Read Biete JOSUA 4 Bible Online

JOSUA 4 - Biete bible

JOSUA 4

¹A nam pumpui khan Jordan dung an rikan zit zoiin chu PUMAPA khan Josua ziangah,

²“Mipui lâia rithokin mi sômleiinikah, nam tina mi khatkah chit rithlang suak inla, khahei khan

³Jordan dung inlâina thiampuhei idingna mun taka lung sômleiinikah kha, an sikah khatkah chit riput sela, vuanzâna nin riakna rang riabukah iseh rangin thu peh roh,” a ti a.

⁴Khanchu, PUMAPA ti pêk lam angkan Israel mipuihei lâi ata mi sômleiinikah, nam ikipah mi khatkah chit arthlang a, kha a irthlanghei khah a koi a,

⁵an ziangah, “PUMAPA nin Pathian Thuthlung Bôm matonah khan Jordan dung inlâinah fe unla, Israel nam ikipin, nin sikah lung khatkah chit ripuh rei.

⁶Kha lunghei khah PUMAPA sintho riatmaina la hong nîng a ta, sûn matonah nin naihein, ‘Hi lunghei hih îtina mani?’ itia nangni an la hong ridon tikin chu,

⁷nangmanin an ziangah, ‘Thiampuhein rizôn puma PUMAPA Thuthlung Bôm khan Jordan dung arkan lâiah khan Jordan dung tui chu ai chât pit a nit. Khasikin, hi lunghei hih PUMAPA sintho Israelhein kumkhuaka an riatmaina rang a nit hih,’ nin la hong iti rang a nit,” a ti a.

⁸Mi sômleiinikahei khan Josua thu khah an zôma, Josua zianga PUMAPA thupêk lam angkah takin, anni khan Israelhei a nam ikipah khatkah chit, Jordan dung inlâina taka lung, sômleiinikah kha an lâk a; an riabukah an riput a, amakhan an sia tâk a.

⁹Thuthlung Bôm rizôntu thiampuhei idingna tak, Jordan dung inlâinah khan Josua khan lung sômleiinikah a phun a, kha lunghei khah atûn tenah hin a lai om mai a nit.

¹⁰Mosian Josua thu a lei ipêk tâk angkan PUMAPA khan mipuihei sin ranga Josua thu ai pêk kha an sin zoi riai mâkah chu Bôm rizôntu thiampuhei khah Jordan dung inlâinah khan an iding mai a, mipuihei kha an rimot a, varâl an kâi tâk a.

¹¹Mipuihei murdi varâl an kâi zoi riai nungin chu PUMAPA Bôm rizôntu thiampuhei kha mipuihei mitmuah khan an kâi sa tâk a.

¹²Reubena richihei, Gada richihei neh Manasea nam rizâtkahei khan râlthluk ichôiin, Mosian an zianga thu a lei pêk lam angkah khan mipui ma ruaiin varâl an lei kâi masa a.

¹³Râlthluka rithluk diam mi sîngilikah vêl ridoi rang risiam thlâm Jeriko kôl phâiah khan PUMAPA mitmuah varâl an ikâi a nit.

¹⁴Kha nî-ah khan PUMAPA khan Josua kha Israelhei murdi mitmuah a chôiinrisânga; a damsung kârkah chu Mosia an imarit angkah takah khan an marit tâk a.

¹⁵PUMAPA khan Josua zianga, “Thuthlung Bôm rizôntu thiampuhei kha Jordan dung ata hong isuak rangin thu peh roh,” a ti a.

¹⁷Kha angkah khan Josuan thiampuhei kha, “Jordan dung ata kha hong suak ta rei,” a ti a.

¹⁸Hingka hin a nit a, PUMAPA Thuthlung Bôm rizôntu thiampuhei kha Jordan dung ata an hong suak a, thiampuhei ke khan imuang a chuang kaneh, Jordan tuihei kha a luang ngai lam angkah takin a luang nôk a, matona angkan vakuangah khan a luang nôk zut zut tâk a.

¹⁹Jordan dung kha a thla khatna, a sûn sômnî-ah khan mipuihei khan varâl an ikâi a nit. Jeriko sak tiang pang Gilgalah ommun an khuar tâk a.

²⁰Jordan dung ata an hong irput lung sômleiinikah kha Josuan Gilgalah khan a phun a.

²¹Israel mihei ziangah khan, “Hi nungah nin richihein an pahei ziangah, ‘Hi lunghei hih îtinâm ai nit hi? itia an la hong ridon tikin chu,

²²Israelhei khan Jordan dung hi rinêng ichârin an irkan a nit,’ itin nin la îsîr pêk rang a nit.

²³PUMAPA nin Pathianin Tuipui sen an rikan riai mâkah tuipui tui a lei înkang chat tâk angkah khan, PUMAPA nin Pathianin Jordan dung hi nin rikan riai mâkah chu tui iluanghei hi nin maah a închât a nit.

²⁴Khasikah khan rinênga nam tinrêngin PUMAPA kut hi ai rât a nit iti riang an ta, PUMAPA nin Pathian chu kumkhuakan an iṭi rang a nit,” a ti a.