Read Biete JOSUA 22 Bible Online

JOSUA 22 - Biete bible

JOSUA 22

¹Josua khan Reubena richihei, Gada richihei neh Manasea richi rizâtkahei kha a koi a,

²an ziangah, “PUMAPA suak Mosia thu nin ôi a, thu nangni kî pêk murdi nin zôm a;

³nin suapuihei chu zoro sôt takka sung marak loiin nin Pathian PUMAPA thupêk nin zôm mai a.

⁴Atûn chu, PUMAPA nin Pathianin a înkung angkan râlringamin a în-om tâk a nit hih; khasikin, PUMAPA nin Pathian suak Mosian Jordan râla ram nangni ai pêkah kîr nôk ta rei.

⁵PUMAPA suak Mosian dân nangni ai pêk kha zôm unla, nin Pathian PUMAPA chu lungithlungin a thupêkhei chu zôm unla, a lungdo sin mai unla, amah chu ituh ngitin tititakin neh ṭhatnemringai takkan a sin tho rei,” a ti a.

⁶Khanchu, Josua khan ṭhat a vur a, hi thuhei hih iben anni chu an in tiang a tir ikhîr a, “Bera neh kêl hei, tangka neh rângkachak hei, dâr neh thîr hei neh thlukthla hei itam takkah neh richong okkan nin ikîr nôk rang a nit a. Nin irâlhei ata thil nin ilâkhei kha nin suapui danghei sem sa rei,” a ti a. Khanungchu, an in tiang an kîr nôk tâk a. Mosia khan Manasea richi rizâtkahei kha Jordan sak tiang Basan ram a pêk a, rizâtkah danghei kha chu Josua khan Jordan thlang tiang Israel richi danghei neh khan ram a pêk a.

⁹Khanchu, Reubena richihei, Gada richihei neh sak tiang Manasea richihei khah an in tiang an kîr nôk a. Israel danghei kha chu Kanan rama Silo khuaah khan an mâk a, Mosia zianga PUMAPA thupêk angkan an ram dong Gilead ram kha an pan tâk a.

¹⁰Reubena richihei, Gada richihei neh sak tiang Manasea richi rizâtkahei khan Jordan thlang tianga om Kanan rama Gelilot kha an tlung a, vadung rikamah khan mâichâm ilian inthang roinpui tak an siam a.

¹¹Israel mi danghei khan, “Reubena richihei, Gada richihei neh sak tiang Manasea richihei khan Jordan vadung rikam ei ram tiangah khan mâichâm ilianpa an siam a,” itin an iril a.

¹²Israel mihei khan amakhah an riatin chu sak tiang namhei idoi rangin an rêngkan Silo khuaah an ribûm tâk a.

¹³Khanungchu, Israel mihei khan thiampu Eleazara naipa Finehasa kha Reubenhei, Gadhei neh sak tiang Manaseahei ziangah Gilead ramah an tir a.

¹⁴Finehasa rualin Israel nam ruaitu sômkah, nithlâk tianga om nam sômka lâia an panam ruaitu khatkah chit kha an fe sa a.

¹⁵Gilead an hong tlung a, Reubenhei, Gadhei, sak tianga Manaseahei ziangah khan,

¹⁶PUMAPA mi ribûmhei rithûla ṭongin, an ziangah, “Hi thilisual tak hi Israelhei Pathian chungah îtho sika nin ithôm ai nit? Hi mâichâm nin isiam hi PUMAPA chungah nin rihel tâk tina a nit, a thu nin izôm khâi ino a nit hi.

¹⁷Peor muna thilisual ei itho kha nin iriat khâi ino mani? PUMAPA khan ama mihei khom ripui ân rivoi a, kuttum ai tho a nit khah.

¹⁸PUMAPA chu zui nuam loiin nin iom rang mani? Vuanah hin PUMAPA chungah nin rihelin chu naktûk Israel mi murdi chungah a ning ai thik rang a nit.

