Read Biete JOSUA 6 Bible Online

JOSUA 6 - Biete bible

JOSUA 6

¹Israelhei an lût thei nona rangin Jeriko khua kulpui khah an khâr khap a; tute suak thei mak a, tute khom lût thei ual mak a.

²PUMAPA khan Josua ziangah, “En ta, Jeriko khua chu a rêng neh a sipai irât lung idethei hi ni kutah nang kî pêk tâk a nit.

³Râlkâp mi murdihei neh khopui hi a sûnah voikah vêl suak ngai nin ta, kha angkah khan sûn rukka sung nin tho rang a nit.

⁴Thiampu sarikan Thuthlung Bôm maah khan berachal riki bekul sarika chôiin fêng an ta; A sûn sarinî-ah khan chu khopui kha voi sarikah vêl suak nin ta, thiampuhein bekul kha an tum rang a nit.

⁵Berachal riki bekul tum irî vung vung nin riat kaneh mipui nin rêngkan iring takkan ipâi rei; khanchu, khopui kulpui khah chim rum rum a ta, râlkâp mihei khan an ridîn chitah lût an ti,” a ti a.

⁶Josua khan thiampuhei khah a koi a, an ziangah, “Thuthlung Bôm hih rizôn unla, Thuthlung Bôm maton tiangah khan thiampu sarikan berachal riki bekul sarikah chôi riseh,” a ti a.

⁷Khanungchu, mipuihei ziangah khan, “Fe unla, khopui kha vêl suak rei, PUMAPA Thuthlung Bôm maton tiangah khan râlthluka rithlukhei khah fe masa riseh,” a ti a.

⁸Josuan mipuihei ziangah thu â sîr zoiin chu a ti lam angkah takah khan an tho a; PUMAPA Thuthlung Bôm maton tiangah khan berachal riki bekul ichôi thiampu sarikahei khah an fe a, bekul kha an tum a; PUMAPA Thuthlung Bôm rizôntu thiampuhei khan an zui a.

⁹Râlthluka rithlukhei kha bekul itum thiampuhei matonah khan an fe a, râlthluka rithluk mipuihei khan Thuthlung Bôm inungtiang khom an hong zui a; thiampuhei khan an lôn pumin bekul khah an tum thiai mai a.

¹⁰Josua khan mipuihei kha, “Ikhêk no unla, nin ṭong irî khom iria ni no riseh; ipâi ranga thu nangni ki pêk mâkah chu nin bâi ata thu rêng rêng suak no riseh, thu nangni ki pêk tik bangah lâ pâi rei,” a ti a.

¹¹Khanchu, PUMAPA Thuthlung Bôm rizôn pumin khopui khah voikah an vêl a; khanungchu, an riabukah khan an fe a, an riak tâk a.

¹²Josua kha zîng takah a thoi a, thiampuhei khan PUMAPA Thuthlung Bôm khah an rizôn a.

¹³PUMAPA Thuthlung Bôm maton tiangah khan berachal riki bekul ichôi thiampu sarikahei khah an fe a, bekul khah an fe pumin an tum thiai mai a, râlthluka rithlukhei kha an matonah an fe a; PUMAPA Thuthlung Bôm kha râlthluka rithlukhei ngirin an hong zui a.

¹⁴A sûn niknî khomin khopui kha voikah an vêl suak nôk a, an riabukah an kîr nôk a; khangkah khan sûn tin sûn rukka sung khah an tho a.

¹⁵A sûn sarinî-ah khan chu zîng takah ârkhuanah an thoi a, an tho ngai balam angkan khopui khah an vêl suak a, kha nî sûnah khan chu khopui khah voi sarikah an vêl suak a.

¹⁶A voi sarina an vêl suakin chu thiampuhei khan bekul an hang tum ma tetin Josua khan mipuihei ziangah, “Tho, ipâi ta rei, PUMAPA khan khopui hi nangni ai pêk tâk a nit.

¹⁷Khopui hi a sunga thil iom murdi neh hin PUMAPA ta ranga serinran korong a nit. Ei mi tirhei a lei inzôk sikin Rahabi nochizuar bang kha amah neh a insunga a zianga om murdihei kha chu izua rang a nit.

¹⁸Serinran tâk khah rizukin nin lâk rang ni mak, nin inrimang riai rang a nit; nin lâkin chu kha thil sikah khan Israel mihei riabukah siatna rikhêl tak nin îthlun rang a nit.

¹⁹Tangkarua hei, rângkachak hei, sumsen neh thîra siam bûrbêlhei kha chu PUMAPA rang ni zit a ta; PUMAPA sum inah iseh rang a nit,” a ti a.

²⁰Khanchu, thiampuhei khan bekul khah rikhông nguai nguaikan an tum a, mipuihein bekul irî khah an riatin chu an ikhêk dur dur a, kulpui khah a chim tâk a; khanchu, mipuihei kha anmani ridîn chitah khan an fe a, khopuiah khan an lût a, khopui kha an lâk tâk a.

²¹Khopui sunga mi murdi nupang, ipa, â chîn â lian, sial hei, bera hei, sakuartung hei a rêngkan khandaiin an that infâi vang a.

²²Josua khan ram va enthlâttuhei ziangah khan, “Nochizuar inah son va lût unla, a zianga ṭong nin lei inkung lam angkan kha nupang khah ai nei murdi neh va ṭhui suak rei,” a ti a.

²³Khanchu, enthlâttu tlangvâlhei khah an va lût a, Rahabi kha a nu neh a pa hei, a ṭahei neh khan ai nei murdi neh khan an va ṭhui a, a suapui a tiang neh khua murdihei khom an hong ṭhui a; Israelhei riabuk kôlah khan an in-om tâk a.

²⁴Khopui kha a sunga thil iom murdi neh meiin an hâl vang a; tangkarua hei, rângkachak hei, sumsen neh thîra siam bûrbêlhei bang kha PUMAPA sum inah an sia a.

²⁵Jeriko khua lei va eninfel ranga mi ai tirhei a lei thup inzôk sikin nochizuar Rahabi chu, a pa insungkuahei neh, ai nei murdi neh Josua khan a zua a, atûn tenah hin Israelhei lâiah khan archihei khah an iom tâk a nit.

²⁶Kha lâiah khan Josua khan ṭong ikhir tak a tho a, “Hi Jeriko hong inding nôk itumkah chu PUMAPA vânisâm a chungah tlung riseh. “Tukhom a lungphûm iphûmtu chu a nai lutîr ichân sela; Tukhom a kul inkhârhei isiamtu chu a nai ithlum tak ichân riseh,” a ti a.

²⁷PUMAPA khan Josua chu a ompui a; ram pumpuiah khan arming ân thang tâk a.