Read Biete JOSUA 23 Bible Online

JOSUA 23 - Biete bible

JOSUA 23

¹PUMAPA khan Israelhei kha an irâlhei ata isôt takkah râlringama an om nungah khan Josua kha a kum a tamin a hong ûnlian ok tâk a.

²Israel mi murdi, upahei, ruaituhei, roirêltuhei neh ulianhei kha a koibûm a, an ziangah, “Ki hong ûnlianin ki tar ok tâk a.

³Nangmani sikin hi muna nam danghei chunga nin Pathian PUMAPA thiltho khah nin mu a; PUMAPA nin Pathian khan nangmani rang pialin irâlhei kha nangni ai doi pêk a nit.

⁴Ei înê tâk namhei omna ram neh ei la înê nohei omna ram kha nin ram dongtum rangin nangni kî sem infel pêk diam tâk a nit; khosak tiang Jordan dung ata thlang tiang Mediteranean tuipui idênin.

⁵Anni khah PUMAPA nin Pathianin nin matonah lâizâm intho thiai mai a ta, ûm inrimang riai a ti; PUMAPA nin Pathianin nangni a înkung pêk angkan an ram chu dong pêk nin ti.

⁶Khasikin, Mosia dân lekhabua riziak murdi izôm tum ngit unla, zui ngêt rei, khatka lua phial tlak no rei.

⁷Nin lâia nam dang la omhei neh hin richiapol no rei; an Pathian riming ching no unla, an riming ichingin ṭongrikhâm no rei, chubai iûnin an maah khom ikhûn tlak no rei.

⁸Atûn tena nin la îtûk khap angkan PUMAPA chu ituh khap rei.

⁹Nam itam takkah neh irât tak tak nin matonah PUMAPA khan a ûmisua mai a, tute nangni lei idan thei an iom ino a nit.

¹⁰A înkung angkan PUMAPA nin Pathian khan nin irâlhei nangni a doi pêk sikin mi khatkah khomin a sâng têl nin iûm rizûl a nit.

¹¹PUMAPA nin Pathian chu lungthlung ngêt ngêt rei.

¹²Nung nin song a, nin lâia nam dang iomhei neh nin richiapola, nin rinei pol duaiin chu,

¹³PUMAPA nin Pathian khan hi namhei hih nin matonah nangni ûmisua pêk tlak khâi no ni a. PUMAPA nin Pathianin hi ram iṭha tak nangni ai pêka rithoka nin rimang riai mâkah chu nin ta rangin châng neh dîp iṭiom tak nîng an ta, zêpna ruirual neh mit isuntu riling nîng an ti iti rian fel rei.

¹⁴“Ringai ta u, atûn chu, rinêng chung dân angkan ki thi rang nikhua a tluk tâk. Tukhomin lunginîk takka nin sûtin chu PUMAPA nin Pathian khan thil iṭha nangni a înkung murdi khah nangni a pêk thiai iti riang nin ti. Ân kung lam angkan a tho mai a, khatkah khom a irmâi omak e.

¹⁵PUMAPA nin Pathian khan thil iṭha a înkung kha ai len mai angkah takin nangni ai pêk ram ata nin rimang riai mâkah chu thil ṭhano tho a înkung khom kha ai tho ngêt rang a nit.

¹⁶PUMAPA nin Pathianin izôm ranga nangni ai ti a thuthlung kha, nin isiat a, Pathian dang nin pan a, an sin nin thon chu, PUMAPA ningthik kha ṭuang a ta, ram iṭha tak nangni ai pêka rithokah hin rimang riai nin ti,” a ti a.