¹⁹Nin ram hi amah isônna tlâk nino rakka nim a nitin chu Ritongna Puan-In omna tiangah hin zuang unla, kin lâiah ram nin inei sa rang im ki ta; PUMAPA chungah neh kin chungah rihelin ei Pathian mâichâm nino chu mâichâm dang siam no rei ba.

²⁰Zera naipa Akana khan thil iser tho loi rua khah a tho a, Israel mi pumpui chungah ningthikna a zuang iṭum a nit. Akana bang ni loiin mi dang khom an ithi a nit khah,” an ti a.

²¹Reubenhei, Gadhei neh sak tiang Manaseahei khan Israel ruaituhei kha an sâm a,

²²“PUMAPA chu pathianhei Pathian a nit. Pathianhei Pathian PUMAPA khan kin thona bi chu a riat a; nangni khomin reh sa unla, kin inuam a nit. PUMAPA chunga rihel kin nit a, a chungah iamom ino kin nitin chu, iring idamin nen om khâi no rei.

²³PUMAPA thu ôi loiin hâlrivâm thillanhei, bubâl thillanhei, ringeina thillanhei kin lanna rang keimani mâichâm kin isiam a nitin chu PUMAPA ngêi khan kuttum ne tho riseh.

²⁴Khangkan ni mak; nakanah nin richihein kin richihei ziangah hingka hin la hong tîng an ti iti kin iṭi a nit ual; ‘PUMAPA, Israelhei Pathian chu chubai iûn sa rang nin nit im a?

²⁵Jordan vadung kha Reubenhei, Gadhei neh ei ramrî rangin a siam a, PUMAPA hi isôn sa rang ni mak chei,’ itin nin richihei khan kin richihei la khap duai an ti.

²⁶Khanchu, hâlrivâm thillan neh ribôlna chi dang dang lanna ranga mâichâm hi kin isiam ni mak.

²⁷Nin mihei neh kin mihei, rualithar thiaihein, PUMAPA ziangah ngêi ei hâlrivâm thillanhei, ringeina thillanhei neh ribôlnahei ei lan ngai iti an riat theina rang neh nin richihein kin richihei ziangah, ‘PUMAPA hong isôn rang ni mak chei,’ an ti nona ranga siam kin nit.

²⁸Khasikin, khangkan kin richihei ziangah an ti duaiin chu, ‘Kin chibulhei hin PUMAPA mâichâm angkah chian hi mâichâm hih an lei isiam a nit. Hâlrivâm thillan manih, ribôlna manih kin lanna rang ni mak a, keimani neh nangmani ranga riatmaina risin a nit,’ itia an sâm theina ranga siam kin nit.

²⁹PUMAPA chungah rihel tum tlak mang ung, amah nungisongin kin thillan hâlna, kin bubâl thillan neh ribôlnahei lanna rang mâichâm dang isiam kin itum ni mak e. Ei Pathian mâichâm, Ritongna Puan-In kottuala om banah chu mâichâm ran inding no ning ung,” an ti a.

³⁰Thiampu Finehasa neh a zianga om nam ruaitu, thlang tianga om nam ruaitu sômkahei khan Reubenhei, Gadhei neh sak tianga Manaseahei thu khah an riatin an ilung a dam tâk a.

³¹Thiampu Eleazara naipa Finehasa khan an ziangah, “PUMAPA hin chu a ne iompui mai a nit iti kin riat tâk. PUMAPA chungah rihel mak chei a, PUMAPA khomin Israelhei kuttum ai tho no rang a nit,” a ti a.

³²Khanungchu, Reubena neh Gada richihei omna Gileada rithokah khan Finehasa neh Israel ruaituhei kha Israel mihei omna Kanan ramah khan an kîr a, an thu khah an ithlun a.

³³Israel mihei kha an ilung a tluk a, Pathian an inpâk a. Reubena neh Gada richihei kha an omna ram ata nuai inrimang vang ranga rithok suak thu isîr khâi mak a.

³⁴Reubena neh Gada richihei khan, “Hi mâichâm hih eimani kârah PUMAPA hi Pathian chu a nit iti riatpuitu a nit,” an ti a. Khasikah khan “Riatpuitu,” an be a.