Read Biete 2 TIMOTHEA 1 Bible Online

2 TIMOTHEA 1 - Biete bible

2 TIMOTHEA 1

¹Keimah Paula, Krista Jisuaa ringna inkung inpuang ranga Pathian lungdoa Krista Jisua tirtôn hin,

²ki nai lungthlung tak, Timothea chibai kî bûk a nit. Pathian ei Pa neh ei Pumapa Krista Jisua ziang ata lungkhamna hei, khorngaina hei neh ringeina hei nin ziangah om riseh.

³Ker chibulhei tho lam angkah takin sia neh ṭha riatna rithiang tak ineia a sin kî tho ngai Pathian ziangah lômthu ki îsîr a nit. Sûn zân ki ṭongṭaina heiah zorotin nang ki riat mai ngai a,

⁴ni mitrithlihei khom ki riat mai a, lômnan ki sip theina rangin nang imu ki nuam tak tak.

⁵Iamna tak tak nangmaa om khah ki riat mai, kha iamna khah a tîrin ni pi Loisiah a om a, ni nu Eunikiah a om nôk a, nangmah-ah khom a om iti kî riatinfel a nit.

⁶Khasikah khan ni chungah kut ker ngat lâia Pathian thilpêk nî dong khah sêm inchok mai rangin nang iril nôk kî nuam a nit.

⁷Pathianin indôpna Rithla ne peh mak a; kha nêkan, sinthotheina, lungthlungna neh lungril ifeltak neina Rithla a ne ipêk a nit.

⁸Ei Pumapa thu hih inpuang izak no roh, ama sika mi tâng keimah khom hi ne zakpui no roh. Kha nêkan Pathian râtnaa ringatin Thurchi Ṭha sika dengthei tuangna khah ne tuangpui roh.

⁹Ani khan ei sintho sik ni loiin, ama thiltum lam angkah takin lungkhamnan a ne saninring a, rithiang taka ring rangin a ne ikoi a nit. Krista Jisua khan leilung insiang ma viaiah khan a lungkhamna chu a ne lei pêk tâk a;

¹⁰khanniseh, atûnah hin, ei Saninringtu, Krista Jisua a zuangah khan, amakhah inlangin ai om tâk a nit. Ani khan thina khah â nê tâk a, Thurchi Ṭhaah hin ringna neh thi thei nona a zuang înlang tâk a nit.

¹¹Keimah hi kha Thurchi Ṭha inpuang ranga tirtôn[1] neh minriseitu ranga phun ki nit.

¹²Kha sikah khan kêng atûn khom hingkana kî tuang ai nit. Nikhomseh, izak mang e; kî iamah chu ki riat a, a zianga ki înkol[2] chu kha Nikhua rangah khan a vong inṭhat thei iti kî riatinfel a nit.

¹³Ki zianga rithoka nî riat ngai inriseina dik khah ituh ngit inla, Krista Jisuaa iamna neh lungthlungnaah khan om mai roh.

¹⁴Ni dâra ringat, thilpêk roinpui tak kha, eimania om ngai, Rithla Rithiang sinthotheina mangin vong inṭha roh.

¹⁵Asia rama om murdîn an ne mâk iti ni riat a, annihei lâiah khan Fugela neh Harmogena ten khom an iṭang sa a nit.

¹⁶Pumapa khan Onesifora hei insungkua chu lungkhamna peh riseh; ani khan a ne înhar mai ngai a nit. Tâng ina kî om khom hih ne zakpui mak a,

¹⁷Rom.khua a hong tlung kaneh a ne hong zong a, a ne mu mâkah chu a ne izong a nit. Efesi khuaah khom ki ta rang sin a tho tlia khah nin iriat infel a nit.

¹⁸Pumapa khan kha Nikhuah khan a lungkhamna chu indong riseh.