Read Biete JOSUA 5 Bible Online

JOSUA 5 - Biete bible

JOSUA 5

¹Jordan dung râl thlang tianga om Amor rêng murdihei neh Mediteranean tuikhanglian rikama om Kanan ram rêng murdihei khan Israelhei varâl an kâi riai mâkah chu PUMAPA khan tuihei kha ân kangchat iti an riatin chu, Israelhei sikah khan iṭin an rilo ân thing zoi tâk a, ân dôp ino rêng rêng om khâi mak a.

²Kha lâi takah khan PUMAPA khan Josua ziangah, “Meilung chemte siam inla, Israelhei hi an iser tan pêk roh,” a ti a.

³Khante, Josua khan meilung chemte ngaih khah a siam a, Israelhei chu Gibeat-ha-aralotah[1] khan an iser a tan pêk a.

⁴Josuan an iser a tan pêkna chu hi sikah hin a nit: Aigupta ram ata hong isuak ipa râl ikâp thei tâk murdi kha chu ramchârah khan an ithi zoi riai tâk a nit.

⁵Aigupta ram ata hong isuak murdi kha chu sertan isai korong an nit a; nikhomseh, Aigupta ram ata an hong suak nunga ramchâra lamlâia suak murdihei kha chu ser la tan ino an nit.

⁶PUMAPA rôl an ringaisak nuam no sikin Aigupta ram ata hong isuak, râl ikâp thei tâk tena mihei rêng rêng chu inrimanga an om vang idênin Israelhei kha ramchârah kum sômilikah an ivâi a: PUMAPA khan vânirisâma a lei iti tâk angkah ngêiin, an richibulhei zianga ṭongrikhâma a lei înkung tâk dût neh khuaitui luangna ram kha an mu rang ai phal ino a nit.

⁷Khanchu, an richi, anmani rithûla a îndinghei kha Josua khan ser ai tan pêk a nit; lampuiah khan an ser itan a nit no sikin, ser tan ino an lei init pial a nit.

⁸Mipuihei murdi ser an tan riai zoiin chu, an dam mâkah chu an riabuk, an omna chitah khan an om a.

⁹PUMAPA khan Josua ziangah, “Vuanah hin Aigupta mihein nangni an musitna kha nangmani ata ki înlumpai tâk a nit,” a ti a. Khanchu, kha mun khah atûn tenan Gilgal an hong iti tâk a nit.

¹⁰Israelhei khan Gilgalah om mun an khuar a, Jeriko kôl phâiah khan kha thla sûn sômleiilinî kholoiah khan Kalkan Kût an mang a.

¹¹Kalkan Kût zoi tûk nî zelah khan kha rama vâng bu bai chol pol ino neh tangpêr an fâk tâk a.

¹²Kha rama bu an nêk nî-a rithokah khan Manna ṭul khâi mak a, Israelhei khan Manna khah dong khâi mak; kha nî ata khah Kanan rama bu neh bâl khah an ifâk tâk a nit.

¹³Jeriko kho kôlah a om lâiah khan Josua kha a tang a, a hang en a, mi khatkah khandai ichôia ding a matonah a mu a; Josua khan a hang nâi a, a ziangah, “Kin tianga ṭang im nî nit, kin irâlhei tianga ṭang im?” itin ardon a.

¹⁴Ani khan, “Ni mang e; PUMAPA sipai ruaitu ki nit a, kî zuang tâk a nit,” itin a sâm a. Khanchu, Josua kha rinêngah â bok a, chubai a ûn a, a ziangah, “Ki Rêngpan a bôi ziangah hin im iti rang ai nei?” a ti a.

¹⁵PUMAPA sipai ruaitu khan Josua ziangah, “Ni pheikok khah khêng roh; ne dingna mun khah mun rithiang kêng ai nit,” a ti a. Khanchu, Josua khan a pheikok kha a khêng tâk a.