Read Biete 2 THESALONIKA 3 Bible Online

2 THESALONIKA 3 - Biete bible

2 THESALONIKA 3

¹A nungkhôn takah chu, suapuihei, kin ta rangin ne ṭongṭai pêk rei. Pumapa thu hih nin lâiah roinpui tak neh irât takka a îndar angkah khan ân dar mai theina rang neh,

²mi pualoihei neh mi sualheia rithokin Pathianin a ne kêlisua theina rang khomin ṭongṭai sa rei. Mi murdi lakin thu khah la iam mak a.

³Pumapa chu iiam a om a, ani khan nangni inrâtin mi sualheia rithokin nangni inzôkriam a ti.

⁴Thu nangni kin ipêk murdi nin zôm ngai a, la hong zôm mai nin ti iti khom Pumapaah khan kin itûng a nit.

⁵Khante, Pumapa khan nin lungrilhei chu Pathian lungthlungna reh nôk ual rang neh Krista angkana tuangdiarna nei rangin nangni kâiruai riseh.

⁶Khante, suapuihei, kin inriseina thu zui nuam iloia rithaboi takka om suapuiheia rithoka rikiang rangin ei Puma Jisua Krista rimingin thu nangni kin ipêk a nit.

⁷Kin sin lam takkan nin sin rang a nit iti nangmani rengin nin riatinfel a. Nin ziangah kin om lâiah khan kin ritha boi ngai mak e.

⁸Tute sanna a man peh loiin chu iham ngai mang ung e. Iham nêkan nin lâia tute ta ranga hekna kin nit nona rangin sûn zân sin ithon kin isôl ngai a nit.

⁹Ne san rangin nangni ngên theina richam kin nei no sika amakhah kin itho ni mak a, nin zui rang piala enton ranga kin itho a nit.

¹⁰Nin ziangah kin om lâiah khan, “Tukhomin sin a tho nuam non chu ifah khom fah no riseh,” iti nangni kin iril ngai kha.

¹¹Nin lâia mi ṭhenkah chu rithaboi takkan, ichiar banah chu îte tho viat loiin an om ngai iti kin riat sikin amakhah kin iti a nit.

¹²Khangkana mihei khah ringnun iṭha tak inei a, sin itho a, an nuk chit chu ilo suak rangin Pumapa Jisua Krista rimingin thu pen kin îthor a nit.

¹³Suapuihei, nangni chu sin iṭha tho nin changindong no rei.

¹⁴Khante, tukhomin hi lekhathona kin thu sîr hih an zôm nuam non chu indang unla, an izak theina rangin ripôlpui tlak no rei.

¹⁵Khannisela, mêlmâk angkan chu be no unla, suapui angkan ril lem rei.

¹⁶Pumapa ei ringeina nâr ngêi khan kumkhuakan lam tinrêngah ringeina nangni peh sela, Pumapa chu nin rêngka ziangah om riseh.

¹⁷Keimah Paulan, keima kut ngêiin chibai nangni kî bûk a nit hi. Hingkana ki irziak hih ki lekhathon murdi richikna a nit.

¹⁸Ei Pumapa Jisua Krista lungkhamna nin rêngka chungah om riseh.