Read Biete JOSUA 3 Bible Online

JOSUA 3 - Biete bible

JOSUA 3

¹Atûkah chu Josua neh Israel mipuihei khah zîngah an thoi a, Sitim mun ata chu an rithok a, Jordan dung tiang an pan tâk a, Jordan dung an va tlungin chu vadung an rikan man an riak a.

²Sûn thumka nungah chu ruaituhei khan riabuk khah an var fang a.

³Mipuihei ziangah “PUMAPA nin Pathian Thuthlung Bôm khah Levia richi thiampuhein an rizôn lâi nin mu tenan chu nin riabuk ata rithok unla zui rei.

⁴Hi lampui hih nin la fena ngaino a nit sikin anni khan nin fena rang lampuiah ma nangni ruai pêk an ti. Nikhomsela, Thuthlung Bôm khah nâi tlak no rei, mûk sânginikah vêl nin kâr arlat rang a nit,” an ti a.

⁵Josua khan mipuihei ziangah, “Rithâr rithiang rei, naktûkah hin PUMAPA khan nin lâiah thil rikhêl takhei ai sin rang a nit” a ti a.

⁶Josua khan thiampuhei ziangah, “Thuthlung Bôm hih rizôn unla, mipuihei matonah fe rei,” a ti a. Khanchu, Thuthlung Bôm khah an rizôn a, mipuihei ma an iruai tâk a.

⁷PUMAPA khan Josua ziangah, “Mosia zianga kî om angkah khan ni ziangah khom kî om rang a nit iti an riat theina rangin vuanah hin Israelhei murdi mitmuah nang kî chôiinrisâng rang a nit.

⁸Khanchu, Thuthlung Bôm rizôntu thiampuhei khah Jordan dung an tlungin chu tui khah ipâl a, vakôl kong tena tui omnaah khan iding mai rangin thu peh roh,” a ti a.

⁹Khanungchu, Josua khan mipuihei ziangah, “Hong unla, PUMAPA nin Pathian thu hi hong ringai rei.

¹⁰Nin fe thiai lâiin PUMAPA khan Kanan mihei, Hit mihei, Periz mihei, Girgas mihei, Amor mihei, Jebus mihei kha nin matonah ûmisua ngêt a ti. Pathian iringah chu nin ziangah a om mai iti chu,

¹¹Nin ma ruaiin rammual pumpui PUMAPA Thuthlung Bôm khan Jordan dung arkan tikah khan riang nin ti.

¹²Mi sômleiinikah, Israel nam ikipah mi khatkah hong rithlang suak rei.

¹³Rammual pumpui PUMAPA Thuthlung Bôm rizôntu thiampuhei kepha kha Jordan tuiah arngat kaneh khan, Jordan dung tui zuang iluanghei khah chât a ta; sak tianga rithoka zuang iluang murdi khah a lomin mun khatkatah a îding ṭian rang a nit,” a ti a.

¹⁴Bu ât zoro a nit sikin, Jordan dung khah tui ilianin valong a sip zuak mai ngai zoro a nit a. Mipuihei chu Jordan dung rikan rangin an puan in ata an suak a, Thuthlung Bôm rizôntu thiampuhei kha mipuihei matonah khan an fe a; vadung an va tlung a, Thuthlung Bôm rizôntu thiampuhei ke khan vakôla tui khah a chuang kaneh,

¹⁶sak tianga rithoka tui zuang iluang mai khah a chât tâk a, tuinâr tiang ilah takah Zarethan ram kôla Adam khopui idênin artial ngut tâk a; Tuipui Ithi tianga zuk iluang khom a chât val tâk a. Khanchu, mipuihei kha Jeriko khua ridîn takah khan varâl an kâi tâk a.

¹⁷Israel mihei kha an rêngkan rinêng ichâra lônin Jordan dung varâl khah an kâi a, PUMAPA Thuthlung Bôm rizôntu thiampuhei kha Jordan dung inlâinah khan rinêng ichârah mipui an kâi riai mâkah chu an iding ṭian mai a.