Read Biete 1 TIMOTHEA 3 Bible Online

1 TIMOTHEA 3 - Biete bible

1 TIMOTHEA 3

¹“Tukhomin koindang ruaitu[1] chang a nuamin chu, sin iṭha tho ai nuam a nit,” iti hih ṭong dik[2] a nit.

²Khanchu, koindang ruaitu inih rang chu sêlnaboi, nupui khatka nei,[3] nunchan iṭha, ridîn thei, maritiom, tikithlâi neh minrisei ithiam a nit rang a nit.

³Uain inrui ngai ino, kut iṭhum zel song ino, mi lungrivuai, ringei inuam mi neh sum ringaiinna no mi a nit rang a nit.

⁴Mahni insungkua vângsak izêk thiam mi, marit taka a naihei kôiilîm thiam mi a nit ngêt rang a nit.

⁵Mahni insungkua vângsak izêk ilua thiam ino mi khan ingkan im Pathian koindang a enkol thei ranga?

⁶Iamtu thar a nit rang ni mak e; kha non chu ripâk a ta, Diabola thiamno chang angkah khan thiamno chang duai a ti.

⁷Putianga mihei khomin marit an itho mi a nit rang a nit; khanchu, mualinphoia omin Diabola chângah a iôk ino rang a nit.

⁸Khangkah ngirin koindang sinthotuhei khom mi maritiom, lungril idet mi an nit rang a nit; uain idu mi neh dik ino taka lepinrûk inuam mi an nit rang ni mak e;

⁹sia neh ṭha riatna rithianga iamna thu inriltak ituh ngit mi an nit rang a nit.

¹⁰Khangkana mihei khom khah a masan ifia bak ni sela, sêlnaboi an nitin chu koindang sinthona tiang sin tho riseh.

¹¹An nupuihei khom khangkah ngirin mi maritiom, mi rêl song ino, ridîn ithiam, lam tinrênga mi iamom an nit rang a nit.

¹²Koindang sinithotuhei chu nupui khatka nei, naihei neh insungkua enkol ithiam mi an nit rang a nit.

¹³Kha sinithotuhei lâia an sin iṭha takka thohei chu an dingmun ṭha tîr tîr a ta, Krista Jisua iamnaah khom ihâi ual ual an ti.

¹⁴Hi lekhathon ker ziak lâiah hin ihonga nang hong imu viak thei rangin ki tûng a;

¹⁵nikhomsela, ki hong itlâi duaiin Pathian insungkua, Pathian iring koindang, thutak chopui neh ringatna khah ingkana om rang im ai nit iti ni riat theina rangin lekhathon hih ki irziak a nit.

¹⁶Ei sakho thurithup roinpuizia hih iphial thei chi ni mak e: Ani chu miriam mêl riputin a zuang ilang a, Rithla khan â dikzia ân lang a, Vântirtônhei khomin an mu a. Ani chu nam tin lâiah puang indar a nit a, Rammual pumpuia mihein an iam a, Roinpuinaah zuk ilan a om tâk.