Read Biete JOSUA 7 Bible Online

JOSUA 7 - Biete bible

JOSUA 7

¹Israelhei zianga PUMAPA thupêk, Jerikoa thil iom murdi inrimang vang rang iti khah zôm indik mak a. Mi khatkah arming Akana khan Jerikoa thil ama ta rangin a lei lâk a, khasikah khan PUMAPA chu Israelhei chungah khan a ning a thik tak tak a. Akana kha Juda richi Zera panama mi Zabdia nai Karmia naipa a nit.

²Bethel sak tiang Beth-Aven kôla om Ai khua hang ien zâi rangin Josua khan Jerikoa rithokin mi a tir a, an ziangah, “Hang fe unla, ram hang en zâi ta u,” a ti a. Khante, a mi tirhei khah an hang fe a, Ai khua chu an hang en zâi a.

³Josua ziangah an zuang kîr nôk a, a ziangah, “Mi murdi chu hang fe kher no riseh, mi sânginika manih, sângithumka manih hang fe sela, Ai khua kha hang rûn riseh; mi murdi hang insôl rang nang no nih; iroi chekah bang kêng an init,” an ti a.

⁴Khanchu, mi sângithumkah vêlin an hang doi a; khanniseh, Ai khua mihei maah khan lâizâm siat an tho tâk a.

⁵Ai khua mihei khan kul dâikot bula rithokin Sebarim idên rakkan an lei rizûl a, an ûm rizûlnaah khan mi sômithumkah irukkah vêl an lei that a. Israel mihei lungril chu ân dôp zoi a, ṭinan a sip tâk a.

⁶Josua neh Israel ulianhei khan an puanhei an ipotthlêr a, PUMAPA Thuthlung Bôm maah khan an ibok a, an lu-ah pilvut an phul a, amakhan an mâia rinêng isikin kholoi idênin an ibok a.

⁷Khanchu, Josua khan, “O Pumapa PATHIAN, Amor mihei kuta peh rang neh inrimang rangin îtho tâk im, Jordan dung hih ni ne hong înrikan hi? Jordan dung râlah khan lungitluk takka om ṭian rang tâk pial.

⁸O PUMAPA, Israelhei kha hingkana an irâlhein rizûla lâizâm an itho tâk hi ingkan im ki tho rang tâk?

⁹Kanan mihei neh hi rama om murdihei hin riang an ta, ne hong hual an ta, an ne ithat inrimang vang rang a nit hi. Ner ming roinpui tak ihoina rangin ingkan im ni tho rang tâk?” a ti a.

¹⁰PUMAPA khan Josua ziangah, “Thoi roh, ithôm khangkana rinêngah ni îbok ṭian?

¹¹Israelhein thil an ithonsual a nit hi; ki Thuthlung izôm ranga thu kî pêk khah an îsiat a nit hi; thil inrimang riai rang kî ti khah an hong ilâk a nit. An hong irûka, an thup a, an neinun kârah an ithup a nit.

¹²Kha sik takah khan kêng Israelhein an irâlhei an ingam thei ino, inrimang riai rang kî ti thil khah a lei nit tâk sikin kêng irâlhein rizûlin lâizâm siat an itho. Inrimang riai rang thil khah nin lâi ata nin inrimang bak no zelin chu nin ziangah hin kî om khâi ino rang a nit.

¹³Thoi inla, mipuihei khah thâr inrithiang roh, ki makunga hong rangin inrisiam diam roh. Naktûka rangin rithâr rithiang riseh, keimah, PUMAPA Israelhei Pathianin kî ti a nit; ‘O Israelhei, nin lâiah hin inrimang riai rang kî ti thil khah â kol nin om, kha thilhei khah nin pai inrimang mâkah chu nin irâlhei inê thei khâi no tin u,’ a ti itin iril roh.

¹⁴Khanchu, zîngah a nam namin an hong rilang rang a nit. PUMAPA lei ibîk nam tak kha a rui ruiin an hong rilang nôk rang a nit; PUMAPA lei ibîk rui tak kha a insungkua kuan an hong rilang nôk rang a nit; PUMAPA lei ibîk insungkua tak kha a mimal malin an hong rilang nôk rang a nit.

¹⁵Tukhom thil inim lei ila kangân chu amah neh a insungmihei neh ai nei murdi ihâl vang rang a nit; PUMAPA thuthlung â siat sikin neh Israelhei chungah mualphoina rikhêl tak â îthlun a nit,” a ti a.

¹⁶Khanchu, Josua kha zîng takah a thoi a, Israelhei khah a nam namin a hong inrilang a; Juda namhei khah ibîk an nit tâk a:

¹⁷Juda namhei khah a rui ruiin a hong inrilang nôk a, Zera ruihei a bîk a, Zera ruihei khah a insungkua kuan a hong inrilang nôk a; Zabdia insungkua khah ibîk a nit a.

¹⁸Zabdia insungkuahei khah a mimal malin a hong inrilang nôk a. Khanchu, Juda richi Zera panama mi Zabdia nai Karmia naipa Akana khah iman a hong nit tâk a.

¹⁹Josua khan Akana ziangah khan, “Ki Naipa, PUMAPA Israelhei Pathian chu inpâk roh; tho a ziangah khan inpuang roh; ni sintho khah ne hang iril ta; ki ziangah hin thup viat no roh,” a ti a.

²⁰Akana khan Josua khah a sâm a, a ziangah, “PUMAPA Israelhei Pathian chungah khan thil ki lei ithonsual tâk a nit; hingka hin ki lei itho tâk a nit.

²¹Ei râllâk thil lâiah khan Babilon ram puan iṭha tak, tangkarua her inikah vêl neh rângkachak lûm her rizâtkah vêl ki mu a, ker zuk tak tak a; kî lâk tâk a nit. Ki puan insungah rinêngah ki phûm a, tangkarua chu a thuai ita takah kî sia a nit,” a ti a.

²²Khanchu, Josuan mi a tir a, puan insungah khan an va tlân a; a ti lam angkan a puan inah khan a lei ithup zan chu a nit a, thuai ita takah khan tangkarua khom a lei om a.

²³Puan in sung ata khah an hong lâk suak a, Josua neh Israelhei murdi makungah khan an hong chôi a; anni khan PUMAPA maah khan an lei sia a.

²⁴Josua neh Israelhei murdi khan Zera naipa Akana khah tangkarua hei, puan hei, rângkachak hei neh a naipahei, a nainu hei, a sial hei, a sakuartung hei, a bera hei, a puan inhei neh ai nei murdihei neh khan an ṭhui a; Akor phâiah an fepui a.

²⁵Josua khan, “Îtho tak im khangkah dôra siatna khah kin chungah ni îthlun? Vuanah hin PUMAPA khan ni chungah siatna a îthlun rang a nit hi,” a ti a. Khanchu, Israelhei murdi khan Akana khah lungin an dêng that a; a insung mihei neh ai nei murdi khom lungin an dêng a, a rêngkan meiin an hâl inrimang vang tâk a.

²⁶A chungah khan lung an buk inrichuan ngut a, atûn tenah hin a la om mai a; khasikin, kha mun rimingah khan atûn tenan Akor phâi[2] an iti mai tâk a nit. Khanchu, PUMAPA ningthikna natinsat tak khah Israelhei chungah a dâi tâk a.