Read Biete 1 TIMOTHEA 5 Bible Online

1 TIMOTHEA 5 - Biete bible

1 TIMOTHEA 5

¹Putar ualhei khah ngo non la, mahni pa angkah taka enin ingênin ngên ual roh; naipang ualhei khah urêng angkan en inla,

²Pitarhei khah ni nu angkan en inla, nungâkhei khah rithiang takkan far angkan en roh.

³Numei, an khât banga omhei khah ngîk roh.

⁴Nikhomsela, tunete nei numeihei chu, an tunetehei khan Pathianin insungkua sintum ai pêk khah ilen suak risei bak sela, anmani don inliantu khah donsui ta riseh, amakhah Pathian lôm lam tak a nit.

⁵Numei, â donsuitu nei ino, mahni khât banga om khan chu Pathian bang tûngpuiin a nei a, sanna zongin sûn zân a ṭongṭai ngai.

⁶Nikhomsela, numei hoiinhâina ringota ripe kha chu la ring mai khom seh, â thi pial tâk a nit.

⁷Sêlnaboia an om theina rangin kha rilna thuhei khah peh roh.

⁸Nikhomsela, mahni tiang neh khuahei, a bîkin mahni insung mihei donsui nuam ino an omin chu iamna khah an iphial tâk tina a nit, iam ino mi nêkan an îsual ual a nit.

⁹Numei kum sômiruk lân lei ino chu numei riming riziakna bukah khan inchuang no roh. Khabanah voikah bang pasal inei,[4]

¹⁰sin iṭha thona lama inpâk ilo tâk, naihei iṭhatakka lei idonsui tâk, khualmi lei ithlun ngai, mi rithianghei ke lei risuh ngai tâk, mi dengintheihei isan inuam, sin iṭha thona lama ripeh mi an nit rang a nit.

¹¹Numei a la vâng ualhei kha chu inchuang no roh, an rizukna sikin Krista nungisongin pasal inei an nuam nôk ngai a,

¹²a zianga an ṭong lei inkung tâk khah an isiat sikin thiamno changin an iom ngai a nit.

¹³Kha ti no khom, in tin ilôrin zoron hek an risei a, kha nêka seh ual an itho ngai chu, ṭong itam neh mi sintho dem an song a, an isîr loirua an isîr ngai.

¹⁴Khasikin, numei la vâng ualhei khan chu pasal nei nôk seh kî nuam a nit, nai ineiin insungkua enkol sela; khanchu, ei irâlhein an nen siatna rang reng an inei ino rang a nit.

¹⁵Atûn khomah hin numei ṭhenkah chu Soitana tiang an ipêt pial tâk a nit.

¹⁶Iamtu nupangin,[5] a inah numei a neiin chu aman a donsui rang a nit; numei an khât banga omhei bang khah koindangin an enkol theina rangin koindang khah phurik siam pêk no riseh.

¹⁷Koindang upa, mi rui mi lôm ithiam, a bîkin thu sîr neh inriseina tianga zâl isonghei chu chôiinrisângna a bâk inikah imûn rup an nit.

¹⁸Pathian Thubûn, “Serâtchalin bu a chîl lâiin a mûr khuap pêk no roh; sinithotu chu thalo a mu rang a nit,” a ti a.

¹⁹Koindang upa an nôna chu riatpuitu inika manih, ithumka manih lua an om non chu ipom no roh.

²⁰Thil thonsualtuhei chu vântlâng makungah ngo roh, mi danghei khomin an ṭi theina rangin.

²¹Pathian neh Krista Jisua neh a vântirtôn rithianghei mitmun thu nang kî pêk a nit: ringai dân lei inei thlâm ni loiin neh thleibîk khom nei loiin kha rilna thu khah ṭhatnemringai takkan ni zôm rang a nit.

²²Pumapa sinthotu ranga namindet rangin ni kut an chungah ringat zel no roh. Mi dang sualnaheiah ṭang non la, rivong rithiang mai roh.

²³Tui ringot in ngai no roh, ni dam rak ngai no sikin ni sungkhôl râtna rangin uain ichîntek tekah in sa ngai roh.

²⁴Mi ṭhenka sualna chu â langpam a, thiam no inchang zel thei a nit; mi ṭhenka sualna rêk chu isôt takka nungah bang â lang chak ngai.

²⁵Khaangkan, sintho ṭha chu â langpam a, ilangpam no khom seh, ithup mai thei ni ngai mak e.