Read Biete 1 TIMOTHEA 4 Bible Online

1 TIMOTHEA 4 - Biete bible

1 TIMOTHEA 4

¹Zoro nungkhônah chu mihein iamna thu hi nung la song an ta, rithla dik ino iṭhui inrimangin, ramrilihei ata suak inriseina dik ino khah la zôm ual an ti iti Rithlân ifel takkan a îsîr a nit.

²Kha inriseina thekindartuhei chu mi lêmsia, sia neh ṭha riatna thi, thîr iling ibel inchâr angkah an nit.

³Khahei khan rinei neh thil ṭhenkah ifa an khap a. Thutak ireh tâk iamtuhei khan chu lômthu sîr puma ifah ranga Pathian isiam a nit iti an riat a.

⁴Pathian thilsiam tinrêng hih a ṭhat a, lômthu sîr puma ifa a nitin chu îte nuam ino rang omak e;

⁵Pathian thu neh ṭongṭainaa lan inrithiang riai tâk a nit sikin.

⁶Hi inriseina hih suapuihei iril inla, Krista Jisua sinthotu ṭha nîng ni ti; iamna thu neh inriseina dik nî zui ngai khan rithla tiang nang inthuar mai a ti.

⁷Phûng chanlamboi khah nungsong inla, Pathian ingaisak rangin risôi roh.

⁸Taksa risôina hi rifena itena manih chu a om, rithla tianga risôina vâng hi chu lam tinrêngah rifena a om a, atûna ringlâi sung neh nakan zoro rangin rifena ai om tak tak a nit.

⁹Hi thu hih iiam ai omin iham inrup a nit.

¹⁰Pathian iring chu ei tûngna ringatna a nit tâk sikin zâltak isongin ei isin tak tak a nit. Ani chu mi murdi Saninringtu a nit a, iamtuhei ta rangin ai nit ual bîk a nit.

¹¹Hi thu hih pen la, inrisei sa zel roh.

¹²Ni naipangna sikin tutên nang enkhûm no riseh, ṭonglam heiah, chângdân heiah, lungthlungna heiah, iamna heiah, rithiangna heiah iamtuhei enton inrupin om roh.

¹³Ki hong mâkah chu vântlâng lâia Pathian thu tep hei, thu sîr hei, inrisei hei iṭha takkan lei uar roh.

¹⁴Upahein ni chungah kut an ringat lâia zânthlahei îsîr angkana rithla thilpêk nî donghei khah ithla no roh.

¹⁵Mi murdîn ma ni fôn tlia an mu theina rangin kha thilhei khah mang mai inla, amakhan ripeh roh.

¹⁶Nangmah neh nen riseinaah khan ridîn inla, kha thilhei khah tho mai roh. Khangkan ni thôn chu nangmah neh ni thu ringaituhei kha saninring ni ti.