, Sidon khopui a sun a.

²⁹Ramrî kha a kôi a, Rama neh Tura khopui kul a sun a, Josaah a kôi nôk a, Mediteranean tuipuiah a mong a. Mahabat, Akzib,

³⁰Uma, Afek, Rehob hei a huam a, an kôlvêl khuahei neh a rêngkan khopui sôminika ilikah a nit.

³¹Hi khopuihei neh an kôlvêl khuahei hi Asera richihei khan a rui ruia an risem ranga an ram dong chu a nit.

³²Rangtum â rukna kha Naftalia richihein a rui ruia an risem rangin an dong a.

³³Mâr tiang ramrî kha Helefah arphut a, saso kung omna Zananim ipâl thlengin, Adaminekebah a fe a, Jamnia irô thalin Lakum a tlung a, Jordanah ai mong a nit.

³⁴Thlang tiang ipanin Aznot Taborah a fe a, Hukok a tlung a, sim tiang Zebulun itônin a fe a, Aserhei ram a va sun a; sak tiang pangah Jordan, thlang tiang Aserhei ram kha an ramrî a nit.

³⁵Kulpui inei khuahei Zidim, Zer, Hamath, Rakhat, Kineret;

³⁶Adama, Rama, Hazor;

³⁷Kedes, Edrei, En-Hazor,

³⁸Iron, Migdalel, Horem, Bethanat, Beth-Semes neh an kôlvêl khuahei; a rêngkan khopui sômleiikuakkah ai huam a nit.

³⁹Hi khopui neh an kôlvêl khuahei hi Naftali richihei khan an rui ruia risem ranga an idong ram chu a nit.

⁴⁰Rangtum â sarina kha Dana richihein a rui ruia risem rangin an dong a.

⁴¹Hihei hi ai huam a nit: Zora, Estaol, Irsemes;

⁴²Saalbim, Aijalon, Ithla;

⁴³Elon, Timna, Ekron;

⁴⁴Elteke, Gibethon, Baalat;

⁴⁵Jehud, Beneberak, Gathrimon;

⁴⁶Mejarkon,[8] Rakon, neh Joppa kho kôlvêl ramhei a nit.

⁴⁷Dana richihei hi irâlhein an ram an lâkpêk zoiah khan, Lais khuaah an fe a, an rûn a, an lâk a, a mihei kha an that a; anmani ta rangin an dong pêk tâk a. Khua riming hi an richibul riming ichôiin Dan an ti a.

⁴⁸Hi khopuihei neh an kôlvêl khuahei hi Dana richihei khan a rui ruia risem rangin an idong a nit.

⁴⁹Ram an risem zoiah khan, Israel mihei khan Nuna naipa Josua kha a ran pialin ram an pêk sa a.

⁵⁰PUMAPA thupêk angkan ama dit rithlang tak Timnat Sera khua an pêk a, Efraim tlângrama om a nit; khua kha ân ding inṭhat a, a om tâk a.

⁵¹Thiampu Eleazara hei, Nuna naipa Josua hei neh Israel nam ruaituhei khan hi ram iṭhen hih thla sânin Silo khuaah khan Ritongna Puan-In kotbâiah an isem infel tâk a nit.