Read Biete 1 TIMOTHEA 6 Bible Online

1 TIMOTHEA 6 - Biete bible

1 TIMOTHEA 6

¹Pathian riming neh ei inriseina thu isîrinsia a om nona rangin suak ringkol ribâthei khan an puhei khah lam tinrêngah an marit rang a nit.

²Suak, Kristian pu neihei khan iamnaa suapui an nitna kha riamchâna neiin an puhei an enkhûm rang ni mak. Kha nêkan, iṭha nôk ualin sin an tho pêk rang a nit; an sin an ithopêkhei neh khan iamna neh lungthlungnaa insungkuakah an nit sikin. Hi thu hih inriseiin ne sîr rang a nit.

³Mi tukhomin ei Pumapa Jisua Krista thutak neh ei sakhua inriseina thu dik khah ikalin thurin dang ân riseiin chu,

⁴ani khah ripâkna sip, intlo, îte riano a nit. Ireh nêkan risêlna neh rikhalna tiangah khan a învêtpui tâk a nit. Khante, kha risêlna neh rikhalna khan narsana, risualna, rikôkinsiatna, ṭha no tianga sabeiseina hei,

⁵risêlrâtna hei â sua ngai a; khangkana, risêl irât mihei kha chu lunginṭong isêt neh thutak reng nei ino mi, Pathian ngaisak hih richongna manih ititu an nit.

⁶Pathian ngaisakna hih lungtlukna a ṭangin chu rifena om tak ai nit pial a nit.

⁷Rammualah hin îte lûtpui mang me a, îte khom suakpui thei mang meh.

⁸Khasikah khan, fâknêk silibom ei neiin chu ei ilung intluk ei ti.

⁹Khannisela, richong itumhei chu thlêmnaah an ṭul a, rizukna invêt neh mi sehthei chângheiah khan an iôk ngai, kha rizukna khan siatna neh ramnaah mihei a kâiiṭhul ngai.

¹⁰Sum kanna hih sual tinrêng bul a nit. Amakhah ṭhenkan an rizuk a, iamna ata an ivâi a, anmani neh anmani ngaisiatna itam takkan an lungril an sunikhoi ngai.

¹¹Nikhomsela, nangmah Pathian mi, kha thilhei khah lôi inla, felna hei, Pathian ngaisakna hei, iamna hei, lungthlungna hei, tuangdiarna hei, ringaichînna hei rizûl mai roh.

¹²Iamna risiaknaah khan zâl tak isongin itlân inla, kumtluang ringna khah ituh roh; kha dong rangin Pathianin nang ai koi a nit; riatpuitu itam takkahei mitmua ihâi takka ni iamna ni înpuang tâk angkah khan.

¹³Pathian, thil tinrêng ringna petu neh Krista Jisua, Pontia Pilata makunga a iamna ihâi takka inpuangtu mitmuah khan thu nang ki pêk;

¹⁴ei Pumapa Jisua Krista a zuang inlâr nôk Nikhua dênin thupêk khah iamom takkan zôm roh.

¹⁵Kha inlârna khah a zoro takkah khan inpâk tlâk Thuneitu neh Roirêltu om isun, rênghei Rêng neh pumahei Pumapa khan zuang ithlun a ti.

¹⁶Amah bang khan thi thei nona a nei a, ivâr, inâi thei chi ni no-ah khan a om a, ani chu tutên la mu ngai mak a, imuh khom mu thei mak e. Ama ziangah khan kumtluanga chôiinrisângna neh sinthotheina om riseh. Amen.

¹⁷Hi rammuala richonghei hih ripâk loi rang neh, richon iamom inoah hin an iamna ringat loia, ei lômna ranga thil tinrêng ne petu Pathian chungah khan ringat rangin thu peh roh.

¹⁸Sin iṭha sin rangin, sin iṭhaa richong rangin, riphal takka mi danghei isem mai rangin ithor sa mai roh.

¹⁹Khangkana thon an ta rangin richon bûm an ta, amakhah sûn matona rangin lungphûm idet tak nîng a ti. Khanchu, ringna, ringna tak tak khah dong an ti.

²⁰O Timothe, ni zianga inkola om khah vong inṭha roh. Pathian ngîk nona ṭong neh risêlna invêt, mi ṭhenin idik iloi takka “Riatna” an iti khah lôi roh.

²¹Amakhah ṭhenkahein an inei manih isônin iamna lam khah an inrimang tâk. Pathian lungkhamna khah nin rêngka ziangah[6] om riseh.