Read Biete JOSUA 21 Bible Online

JOSUA 21 - Biete bible

JOSUA 21

¹Levia richi ruaituhei kha thiampu Eleazara hei, Nuna naipa Josua hei neh Israel nam ruaituhei ziangah,

²Kanan ram Silo khuaah khan an hong a, “PUMAPA khan kin omna rang khopuihei neh a kôlvêl ran vâina rang ram iôl ipeh rangin Mosia kha a îril a nit,” an hong ti a.

³Israel mihei khan, an ram dong sungah hi khopuihei hi, a kôlvêl ram iôl, ran vâina rang neh khan PUMAPA thu angkan Levia chihei kha an pêk a.

⁴Levia richihei lâiah Kohatha richihei kha khopui an isem masa tak a nit. Arona richi thiampuhei kha Juda richi hei, Simeona richi hei neh Benjamina richi hei ram donga rithokin khopui sômleiithumkah an pêk a.

⁵Kohatha richi danghei kha Efraim hei, Dan hei neh thlang tianga Manasea richi rizâtkahei rama rithokin khopui sômkah an pêk a.

⁶Gersoma richihei kha Isakar hei, Aser hei neh Naftali hei, sak tianga Manasea hei dongtuma rithokin khopui sômleiithumkah an pêk a.

⁷Meraria richihei kha Reuben hei, Gad hei neh Zebulun rama rithokin khopui sômleiinikah an pêk a.

⁸Mosia zianga PUMAPA thupêk angkan Israel mihei khan thlasânin hi khuahei hi, a kôlvêl ram iôl, ran vâina rang neh khan Levia chihei kha an pêk a.

⁹Juda neh Simeon richihei rama rithokin hi khopuihei hi

¹⁰Levia richi Kohatha nai Arona richihei zianga an ipêk chu a nit. Anni hi khua an isem dong masa tak an nit.

¹¹Juda tlângram khopui Arba khua, (Arba kha Anaka pa a nit) Hebron an iti ngai kha, a kôlvêl ram iôlhei neh khan an pêk a.

¹²Khanniseh, a khopui îhuap loimun neh a kôlvêl khuahei kha chu Jefunea naipa Kaleba zianga pe a lei nit tâk a.

¹³Zôkna rang khuaa inkung Hebron banah hi khopuihei hi thiampu Arona richihei rang an înkung chu a nit: Libna,

¹⁴Jatir, Estemoa;

¹⁵Holon, Debir;

¹⁶Ain, Juta, Beth-Semes khuahei kha an kôlvêl ram iôlhei neh khan Juda neh Simeona richihei ram donga rithokin khopui ikuakkah an pêk a.

¹⁷Benjamin rama rithokin hi khopui ilikah hi an pêk sa a: Gibeon, Geba;

¹⁸Anathot, Almon khuahei neh an kôlvêl ram iôlhei neh khan an ipêk a nit.

¹⁹A rêngkan khua sômleiithumkah neh an kôlvêl ram iôl, ran vâina rang kha thiampu Arona richihei kha an ipêk a nit.

²⁰Levia nai Kohatha richi danghei ziangah Efraimhei rama rithokin khua ṭhenkah an pêk sa a.

²¹Khopui ilikah an pêk: Zôkna ranga inkung Efraim tlângram khopui Sekem banah Gezer;

²²Kibzaim, Beth Horon hei neh an kôlvêl ram iôlhei neh khan an ipêk a nit.

²³Dan rama rithokin khua ilikah an pêk sa a: Elteka, Gibethon;

²⁴Aijalon, Gathrimon neh an kôlvêl ram iôlhei neh khan an ipêk a nit.

²⁵Thlang tianga om Manasea richihei rama rithokin khopui inikah Tanak neh Gath rimon neh an kôlvêl ram iôlhei neh khan an pêk a.

²⁶Kohatha richi danghei ziangah khan hi khua sômkah hi, an kôlvêl ram iôl, ran vâina ranghei neh khan an ipêk chu a nit.

²⁷Levia chi, pôl khatkah, Gersona richihei kha sak tiang Manasea richihei ramah khan khopui inikah an pêk a, Basan biala Golan (Zôkna Khopui) neh Beestera kha an kôlvêl ram iôl, ran vâina rang neh khan an ipêk a nit.

²⁸Isakara richihei rama rithokin khopui ilikah Kision, Daberat;

²⁹Jarmut, En-ganim hei neh an kôlvêl ram iôl, ran vâina rang neh khan an pêk a.

³⁰Aserhei rama rithokin khopui ilikah: Misal, Abdon;

³¹Helkat, Rehob hei neh an kôlvêl ram iôl, ran vâina rang neh khan an pêk a.

³²Naftalihei rama rithokin khopui ithumkah: Galili rama Kedes (Zôkna khopui) neh Hamoth Dor, Kartan hei neh an kôlvêl ram iôl, ran vâina rang neh khan an pêk a.

³³Gersona panam rui dang danghei khan khopui sômleiithumkah, an kôlvêl ram iôl, ran vâina rang neh khan an idong a nit.

³⁴Levia richi mi dang, Meraria richihei kha Zebulunhei rama rithokin khopui ilikah: Jokneam, Karta;

³⁵Dimna, Nahalal hei neh an kôlvêl ram iôl, ran vâina ranghei neh khan an pêk a.

³⁶Reubenhei rama rithokin khopui ilikah: Bezer, Jahaz;

³⁷Kedamot, Mefaat hei neh an kôlvêl ram iôl, ran vâina rang neh khan an pêk a.

³⁸Gadhei rama rithokin khopui ilikah: Gilead biala Ramot (Zôkna khopui), Mahanaim,

³⁹Hesbon, Jazer hei neh an kôlvêl ram iôl, ran vâina ranghei neh khan an pêk a.

⁴⁰Meraria richihei kha a rêngkan khopui sômleiinikah an ipêk a nit.

⁴¹Israel mihei ram sunga Levia chihei khopui ranga inkung kha khua sômilika iriatkah a nit, an kôlvêl ram iôl, ran vâina ranghei neh khan an ipêk a nit.

⁴²Hi khopui murdihei hih ran vâina ranga ram ihual korong a nit.

⁴³An chibulhei ziangah ipe a lei înkung tâk ram kha PUMAPA khan Israelhei kha a pêk tâk a. An lua nungah khan om mun an khuar tâk a.

⁴⁴PUMAPA khan ân kung lam angkan ram pumpui kha râlringamin a siam a. An irâl khatka lua khomin lei idan thei mak a, PUMAPA khan nêna ai pêk mai a nit.

⁴⁵Israelhei zianga ṭong a înkung murdi chu PUMAPA khan ai len mai a nit.