Read Biete JOSUA 24 Bible Online

JOSUA 24 - Biete bible

JOSUA 24

¹Josua khan Israel namhei kha Sekem khuaah a koibûm a. Israel upahei, an nam ruaituhei, roirêltuhei neh ulianhei kha Pathian makungah an hong rilang a.

²Josua khan mi murdi ziangah, “PUMAPA Israelhei Pathian khan hingka hin a ti: ‘Tianlâiah khan nin chibulhei kha Eufratis vadung râl tiangah khan an om ngai a, Pathian danghei chubai an iûn ngai a nit. Kha mihei lâiah khan mi khatkah Tera a nit a, Abrahama neh Nahora pa kha a nit.

³Nin pu Abrahama kha Eufratis vadung râla rithokah khan Kanan ram pumpuiah ki ṭhui kual a. Ani kha Isaka ki pêk a, richi itam takkah ki pêk a.

⁴Isaka kha Jakoba neh Esauva ki pêk a, Seir tlânghei kha Esauva ziangah a omna rangin ki pêk a. Jakoba neh a naihei kha chu Aigupta ramah an fe a.

⁵Nungah chu Mosia neh Arona kha ki tir a, Aigupta mihei khah inkhôk lungzîng ki sak a, nangni rêk chu nangni kî ṭhui suak tâk a nit.

⁶Nin puhei kha Aigupta rama rithokin ki ṭhui suak a, Aigupta mihei khan sakor chungchuang mihei neh sakor tâlihein an hong rizûl a.

⁷Khannisela, Tuipui Sen an hong tlungah khan lungzîngin an ne sam a, Aigupta mihei neh an kârah zîng richel chit ken om pêk a. Tuipui khan Aigupta mihei khah a chîm a, an rinîk riai tâk a. Aigupta rama ki thil thohei khah nin iriat a nit. “‘Ramchârah khan isôt takkah nin om a.

⁸Khanungchu, Jordan sak tianga om Amor mihei omna kha nangni ke ruai ithlun a. Nangni an doi a, khan nêna nangni ki pêk a, an ram kha nin dong tâk a. Nin matonah anni chu ki înrimang a nit.

⁹Khanungchu, Zipora naipa Balaka, Moab rêng khan nangni a lei doi a. Beora naipa Balaama kha vâni nangni sâm rangin â phung a.

¹⁰Balaama thu khah izoipui mang a, khasika khan ṭhat nangni a vur tâk a; khangkan Balaka kut ata nangni kî sanisua a nit.

¹¹Jordan dung nin rikan a, Jeriko khuaa mihei khan nangni an lei doi a; Amor mihei, Periz mihei, Kanan mihei, Hit mihei, Girgas mihei, Hiv mihei neh Jebus mihei khomin nangni an lei doi a; khannisela, nêna nangni ki pêk a.

¹²Amor rêng inikahei vâng chu khandai manih phel manih nin mang nang loiin nin matonah khuaibêl ki tir a, ki în-ûmrizûl a nit.

¹³Nin itho suak ni viat ino ram nangni ki pêk a, nin isiam ni viat ino khopuiah nangni ki în-om a nit. Atûn chu nin iphun nino grep irâ nin fâk a, nin iphun nino oliv irâ nin ifâk a nit hih,’ a ti,” a ti a.

¹⁴Josua khan, “Khasika khan PUMAPA kha marit unla, tititakin a sin tho rei. Mesopotamia ram neh Aigupta rama nin puhei ibiak ngai Pathian rilimhei khah paih riai rei.

¹⁵PUMAPA sin itho hi ṭha nin ti non chu nin chibulhei ibiak, Mesopotamia ram pathianhei sin khâm nin itho nuam, atûna nin omna ram mi Amorhei pathianhei sin hîm? Vuansûnah hin nin inuam tak rithlang rei. Keimah neh ki insungmihein chu PUMAPA sin hih kin itho rang a nit,” a ti a.

¹⁶Mipuihei khan, “PUMAPA Pathian khah imarakin pathian danghei sin tho tlak no ning ung e.

¹⁷Amah PUMAPA kin Pathian ngêi hi a nit Aigupta ram bôia rithoka kin chibulhei neh keimani ne ṭhui suaktu chu a nit. Kin mitmuah thil roinpui tak takhei a tho a, nam tin chi tin lâiah kin fena kipah a ne înzôk mai a nit.

¹⁸Hi ram kin hong tlung khomah hin PUMAPA hin kin matonah hintaka om Amorhei ai ûmisua riai a nit. Khasikin, PUMAPA sin hi a nit kin itho rang, amah bang hi kin Pathian chu a nit,” an ti a.

¹⁹Josua khan mipuihei ziangah, “PUMAPA sin hi tho thei no tin u; ani chu Pathian rithiang a nit a; pathian dang rêng rêng a theimâk vak a, nin siatnahei nin sualhei nangni zâ no nih.

²⁰PUMAPA chu nungisongin pathian dang sin nin tho duaiin chu nung nangni song a ta, kuttum inrik nangni thông a ti; nin chungah ṭha tak tak ngai khom sela, nangni inrimang riai a ti,” a ti a.

²¹Mipuihei khan Josua ziangah, “Pathian dang sin tho tlak no ning ung; PUMAPA sin a nit kin itho rang,” an ti a.

²²Josua khan an ziangah, “PUMAPA sin itho nin irthlang hi nangmani ngêiin nin irthlang a nit iti retuhei chu nin nit,” a ti a. Anni khan, “O, a nit, thuretuhei kin nit,” an ti a.

²³Josua khan, “Khangkan a nitin chu nam dang pathian rilim nin idônhei khah paih riai rei. Israelhei Pathian PUMAPA bang khah ipom rei,” a ti a.

²⁴Mipuihei khan Josua khah an sâm a, “Kin Pathian PUMAPA sin khah thông kin ta, a thu khom zôm mai kin ti,” an ti a.

²⁵Khanchu, kha nî-ah khan Josua neh mipuihei khan thu an thlung a; an zôm rang dân neh thupêk a siam pêk a.

²⁶Josuan khahei kha Pathian Dân Bu-ah khan arziak lût a; lungilianpa a lâk a; Sekem khuaa PUMAPA mun rithiang saso thing bulah khan a phun a.

²⁷Josua khan mipuihei ziangah, “En ta u, hi lung hih ei thuretu a nit; ei zianga PUMAPA thusîr murdi khah a riat riai a, nin Pathian nin mâk nona ranga nin thuretu a nit,” a ti a.

²⁸Khanungchu, Josua khan mipuihei khah ân fe a, mahni ramah an kîr chit tâk a.

²⁹Khanungah khan, kum rizalei sômkah a nitin Josua kha a thi tâk a.

³⁰Gaza tlâng mâr tiang, Efraimhei ram, tlângrama, ama ram Timnat Seraah khan an phûm a.

³¹Josua dam sungah khan Israelhei khan PUMAPA sin an tho a, a thi nung khomah khan anmani mit ngêia PUMAPA sintho murdi mutuhei dam sungkah chu an tho mai a.

³²Josefa ruak, Israelhein Aigupta ram ata an hong ichôi ithlun kha Sekem khuaah khan an phûm a, Jakoban tangka rizaka pe a, Sekema pa Hamora richihei ziang ata a irchôk ramah khan an iphûm a nit. Hi ram hih Josefa richihei khan an idong mai tâk a nit.

³³Arona naipa Eleazara khom a thi a, Efraimhei tlângrama om, a naipa Finehasa dongtuma an ipêk ram Gibea khuaah an iphûm tâk a nit.