Read Biete 1 TIMOTHEA 2 Bible Online

1 TIMOTHEA 2 - Biete bible

1 TIMOTHEA 2

¹Atîr taka nangni ki ircha nuam chu thil ngênna ṭongṭainahei, ṭongṭaina rêng rênghei, ngênpêkna ṭongṭainahei, lômthu sîrnahei mi murdi ta rangin lan unla,

²Pathian ingaisak neh marit puma oma rithlaringam taka idâiriamka munka ei lêng dîl theina rangin rênghei neh thuneituhei murdi ta rang khomin ngên pêk rei.

³Amakhah ne saninringtu Pathian mitmuah a ṭhat a, a lômlam tak a nit.

⁴Ani khan mi murdi saninringa om rang neh thutak ireh rangin ai nuam a nit.

⁵Pathian khatkah bang a om a, Pathian neh miriam kârah khom palâi khatkah bang a om a; miriam Krista Jisua khah.

⁶Mi murdi ritlanna ranga ripetu khah a nit. Saninringna thu khah Pathianin a zoro inkung takah a zuang inpuang tâk a.

⁷Kha sikah khan kêng, keimah hih Jentailhei ziangah kha iamna khah inpuang rang neh thutak inriseitu neh tirtôn ranga inkung kî nit; hi ki thu sîr hih thutak a nit a, milak tho mang e.

⁸Khanchu, nin inkhômna tinah ipahei khan tititakin, ningthik pumin neh iam rilak pumin ni loiin kut rithiang ipharin ṭongṭai riseh.

⁹Khaangkan, nupanghei khom silibom ruptak neh ifeltak neh balam takkan rivo sela, sam siaminlêr hei, rângkachaka rivo hei, lungilu rithei ilî hei, puan man ilua rivo hei song no sela kî nuam a nit.

¹⁰Khannisela, Pathian ngaisak nupanghei sin rua pial, sin iṭhaah khan rithluk ual riseh.

¹¹Nupanghei khan chu idâirekin, thu ôi takkan thil an risei rang a nit.

¹²Nupanghein mi an înrisei rang manih, ipa chunga richam inei rangin manih phal mang e; an dâirek ngêt rang a nit.

¹³Adama khah Evi nêkan chu isiam masa a nit a;

¹⁴ilêma om khah Adama ni mak a, nupang khah a nit ilêma om neh Pathian dân isehtu chu.

¹⁵Nikhomsela, nupang kha iamna hei, lungthlungna hei, rithiangna hei a neia lungril ifel tak riputa a omin chu nai a nei sikin saninringin om a ti.