Read Biete 1 TIMOTHEA 1 Bible Online

1 TIMOTHEA 1 - Biete bible

1 TIMOTHEA 1

¹Keimah Paula, ne saninringtu Pathian neh ei tûngpui Krista Jisua thupêk lama Krista Jisua tirtôn hin,

²iamnaa ki nai tak tak Timothea chibai kî bûk a nit. Pathian ei Pa neh Krista Jisua ei Pumapa ziang ata lungkhamna hei, khorngaina hei neh ringeina hei ni ziangah om riseh.

³Makedonia ramah ki fe rang lâia Efesi khua om mai ranga nang kî ngên angkah khan atûn khom nang kî ngên nôk a nit. Mi ṭhenkah thurin dik ino inrisei ngaihei khah ni khap ngêt rang a nit.

⁴Phûng chanlamboi neh richibulhei zuang risui dân isui khah ima rangin iril roh, kha thuhei khan risêlna bang â sua a, iamnaa ireh ngai, Pathian thiltum khah riatinfelna peh ual ngai mak.

⁵Nikhomsela, lungril rithiang, sia neh ṭha riatna rithiang neh iamna dik taka rithoka suak lungthlungna khah a hong pung theina rangin hi thu hih nang kî pêk a nit.

⁶Mi ṭhenkan chu kha lampui ata khah an pêt a, thu chanlamboi isîr tiang an fe tâk.

⁷Dân inriseitu takin an ribe a; nikhomsela, an thu sîr omzia neh ingam takka an thurchi sîr ngaihei khah rianfel tak tak mak e.

⁸Dân hih mîn a mangna rang idik takah imang a nitin chu a ṭha a nit iti ei riat a.

⁹Dân hih mi ṭhahei chunga lek ranga siam ni mak iti ireh rang a nit: Dân chu Dân ichâihei neh mi pualoihei, Pathian ngaisakinohei neh mi sualhei, tliabalam ngaisak inohei neh mi porinchehei, nu neh pa thathei neh mi that ngaihei,

¹⁰ridisonghei neh ngalinterhei, miriam iruh ngaihei neh mi lêmsiahei, milaka vânirisâm ngaihei neh thurin dik iheng ngaihei neh,

¹¹inpâk inrup Pathianin inpuang ranga a ne înkol Thurchi Ṭha roinpui isêla mi inrisei ngaihei chunga lek rang a nit.

¹²Ki sinthonaa nen râttu, â tluka ner ngaia hi sin itho ranga nen kungtu Krista Jisua, ei Pumapa ziangah lômthu ki îsîr a nit.

¹³Matonah khan arkôkinsehtu, nuamilotu neh â êrotu lei ni khom inlang, iamna ki la nei maa reh loia kî tho ngai a nit sikin Pathian lungkhamna ki lai dong thei a nit.

¹⁴Ei Pumapa lungkhamna khan Kristaa iamna neh lungthlungnan a ne vur insip tâk a.

¹⁵“Krista Jisua chu mi sualhei saninring rangin rammualah hin ai zuang a nit,” iti hih iiam ai omin, ipom inrup tak tak a nit. Keimah hi anni lâia â sual tak ki nit hi.

¹⁶Nikhomsela, hi sikah hin lungkhamna kî dong a nit, Jisua Krista khan ki chunga a lungdiar tlia a înlang masa hi, atûn zoro khêl khoma ama iamtuhei murdîn, kumtluang ringna dong thei an ti iti enrikhîna a lei nit.

¹⁷Kumtluang Rêng, thi thei ino, mita mu thei ino, Pathian tak bang ziangah khan chôiinrisângna neh roinpuina kumkhuantluangkan om riseh. Amen.

¹⁸Ki naipa Timothe, hi thupêk hih nang ki înkol a nit; zânthlahein ni chungchâng an lei irillôk khah remai inla, kha thu khah imangin ridoina ṭha khah doi roh;

¹⁹iamna neh sia neh ṭha riatna rithiang tak khah vong mai roh; mi ṭhenkahein an sia neh ṭha riatna an nôl a, an iamna khah an isiat zoi ngai.

²⁰Kha mihei lâiah khan Humenaia neh Alekzandara khom an ṭang a; Pathian isîrinsia an bângna rangin Soitana kutah kî pêk tâk a nit.