Read Biete JOSUA 8 Bible Online

JOSUA 8 - Biete bible

JOSUA 8

¹PUMAPA khan Josua ziangah, “Ṭi non la, indôp no roh; râlkâp mi murdi ni ziangah ṭhui inla, Ai khua hang irûn rangin fe roh. Ai khua rêng neh a mihei khah ni kutah nang kî pêk tâk a nit; a khua neh a ram pumpui khom ni ta ni tâng a ti.

²Jeriko neh an rêng chunga nî tho angkah khan Ai khua neh an rêng chungah khom ni tho rang a nit; khan atûna ṭumah hin chu neinun neh ranhei khah nangmani rangin dong thei nin ti. An rining loi kârin khopui khah â nungtianga rithokin nin rûn rang a nit,” a ti a.

³Khanchu, Ai khua rûn rangin Josua neh râlkâp mi murdihei khah an risiam a; Josua khan mi rât sângithumkah arthlang suak a, zânah ân fe a.

⁴An ziangah, “Khopui khah â nungtiang ridîp ṭian unla, khopuia rithoka ilah takah chu ribih no unla, risiam diam kan om rei.

⁵Khante, keimah neh ki zianga omhei murdi hin khopui khah hong nâi kin ta; khanchu, matona angkah khan ne doi ranga an hong suak kaneh, lâizâm thông kin ta;

⁶Khuaa rithoka ilavitka dêna an ner zûl tikin, matona angkah khan lâizâm ei itho tak tak manih sôn an ta;

⁷khanchu, nin ribîkna ata khah hong suak nin ta, khopui khah nin ilâk rang a nit. PUMAPA nin Pathianin nin kutah nangni ai pêk rang a nit.

⁸Khopui khah nin lâk kaneh, khopui khah hâl rei, PUMAPA thu angkah takin nin tho rang a nit; ringai rei, amakhah ki thu nangni pêk a nit,” a ti a.

⁹Josua khan anni khah ân fe tâk a, Ai khua thlang tiang Bethel neh Ai kârah khan an ridîp a, amakhan an ribîk ṭian a; Josua chu kha zânah khan mipuihei lâiah riabukah a riak a.

¹⁰Josua khah zîng takah a thoi a, râlkâp mihei khah a koi bûm a; khanchu, amah neh Israel ruaituhei khan ma an iruai a, Ai khua tiang an pan tâk a.

¹¹A zianga râlkâp mi omhei khah an hang fe a, an hang nâi a, khopui kôlah khan an hang fe a; Ai khua mâr tiang pangah khan ommun an hang khuar a; Ai khua neh an kârah khan phâi a om a.

¹²Khante, mi sângringaka vêl a ṭhui a, khopui thlang tiang pang Bethel neh Ai khua kârah khan ân ridîp a.

¹³Khanchu, khopui mâr tiang pangah a sipai ribupui ṭangmun khah an siam infel a, khopui thlang tiang panga ardîptuhei ṭangmun khom kha an siam infel a; Josua chu kha zânah khan phâizôlah khan a riak a.

¹⁴Ai khua rêng khan amakhah a lei mu a, a mihei neh zîng takah an thoi a; Israelhei neh an ridoina Araba[3] phâiah khan Israelhei idoi rangin rimot takkan an fe nôk tâk a; nungtianga rithokin khopui idoi ranga ridîp ṭian an om iti îte reh mak a.

¹⁵Josua neh Israelhei khan lâizâm itho angkan an om a; ramchâr lampuiah khan an itlân a.

¹⁶Ai khua mihei murdi khan anmani rizûl rangin an rikoi bûm a; khanchu, Josua kha an rizûl a, khopui ata ilah vitka dênin an rizûl tâk a.

¹⁷Ai khuaah khan Israelhei rizûl ino kha khatka lua om khâi mak a; khopui khah khâr loiin an mâk rak a, Israelhei kha an rizûl tâk a.

