Read Biete JOSUA 20 Bible Online

JOSUA 20 - Biete bible

JOSUA 20

¹Khanungchu, PUMAPA khan Josua ziangah,

²“Israel mihei iril roh, Mosia thu kî pêk angkan zôkna rang khua indang rei.

³Kutke châia mi thattu kha amakhan itlân lût a ta; khanchu, thisen phuba latua rithokin ai zôk thei rang a nit.

⁴Kha khuaah khan itlân a ta, khopui lûtnaah iding a ta, kha kho ulianhei ziangah a hong itlân lûtna bi â ril rang a nit; anni khan mun lei inrifûk pêk an ta, an lâiah in-om an ti.

⁵Thisen phuba latu khan a hong rizûl khomin an lei inzôk rang a nit, kutke châia a nit a, nel sika that ai nit ino a nit.

⁶Kha khuaah khan Israelhei ribûmin a chungthu an rêl infel mâkah neh kha lâi zoroa thiampu laltaka om khah a thi mâkah chu a om rang a nit; khanungah khan mi thattu kha a hong itlân suakna, ama khua, ama insung ngêiah kîr nôk thei tâng a ti,” a ti a.

⁷Hi khuahei hih Israel mihei rang neh an lâia om nam danghei ranga zôkna rang khua an înkunghei chu a nit. Naftali tlângram Galili bialah Kades khua; Efraimhei ram tlângramah Sekem khua; Juda richihei ram sung tlângramah Kiriat-Arba khua, (Hebron an iti ngai)

⁸Jordan sak tiang pangah, Jeriko sak tianga Reubena ram itlâng phâizôl ramchâr khuaah Bezer khua; Gadhei bialah Ramot khua; Manaseahei ram Basan bialah Golan khua hei kha a nit.

⁹Khihei khi a nit Israel mihei neh an lâia nam dang iomhei ranga zôkna rang khua an înkunghei chu a nit. Tukhomin kutke châiin mi that duai sela, hi khuaah hin itlân lût thei a ta; a chungthu Israelhei ribûmin an rêl infel mâkah chu thisen phuba latu kutah khan ai thi no rang a nit.