Read Biete JOSUA 9 Bible Online

JOSUA 9 - Biete bible

JOSUA 9

¹Jordan thlang tiang râla om rênghei murdi—tlângrama omhei, itlâng bul phâia omhei neh Mediteranean tuikhanglian rikam phâi thluana Lebanon tlâng idêna om Hit rênghei, Amor rênghei, Kanan rênghei, Periz rênghei, Hiv rênghei, Jebus rênghei khan Israelhei rât tlia kha an lei riat a.

²An rikoi bûm a, Josua neh Israelhei khah inrual takka idoi an tum a.

³Khannisela, Gibeon khuaa om Hiv mihei khan Jeriko khua neh Ai khua Josuan a tho dân an lei riatin chu

⁴vârrilet takkan an châng a, palâi angkan an risiam a, cholipui ilui tak tak an sakuartung an inpêl a, an uain savun peng ilui ripo ṭetṭut tâk a nit a,

⁵pheikok ilui tak tak an ribun a, puan ilui tak tak an ihâk a; ifarua an hong ichôi ibaihei kha â châr a, â ui tâk a nit.

⁶Israelhei riabuk Gilgalah khan Josua ziangah an va fe a, a ziangah neh Israelhei ziangah khan, “Ram ilah taka hong kin nit a, ringeina thuthlung nin ne isiampui rangin kin inuam a nit” an ti a.

⁷Khanchu, Israelhei khan Hiv hei ziangah khan, “Kin kôl inâia om mihei lei ni zan nin ta; ingkan im nin ziangah thu kin thlung thei rang?” an ti a.

⁸Anni khan Josua ziangah, “Ni bôihei kin nit hi,” an ti a. Josua khan an ziangah, “Tuhei im nin init hi? Taktianga rithoka hong im nin init?” itin ardon a.

⁹Anni khan a ziangah, “Ni bôihei hi ram ilah taka rithoka hong kin nit hi; PUMAPA nin Pathian riming inthang tliahei, Aigupta rama a sintho tin tinhei kin lei riat a,

¹⁰Jordan dung râla Amorhei rêng inikahei Hesbon ram rêng Sihona hei, Basan ram rêng Astarot khuaa om Oga hei chunga a sintho murdi khah kin lei riat a.

¹¹Kin ulianhei neh kin rama om murdihein, kin ziangah, ‘Lampuia rang cholamhei chôi unla, anmani va sôn rei, nin bôihei kin nit a, kin ziangah thu ne thlungpui rei, va ti rei,’ an ne ti a.

¹²Hi kin fâk ranga kin ibaihei hi nin zianga hong ranga kal kin hong ithok nî-a kin ina rithoka â luma kin hong ichôi a nit a; nikhomsela, atûnah hin en ta u, a châr zoi tâk a, ai ui zoi tâk a nit hi.

¹³Hi savun peng uain kin thunnahei khom hi â thar a nit a, en ta u, ai siatin, a uain khom a thûm zoi tâk a; kin puanhei neh kin pheikokhei khom hih kin hongna a lat sikin ai ṭet zoi tâk a nit,” an ti a.

¹⁴Israel mihei khan ifarua an hong ichôihei khah PUMAPA ridon bak iloiin an lei iham zel a.

¹⁵Khanchu, Josua khan anmani neh ringeina a siam a, anmani khah izua rangin an ziangah thu a thlung tâk a; khante, arbuk khôm ruaituhei khom khan an ziangah ṭong an risâm a.

¹⁶An ziangah thu an thlunga rithoka sûn thumka nungah chu Israelhei khan an kôl zela om an nit iti an hong riat suak tâk a.

¹⁷Khanchu, Israelhei khah an rithon a, sûn thumkah an fe tenan chu kha mihei omna khopui khah an va tlung a. An khopuihei chu Gibeon hei, Kefira hei, Beerot hei, Kiriat-Jearim hei a nit.

¹⁸Kha mihei khah Israel mihei khan kut an tlâk a irthiang ino a nit, PUMAPA Israelhei Pathian riming ichinga ruaituhei khan an ziangah ṭong an lei rikhâm tâk sikin Israelhei khan that mak a. Mipuihei khan an ruaituhei chungah an riphun tâk a.

¹⁹Nikhomsela, ruaituhei khan mipuihei ziangah khan, “PUMAPA Israelhei Pathian riming ichingin an ziangah ṭong kin lei rikhâm tâk a; khasikin, anmani chungah ei kut iṭhum a irthiang khâi ino a nit.

²⁰Hingka hin an chungah thông eila, lei zua ta rei u; khanonchu, an ziangah ṭong ei rikhâm tâk sikin ei chungah hin Pathian ningthikna ai tlung rang kêng,” an ti a.

²¹Ruaituhei ngir khan an ziangah, “Izuan om riseh; khanniseh, ei thing ipêltuah neh tui ichôitun hong om riseh,” an ti a. Ruaituhei ti lam angkan an hong om tâk a.

²²Khanchu, Gibeon mihei khah Josuan a koi a, an ziangah, “Kin kôla om ṭiankan, ram ilah taka rithoka hong kin nit itia ithôm nin ne ilêm?

²³Khasikin, vânisal nin hong nit tâk, tiklâi khomin suak ni mai tâng nin ta, kin Pathian ina itua rang thing ipêltu neh tui ichôitu rangin bôiin om mai tâng nin ti,” itin thu a pêk a.

²⁴Josua khah an sâm a, “PUMAPA nin Pathian khan hi ram hih nangni a pêk a, a sunga om murdi ithat vang rangin â som Mosia khah thu a pêk ngêt iti kin riat a; khanchu, ma nin hong fôn thiai tlia kin riatin nin ne that kin ṭi a; hingka hin kin hong itho tâk a nit.

²⁵Atûnah hin ni kuta om kin nit a; nangma ringaia â ṭha neh â dika ni riat lam angkah takin kin chungah hin tho roh,” an ti a.

²⁶Khanchu, Josua khan hingka hin a tho tâk a; Israelhei kut ata khah ân zôk a, Israelhein an that rang kha a khap a.

²⁷Josua khan kha nî-a rithokah khan bôiin a siam a, Israel mipuihei neh PUMAPA mâichâma itua rang thing ipêltu neh tui ichôitu rangin anni khah a sia tâk a. Atûn tenah hin kha sin khah an lai tho mai a nit.