Read Biete JOSUA 2 Bible Online

JOSUA 2 - Biete bible

JOSUA 2

¹Khante, Nuna naipa Josua khan Kanan ram, abîkin Jeriko khua khah va en zâi rangin mi inikah, Sitim muna rithokin enthlâttu a tir a. Khante, an va fe a, khopui an tlungin chu, nochizuar khatkah arming Rahabi inah an lût a, amakhan an tlung tâk a.

²Khante, mihein, vuan zânah hin ram en vêl rangin Israelhei an hong itin Jeriko khua rêng khah an iril a.

³Khanchu, Jeriko khua rêng khan, “Ni ina tlung khualmihei khah hong ṭhui roh; ram pumpui enthlât ranga hong kêng an init,” itia ril rangin Rahabi ziangah mi a tir a.

⁴Rahabi khan enthlâttu mi inikahei khah a ṭhuia, a thup a; khante, rêng mi tirhei ziangah, “A nit, mihei chu ki ziangah an hong a; khannisela, taka rithoka hong im an init reh mang e: Anni chu zân zîng khopui kul dâikot khâr rang zoro vêlah khan an suak nôk tâk. Taktiang im an ipan rang khom reh mang e. Khanniseh, nin rizûl zelin chu la môk phâk nin ti,” a ti a. (Nikhomsela, Rahabi khan enthlâttu pasal inikahei khah inchungah a ṭhui a, ngaiditel ai buk kârah khan ai thup ṭian a nit a.)

⁷Khante, rêng mihei khan Jordan dung varâl kâina dênin an rizûl tâk a, Khante, arzûltuhei khah an suak kaneh khan kul dâikot khah an khâr nôk zel tâk a.

⁸An zâl man Rahabi chu inchungah a hang fe a;

⁹an ziangah “PUMAPA khan hi ram hih nangni a pêk tâk iti ki riat. Nangmani ṭin hi ram sunga om mi murdi hih an rilo a înthing a nit.

¹⁰Aigupta ram ata nin hong suaka PUMAPA khan nin matonah Tuipui Sen nangni ân kang pêk thuhei kin lei riat a, Jordan dung râla Amorhei rêng inikah Sihona neh Oga nin that tâk dânhei khom kha kin lei riat a.

¹¹Amakhah kin lei riat kaneh kin ṭi a, mi tinin nangni an ṭi a, an indôp zoi tâk a, nangmani sikah hin ân dôp ino zel om khâi mak. PUMAPA nin Pathian hi rinêng neh rivân Pathian a nit.

¹²Khasikah khan nin chunga lungkhamna ki înlang angkah hin nangni khomin ki insungmihei chungah lungkhamna inlang rangin nin Pathian riming ichingin ṭonginkung unla, richik theina rangin thil imanih ne peh rei.

¹³Ki nu neh ki pahei, ki urênghei neh an insungmihei chu zua unla, ne that loi rangin ṭonginkung rei,” a ti a.

¹⁴Kha mihei khan a ziangah, “Ni ne înzôk angkan nang inzôk kin ti; kin sintho hi ne sîr suak non chu PUMAPA khan hi ram hih a ne pêk tikin lung nang inkhamin ni chungah iamom takkan sin kin ti,” an ti a.

¹⁵Kho kulpui itôna in inei a nit a, tukver ata khah anni chu rui irualin â ṭhum tâk a.

¹⁶An ziangah khan, “Itlâng tiang ipanin fe rei; khanonchu, nangni rizûltuhei khan nangni an mu duai lôiin. Amakhan sûn thumkah ribih unla, nangni rizûltuhei an hong kîr nôk zoi tenan nin omna lampui tiang chu la fe rei,” a ti a.

¹⁷Mihei khan a ziangah, “Ni ṭong nen risâm lam takkan thông kin ti.

¹⁸Ringai roh, hingka hin ni tho rang a nit, hi ram kin hong lût tikin hi pat sen hih ni ne ṭhumna tukverah hin lei thlung inla, ni ziangah ni nu hei, ni pa hei, ni ṭâ hei neh ni pa insung mihei murdi chu ni insungah ṭhui inlût riai roh.

¹⁹Tukhom ni insunga om ṭian iloia tolâia suakkah chu ama lu chungah a thisen chu om a ti, keini chu thiamno changin om no ning ung: khanniseh, tukhom insunga ni zianga om ṭianhei chungah kut itlâkin a omin chu kin lu chungah a thisen chu om a ti.

²⁰Nikhomsela, kin thiltho hi ne sîr suakin chu, keini khom ṭong ni nen risâm lam angkah hin tho ual no ning ung e” an ti a.

²¹Ani khan, “Nin thu angkah takin ni riseh,” a ti a. Khanchu, anni khah an fe tâk a, an fe zoiin chu tukverah khan patsen khah a thlung tâk a.

²²Enthlâttuhei chu an fe a, itlângramah khan an fe a, sûn thumkah an ribîk a. Arzûltuhei khan sûn thumka sung lam thluanin an zong a; nikhomsela, anni khah mu mak a; khanchu, Jeriko tiang an kîr nôk tâk a.

²³Khanungchu, enthlâttu pasal inikahei khom itlâng ata an zuang ṭum a, vadung an rikan a, Josua ziangah an va tlung a, an chunga thil itlung murdi khah an isîr pêk a.

²⁴Josua ziangah, “PUMAPA khan ram pumpui chu ei kutah a ne lei ipêk tâk a nit, kha bang khom ni loiin a ram sunga om mi murdi khom eimani ne ṭin an rilo ân thing zoi tâk,” an ti a.