¹⁸PUMAPA khan Josua ziangah, “Ne fei chôi khah Ai khua tiang insongin ilek roh; khua khah ni kutah nang kî pêk rang a nit,” a ti a. Khanchu, Josua khan â fei chôi khah khopui isongin a hang tin tâk a.

¹⁹Khangkan â feiin a hang tin kaneh chu ardîptuhei khah an omna ata kha an hong suak zel a, khopuiah khan an lût a, an lâk tâk a; khua khah an hâl zel tâk a.

²⁰Ai kho mihei khan an inungtiang an hang enin chu, khopui kha rivân tiang a khû ding ngutin an hang mu tâk a, a taktiang a taktiang khom itlân theina zel nei khâi mak a, ramchâr panna lampuia tlân Israelhei khan an rihêl a, an lei hong doi nôk tâk a.

²¹Josua neh Israelhei murdi khan ardîptuhein khopui khah an lâk a, khopui kha ihâl a nit tak iti an hang mun chu an rihêl a, Ai kho mihei khah an that tâk a.

²²Khopui ilahtu Israelhei khah khosung ata an zuang suak nôk a, an zuang rizûl a; Israelhei khan an rihual khap tâk a, a ṭhen kiangtiang an om a, a ṭhen kiangtiang; khanchu, an that a, khatka lua zua viat mak a.

²³Ai khua rêng chu â ringin an man a, Josua ziangah an ṭhui a.

²⁴Ai khua mi, Israel rizûltuhei murdi kha ramchârah khan an lei that inrimang vang a, an that riai zoiin chu Ai khua an pan nôk a, kha khua om murdi khah khandaiin an that infâi riai tâk a.

²⁵Ai kho mi, kha nî sûna an ithat khah nupang ipa an rêngkan mi sînglei sânginikah an nit. Josua khan â fei ilekna kut khah Ai kho mihei murdi an that rimang vang mâkah chu iṭhum mak a.

²⁷Josua zianga PUMAPA thupêk angkah khan khopuia ranhei neh neinunhei kha chu Israelhei khan anmani ta rangin an nei a.

²⁸Khanchu, Josua khan Ai khua khah a hâl riai a, atûn tenan kho ram, nimnok buk angkan ai om mai tâk a nit.

²⁹Ai khua rêng khah kholoi idênin thinglêrah â khâi a; nithlâk rangton chu Josua thupêk angkan a ruak khah thinglêra rithokin an lâk a, khopui kul kotbâi kôlah khan an pai a, a chungah lung an buk inrichuan a; atûn tenah hin a lai om mai a nit.

³⁰Khanungchu, Josua khan Israelhei Pathian PUMAPA rang Ebal tlângah khan mâichâm a siam a.

³¹PUMAPA suak Mosian Israelhei zianga thu ai pêk, Mosia Dân lekhabua riziak angkan suk ino lung, thîra suk ino lung imangin PUMAPA Israelhei Pathian rang mâichâm a siam a. Amakhan PUMAPA ziangah hâlrivâm thillan neh Ringeina thillan an lan a.

³²Israelhei mitmu ngêiah Josua khan Mosia dân kha lungphêkah khan arziak suak a.

³³Israelhei murdi, an ulianhei, an ruaituhei, an roirêltuhei neh an lâia nam dang iomhei neh khan Levia richi thiampuhei irzôn PUMAPA Thuthlung Bôm ma songin, Thuthlung Bôm kiangtiang kiangtiang an iding a. Mipui arzâtkah kha Gerizim tlâng ma songin an iding a, arzâtkah khan Ebal tlâng tiang ma songin an iding a. Israel mipuihei ṭhat a vur rangin hingka hin iding ngai rang a nit iti PUMAPA suak Mosia thupêk angkah khan ân ding a.

³⁴An iding fel zoiin chu Dân bua thu murdi, ṭhatvurna thu neh vânisâm thuhei khah Josuan a tep suak a.

³⁵Mosia thupêk murdi khah Israel mi ribûm murdihei, nupanghei, naipanghei neh an lâia nam dang iomhei riatah khan Josua khan a rêngkan a tep riai a.