Read Biete 2 THESALONIKA 2 Bible Online

2 THESALONIKA 2 - Biete bible

2 THESALONIKA 2

¹Suapuihei, ei Puma Jisua Krista zuang nôkna neh a zianga ei ribûmna rang thu-ah khan:

²“Pumapa Nikhua chu a tlung mai tak” tina rithla sikin manih, thu sikin manih, kin zianga rithoka lekhathon i-ang sikin manih nin lungril innîng zel loi rangin neh inbuai loi rangin nangni kin ingên a nit.

³Tutên ingkah lam khomin nangni ṭhui inrimang no riseh. Pathian chunga rihelna nungkhôn a hong tlunga, Dânisehpa, Rimang naipa khah a hong ilang mâkah chu kha Nikhua khah la tlung hi no nih.

⁴Ani khan mihein pathiana an ibe murdi neh sakho murdi doi a ta, an chunga omin ripâk a ti. Pathian Biak ina lua ifen iṭhung a ta, Pathianin ribe a ti.

⁵Nin ziangah ki om lâiah khan kha thu khah nangni ke ril ngai iti nin iriat khâi ino mani?

⁶Atûn a la tlung zel nona rangin îkhôkin manih a la khap iti nin riat a. A zoro takkan Dânisehpa khah hong ilang a ti.

⁷Dânisehpa khan atûn khomah hin inrûkkan sin ai tho thiai tâk a nit; nikhomsela, â dantu khah lâk inrimangin a om mâkah chu la lang hi no nih.

⁸Amakhah lâk inrimang a nit tenan chu Dânisehpa khah hong ilang tâng a ti; nikhomsela, ani chu Pumapa a zuang tenan a bâia rithuakin that a ta, a zuang nôkna roinpui takah khan zuang inrimang a ti.

⁹Dânisehpa khah Soitana ritha neiin hong suak a ta, sinthotheina tinrêngin sinrikhêl neh thilrikhêl lemhei sin a ti.

¹⁰Kha armang ranghei khah dikino takkan lam tinrêngah lêmna siatak imangin lêm a ti. Anmani saninring thei rang Thurchi Ṭha thutak khah an ipom no sik neh thutak lung an thlung no sikah khan an irmang rang a nit.

¹¹Khasikin, thuno an iamna rangin Pathianin sual sinthotheina ritha an ziangah a tir a.

¹²Thutak iam loia, sualna lôm ualhei murdi thiamno chang khai an ti.

¹³Suapui, Pumapa lungthlunghei, nangmani sikin Pathian ziangah lômthu sîr mai rang kin nit; Rithla Rithiangin nangni ân rithiang sik neh thutak nin iamna sika saninringna dong ranga Pathianin râ masa[1] rangin nangni a lei irthlang tâk a nit.

¹⁴Khangkana rangah khan ei Pumapa Jisua Krista roinpuina dong rangin nin zianga Thurchi Ṭha kin îsîr imangin nangni ai koi a nit.

¹⁵Khanchu, suapuihei, iding indet unla, kin thusîrah neh lekhathona thutak nangni kin înriseihei khah itûn det ngit rei.

¹⁶Khanchu, ei Pumapa Jisua Krista ngêi neh Pathian ei Pa, lung ne thlungtu, a lungkhamna sika kumtluang thlangamna neh tûngna ṭha ne petu khan,

¹⁷nin lungril chu thlangam sak sela, thil iṭha tinrêng nin isinah neh nin îsîrah nangni inrât mai riseh.